ନୂଆଦିଲ୍ଲୀ ୧୨/୦୫: ରୋଗୀସେବା ଲାଗି ନର୍ସମାନଙ୍କର କଠିନ ପରିଶ୍ରମ, ସମର୍ପଣଭାବକୁ ପ୍ରଶଂସା ଓ ସମ୍ମାନ ଜଣାଇବା ଉଦ୍ଦେଶ୍ୟରେ ସମଗ୍ର ବିଶ୍ୱରେ ପାଳିତ ହୁଏ ଅନ୍ତର୍ଜାତୀୟ ନର୍ସ ଦିବସ । ଆଧୁନିକ ନର୍ସିଂର ଅଗ୍ରଦୂତ ଫ୍ଲୋରେନ୍ସ ନାଇଟ୍ଆଙ୍ଗେଲଙ୍କ ଜନ୍ମ ବାର୍ଷିକୀ ଅବସରରେ ପ୍ରତି ବର୍ଷ ମେ ୧୨ ତାରିଖରେ ଏହି ଦିବସ ପାଳିତ ହୁଏ । ନର୍ସିଂ ଏକ ଉତ୍ତମ ଏବଂ ନିଃସ୍ୱାର୍ଥପର ବୃତ୍ତି । ଲୋକଙ୍କ ସୁସ୍ଥତା ପ୍ରତି ନର୍ସମାନଙ୍କ ସମର୍ପଣଭାବକୁ ସ୍ୱୀକାର କରିବା ଏହି ଦିବସ ପାଳନର ଉଦ୍ଦେଶ୍ୟ ।
ନର୍ସଙ୍କ ଅଧିକାର ଓ ସଂଘର୍ଷ ବିଷୟରେ ଜନସଚେତନତା ସୃଷ୍ଟି ସହିତ ସେମାନଙ୍କ ପାଇଁ ଉନ୍ନତ କାର୍ଯ୍ୟ ପରିବେଶ ସୃଷ୍ଟି କରିବା ଲାଗି ଲୋକଙ୍କୁ ଓ ନର୍ସଙ୍କୁ ଶିକ୍ଷିତ କରିବା ଉଦ୍ଦେଶ୍ୟରେ ଇଣ୍ଟର୍ନ୍ୟାସ୍ନାଲ କାଉନ୍ସିଲ ଫର୍ ନର୍ସେସ୍ ଦ୍ୱାରା ୧୯୬୫ ମସିହାରେ ଏହି ଦିବସ ଆରମ୍ଭ କରାଯାଇଥିଲା । ସେବେଠାରୁ ପ୍ରତି ବର୍ଷ ଅନ୍ତର୍ଜାତୀୟ ନର୍ସ ଦିବସ ପାଳିତ ହେଉଛି । ଚଳିତ ବର୍ଷ ଏହି ଦିବସର ବିଷୟ ରହିଛି ‘ଆମ ନର୍ସ, ଆମ ଭବିଷ୍ୟତ । ସେବା ଯତ୍ନର ଆର୍ଥିକ ଶକ୍ତି ।’