ନୂଆଦିଲ୍ଲୀ, ୦୨/୦୯: ଭାରତର ଯୁବ ଅଶ୍ୱାରୋହୀ ଚିରାଗ ଖଣ୍ଡାଲ ମାତ୍ର ୧୯ ବର୍ଷ ବୟସରେ ଅବସର ଘୋଷଣା କରିଛନ୍ତି । ଦେଶର ସର୍ବକନିଷ୍ଠ ଅଶ୍ୱ ଚାଳକ ଭାବେ ସେ ହାଙ୍ଗଝୌ ଏସୀୟ କ୍ରୀଡ଼ାକୁ ଯୋଗ୍ୟତା ହାସଲ କରିଥିଲେ । କିନ୍ତୁ ପରମୁହୂର୍ତ୍ତରେ ଭାରତୀୟ ସଂଘ (ଇଏଫ୍ଆଇ) ଯେତେବେଳେ ଆଇଓଏ(ଭାରତୀୟ ଅଲିମ୍ପିକ୍ସ ସଂଘ)କୁ ଚୂଡ଼ାନ୍ତ ତାଲିକା ପଠାଇଥିଲା, ସେତେବେଳେ ଚିରାଗଙ୍କ ନାମ ନଥିଲା । ଚିରାଗଙ୍କ ପରିବାର ଏ ନେଇ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ସୁପ୍ରିମକୋର୍ଟ ମଧ୍ୟ ତାଙ୍କୁ ଦଳରେ ସାମିଲ କରିବା ନେଇ ନିର୍ଦ୍ଦେଶ ଦେଇଥିଲେ ।
ମେ’ ମାସ ୨୦ ତାରିଖ ଚୂଡ଼ାନ୍ତ ତାଲିକା ପଠାଇବାର ଶେଷ ଦିନ ଥିଲା । ସେଦିନ ରାତିରେ ଇଏଫ୍ଆଇ ପକ୍ଷରୁ ଏକ ଇ-ମେଲ ଚିରାଗଙ୍କ ପାଖକୁ କରାଯାଇଥିଲା ଏବଂ କୁହାଯାଇଥିଲା ଯେ ତୁମର ଘୋଡ଼ା ଅନ୍ୟ ଜଣଙ୍କୁ ଦିଆଯାଇଛି । ସମୟ ନଥିବାରୁ ଚିରାଗ ଅନ୍ୟ ଘୋଡ଼ା ପାଇ ନଥିଲେ । ବାସ୍, ଏହାପରେ ତାଙ୍କର ଏସୀୟ କ୍ରୀଡ଼ାରେ ଭାଗ ନେବାର ସବୁ ସ୍ୱପ୍ନ ଧୂଳିସାତ ହୋଇଥିଲା ।
ଚିରାଗ କହିଛନ୍ତି, ‘ଖେଳରୁ ଅବସର ଛଡ଼ା ମୋ ପାଖରେ ଆଉ କୌଣସି ବିକଳ୍ପ ନାହିଁ। ଆଉ ଫେରିବାକୁ ବି ଚାହୁଁନି । ଏ କ୍ରୀଡ଼ା ବହୁ ବ୍ୟୟ ବହୁଳ । ଏସୀୟ କ୍ରୀଡ଼ା ପାଇଁ ମୋ ବାପା, ମାଆ ୨ କୋଟିରୁ ଊଦ୍ଧ୍ୱର୍ ଖର୍ଚ୍ଚ କରିଥିଲେ। ଆଉ ଆମ ପାଖରେ ଟଙ୍କା ନାହିଁ । ଆମେ ଆମର ଘରୋଇ ସହର ଜୟପୁରକୁ ଫେରିଯାଉଛୁ । ଜାତୀୟ ସଂଘକୁ ଭାରତୀୟ ସେନା ସଂପୂର୍ଣ୍ଣ ନିୟନ୍ତ୍ରଣ କରୁଛି, ଆଉ ସେମାନେ ହିଁ ମୋର କ୍ୟାରିୟର ଶେଷ କରିଦେଲେ। ଏତେସବୁ ଘଟଣା ଘଟିବା ପରେ ମୁଁ ଆଉ ଅଲିମ୍ପିକ୍ସ କଥା ଭାବି ପାରୁ ନାହିଁ । ମୋ କ୍ୟାରିୟର ଶେଷ ହୋଇଗଲା। ଇଏଫ୍ଆଇ ହିଁ ମୋର କ୍ୟାରିୟର ନଷ୍ଟ କରିଦେଲା ।’