ନୂଆଦିଲ୍ଲୀ: ହରିୟାଣା ନିର୍ବାଚନରେ ପରାଜୟ ପାଇଁ ଇଭିଏମକୁ ଦାୟୀ କରିଛି କଂଗ୍ରେସ । ଆଉ ଏଥିପାଇଁ ନିର୍ବାଚନ ଆୟୋଗ ଏବଂ କଂଗ୍ରେସ ମଧ୍ୟରେ ତୁତୁ ମେଁମେଁ ଲାଗି ରହିଛି । ଇଭିଏମରେ ହେରଫେର ନେଇ କଂଗ୍ରେସ ଯେଉଁ ଅଭିଯୋଗ ଆଣିଛି ଏହାକୁ ସମର୍ଥନ କରିଛନ୍ତି ଓ୍ବାଇଏସଆର କଂଗ୍ରେସ ମୁଖ୍ୟ ଏବଂ ଆନ୍ଧ୍ର ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଜଗନ ମୋହନ ରେଡ୍ଡୀ । ନିର୍ବାଚନୀ ପ୍ରକ୍ରିୟାରେ ‘ବାଲାଟ୍ ପେପର୍’ ବ୍ୟବସ୍ଥା ଫେରିବା ଦରକାର ଏବଂ ଏହା ଭୋଟରଙ୍କ ଆତ୍ମବିଶ୍ବାସ ବଢ଼ାଇବ ବୋଲି ଦାବି କରିଛନ୍ତି ଜଗନ ରେଡ୍ଡୀ ।
ହରିୟାଣାର ନିର୍ବାଚନୀ ଫଳାଫଳ ଆଡ଼କୁ ଇସାରା କରି ସେ କହିଛନ୍ତି, ଆଉ ଏକ ରେଜଲ୍ଟ ଲୋକପ୍ରିୟ ଧାରଣାକୁ ଆଘାତ ଦେଇଛି । ତେବେ ହରିୟାଣା ଫଳାଫଳ ଆସିବା ପୂର୍ବରୁ ଏକଜିଟ୍ ପୋଲ୍ରେ କଂଗ୍ରେସକୁ ବହୁମତ ମିଳିବ ବୋଲି ଦାବି ହୋଇଥିଲା । ଅନ୍ୟପଟେ ଆନ୍ଧ୍ର ପ୍ରଦେଶ ଏବଂ ହରିୟାଣା ନିର୍ବାଚନ ଫଳାଫଳରେ କୌଣସି ପାର୍ଥକ୍ୟ ନାହିଁ ବୋଲି ଅଭିଯୋଗ କରିଛନ୍ତି ଓ୍ବାଇଏସଆର କଂଗ୍ରେସ ମୁଖ୍ୟ । ୨୦୨୪ ଲୋକସଭା ନିର୍ବାଚନ ସହିତ ଆନ୍ଧ୍ର ପ୍ରଦେଶର ବିଧାନସଭା ନିର୍ବାଚନ ଅନୁଷ୍ଠିତ ହୋଇଥିଲା । ଏହି ନିର୍ବାଚନରେ ଜଗନ ରେଡ୍ଡୀଙ୍କ ଦଳ ୧୭୫ ଆସନରୁ କେବଳ ୧୧ ସିଟ୍ ଜିତିବାକୁ ସକ୍ଷମ ହୋଇଥିଲା ।
ଜଗନ ମୋହନ ରେଡ୍ଡୀ ଏକ୍ସରେ ଲେଖିଛନ୍ତି, ‘ଲୋକଙ୍କ ଚିନ୍ତାଧାରାକୁ ଆଘାତ ଦେଇଛି ଆଉ ଏକ ନିର୍ବାଚନ ଫଳ । ହରିୟାଣା ନିର୍ବାଚନର ଫଳାଫଳ ଆନ୍ଧ୍ର ପ୍ରଦେଶ ଠାରୁ ଭିନ୍ନ ନୁହେଁ । ଏହି ମାମଲା ଏବେ କୋର୍ଟରେ ରହିଛି । ଗଣତାନ୍ତ୍ରିକ ରାଷ୍ଟ୍ରରେ ଗଣତନ୍ତ୍ର କେବଳ ଏକ ପ୍ରଚଳିତ ପ୍ରଥା ଭାବରେ ନରହି ଏଥିରେ ଉନ୍ନତି ଆସିବା ଦରକାର । ଆମକୁ ବାଲାଟ ପେପରକୁ ଫେରିବାକୁ ପଡ଼ିବ ।’
ସେ ଆହୁରି ଲେଖିଛନ୍ତି, ‘ବହୁ ବିକଶିତ ରାଷ୍ଟ୍ର ଆମେରିକା, ବ୍ରିଟେନ୍, କାନାଡା, ଅଷ୍ଟ୍ରେଲିଆ, ନ୍ୟୁଜିଲାଣ୍ଡ, ସ୍ବିଜରଲ୍ୟାଣ୍ଡ, ଜର୍ମାନୀ, ଫ୍ରାନ୍ସ, ଜାପାନ, ନରଓ୍ବେ ଏବଂ ଡେନମାର୍କରେ ବାଲାଟ୍ ପେପର ବ୍ୟବହାର କରୁଛନ୍ତି । ତେଣୁ ବିଶ୍ବ ସହ ତାଳ ଦେଇ ଆମକୁ ପରିବର୍ତ୍ତନକୁ ସ୍ବୀକାର କରିବାକୁ ପଡ଼ିବ ଏବଂ ଆମେ ବାଲାଟ୍ ପେପର ବ୍ୟବହାର କରିବା ଦରକାର । ଫଳରେ ନିର୍ବାଚନକୁ ନେଇ ଆତ୍ବବିଶ୍ବାସ ବୃଦ୍ଧି ପାଇବ ।’
Yet another election result confounds popular perception. Haryana election result is no different from Andhra Pradesh, on which cases are pending in courts. In a democracy like ours, Democracy should not only be prevalent but also be seen to be thriving. Only way to ensure both,…
— YS Jagan Mohan Reddy (@ysjagan) October 9, 2024
ହରିୟାଣା ନିର୍ବାଚନରେ ୯୦ ଆସନରୁ ୩୭ଟି ସିଟ୍ରେ ବିଜୟ ହାସଲ କରିଛି କଂଗ୍ରେସ । ଏନେଇ ମଙ୍ଗଳବାର ଫଳାଫଳ ପ୍ରକାଶ ହେବା ପରେ ଇଭିଏମକୁ ନେଇ ବିବାଦ ଉଗ୍ରରୂପ ଧାରଣ କରିଛି । ଫଳାଫଳକୁ ଅସ୍ବୀକାର କରିଛି କଂଗ୍ରେସ ଦଳ । ହରିୟାଣାରେ ଦଳର ବିଜୟକୁ ଛଡ଼ାଇ ନିଆଯାଇଛି ଏବଂ ଇଭିଏମରେ ହେରଫେର କରାଯାଇଛି ବୋଲି କଂଗ୍ରେସ ଦାବି କରିଛି। ସେପଟେ କଂଗ୍ରେସର ଦାବିକୁ ଭାରତୀୟ ନିର୍ବାଚନ ଆୟୋଗ ଖଣ୍ଡନ କରିଛନ୍ତି । ଏସବୁ ଭିତରେ କଂଗ୍ରେସ ଦାବି ସପକ୍ଷରେ ମନ୍ତବ୍ୟ ଦେଇ ଚର୍ଚ୍ଚାକୁ ଆସିଛନ୍ତି ଜଗନ ମୋହନ ରେଡ୍ଡୀ ।
