ନୂଆଦିଲ୍ଲୀ: ଭାରତର ମହିଳା ତୀରନ୍ଦାଜି ଦଳ ପ୍ୟାରିସ ଅଲିମ୍ପିକ୍ସର ରାଙ୍କିଙ୍ଗ ରାଉଣ୍ଡରେ ଦମଦାର ପ୍ରଦର୍ଶନ କରିଛନ୍ତି । ଦୀପିକା କୁମାରୀ, ଅଙ୍କିତା ଭଗତ ଓ ଭଜନ କୌର ତିନି ଜଣ ମିଶି ଭାରତକୁ ୧୯୮୩ ଅଙ୍କ ଦେଇଛନ୍ତି । ଭାରତୀୟ ଦଳ ଚତୁର୍ଥ ସ୍ଥାନରେ ରହି କ୍ଵାର୍ଟର ଫାଇନାଲ୍ରେ ନିଜର ସ୍ଥାନ ସୁନିଶ୍ଚିତ କରିଛି । ବ୍ୟକ୍ତିଗତ ସ୍କୋର ଉପରେ ନଜର ପକାଇଲେ ଦଳ ପକ୍ଷରୁ ସବୁଠୁ ଭଲ ପ୍ରଦର୍ଶନ ଅଙ୍କିତା ଭଗତ କରିଛନ୍ତି । ସେ ୭୨ ସଟ୍ ଲଗାଇ ମୋଟ୍ ୬୬୬ ପଏଣ୍ଟ ହାସଲ କରିଛନ୍ତି ଏବଂ ୧୧ତମ ସ୍ଥାନରେ ରହିଛନ୍ତି ।
ଦୀପିକା କୁମାରୀ ୨୩ତମ ଓ ଭଜନ କୌର ୨୨ତମ ସ୍ଥାନରେ ରହି ଟପ୍-୨୦ରୁ ବାହାରେ ରହିଛନ୍ତି । ଅଙ୍କିତା ଦ୍ଵିତୀୟାର୍ଦ୍ଧର ଶେଷ ୨ଟି ସେଟ୍ରେ ଦମଦାର ପ୍ରତ୍ୟାବର୍ତ୍ତନ କରି ୧୨୦ ଓ ୧୧୨ ପଏଣ୍ଟ ହାସଲ କରିଛନ୍ତି । ଅନ୍ୟପଟେ ଶେଷ ମୁହୂର୍ତ୍ତରେ ୧୮ ବର୍ଷୀୟ ଭଜନ କୌରଙ୍କ ପକ୍ଷରୁ ଅତ୍ୟନ୍ତ ନିରାଶଜନକ ପ୍ରଦର୍ଶନ ଦେଖିବାକୁ ମିଳିଥିଲା । ସେ ମୋଟ୍ ୬୫୯ ପଏଣ୍ଟ ହାସଲ କରି ପାରିଛନ୍ତି । ଦୀପିକା ତାଙ୍କଠୁ ଗୋଟିଏ ପଏଣ୍ଟ ପଛରେ ରହି ରାଙ୍କିଙ୍ଗ ରାଉଣ୍ଡରେ ୬୫୮ ପଏଣ୍ଟ ପାଇଛନ୍ତି ।
ନିୟମ ଅନୁସାରେ ଟପ୍-୪ରେ ରହୁଥିବା ଦଳ ସିଧାସଳଖ କ୍ଵାର୍ଟର ଫାଇନାଲ୍ରେ ପ୍ରବେଶ କରିବ । ଭାରତ ୧୯୮୩ ପଏଣ୍ଟ ସହ ଚତୁର୍ଥ ସ୍ଥାନରେ ରହି ସିଧାସଳଖ କ୍ଵାର୍ଟର ଫାଇନାଲ୍ରେ ପ୍ରବେଶ କରିଛି । ଭାରତ ଏବେ କ୍ଵାର୍ଟର ଫାଇନାଲ୍ରେ ଫ୍ରାନ୍ସ ବନାମ ନେଦରଲାଣ୍ଡ ମ୍ୟାଚ୍ର ବିଜେତା ସହ ଖେଳିବ । ଅନ୍ୟପଟେ ପଞ୍ଚମରୁ ୧୨ ତମ ସ୍ଥାନ ମଧ୍ୟରେ ରହିଥିବା ଦଳଗୁଡ଼ିକ ରାଉଣ୍ଡ ଅଫ୍ ୧୬ ଦେଇ ଗତି କରିବାକୁ ପଡ଼ିବ ।
