ନୂଆଦିଲ୍ଲୀ: ଲେବାନାନର ରାଜଧାନୀରେ ଗତ ଦୁଇ ଦିନ ମଧ୍ୟରେ ପ୍ରଥମେ ପେଜର ଏବଂ ପରେ ଓ୍ବାକି ଟକିରେ ବିସ୍ଫୋରଣ ପରେ ହିଜବୁଲ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଅଲଜାଜିରା ରିପୋର୍ଟ ଅନୁଯାୟୀ, ହିଜବୁଲ ଆଜି (ଶୁକ୍ରବାର) ଉତ୍ତର ଇସ୍ରାଏଲରେ ୧୪୦ ରକେଟ ମାଡ କରିଛି । ହିଜବୁଲ ନେତା ହାସନ ନାସରାଲ୍ଲା ଏହି ବିସ୍ଫୋରଣ ପାଇଁ ଇସ୍ରାଏଲ ଉପରେ ପ୍ରତିଶୋଧ ନେବାକୁ ପ୍ରତିଜ୍ଞା କରିବାର ଗୋଟିଏ ଦିନ ପରେ ଏହି ଆକ୍ରମଣ ହୋଇଛି। ଇସ୍ରାଏଲ୍ ସେନା ଏବଂ ଆତଙ୍କବାଦୀ ଗୋଷ୍ଠୀ ଏହି ସୂଚନା ଦେଇଛନ୍ତି । ଇସ୍ରାଏଲ ସେନା କହିଛି ଯେ ଶୁକ୍ରବାର ଅପରାହ୍ନରେ ଲେବାନନ ସୀମାବର୍ତ୍ତୀ ଅଂଚଳରେ ଟାର୍ଗେଟ କରାଯାଇଥିଲା ।

ଅଲ ଜଜିରା ରିପୋର୍ଟ ଅନୁଯାୟୀ, ହିଜବୁଲ କହିଛି ଯେ, ଏହା ପ୍ରଥମ ଥର ପାଇଁ ଆକ୍ରମଣ କରିଛି, ଏଥିରେ ଅନେକ ବାୟୁ ପ୍ରତିରକ୍ଷା ବେସ ଏବଂ ଇସ୍ରାଏଲର ସଶସ୍ତ୍ର ବ୍ରିଗେଡର ମୁଖ୍ୟାଳୟ ସମେତ ଅନେକ ସ୍ଥାନକୁ ଟାର୍ଗେଟ କରାଯାଇଛି ।

ଇସ୍ରାଏଲ୍ ସେନା ଦାବି କରିଛି ଯେ ହିଜବୁଲ ପକ୍ଷରୁ ହୋଇଥିବା ରକେଟ ମାଡରେ କୌଣସି ମୃତାହତ ହୋଇନାହାଁନ୍ତି । ଆଇଡିଏଫ୍ କହିଛି, ରକେଟ ମାଡ ପାଇଁ ହୋଇଥିବା ବର୍ଜ୍ୟବସ୍ତୁ ଯୋଗୁଁ ଘଟିଥିବା ନିଆଁ ଲିଭାଇବା ପାଇଁ ଦେଶର ସେନା କାର୍ଯ୍ୟ କରୁଛି।

ତେବେ ପୂର୍ବରୁ, ଲେବାନନର ବେରୁଟରେ ପେଜର୍ ଏବଂ ୱାକି-ଟକିରେ ବିସ୍ଫୋରଣ ହେତୁ ଅନେକ ଲୋକ ପ୍ରାଣ ହରାଇଥିଲେ, ଯାହା ପରେ ହିଜବୁଲ୍ ମୁଖ୍ୟ ଲେବାନନ୍ ଲୋକଙ୍କୁ ସମ୍ବୋଧିତ କରିଥିଲେ । ହିଜବୁଲ ମୁଖ୍ୟଙ୍କ ଭାଷଣ ସମାପ୍ତ ହେବା ମାତ୍ରେ ଇସ୍ରାଏଲ ପୁଣିଥରେ ହିଜବୁଲ ସ୍ଥିତିକୁ ଟାର୍ଗେଟ କରି ଏୟାର ଷ୍ଟ୍ରାଇକ ଆରମ୍ଭ କରିଥିଲା ।