ନୂଆଦିଲ୍ଲୀ,୧୪/୦୪: ଯୁଦ୍ଧ ଏବେ ହାଇବ୍ରିଡ ଓ ମାନବ ବିହୀନ ଅସ୍ତ୍ରରେ ଲଢ଼ାଯାଉଛି । ଏଭଳି ଯୁଦ୍ଧକୁ ରୋକିବା ସବୁଠାରୁ ମହଙ୍ଗା ସାବ୍ୟସ୍ତ ହୋଇପଡିଛି । କାରଣ କିଛି ଲକ୍ଷ ଟଙ୍କାରେ ନିର୍ମିତ ଲଢୁଆ ଡ୍ରୋନକୁ ରୋକିବା ଲାଗି କୋଟି କୋଟି ଟଙ୍କାର ଏୟାର ଡିଫେନ୍ସ ସିଷ୍ଟମ ବ୍ୟବହାର ହେଉଛି । ଭାରତ ଏହି ଆହ୍ୱାନର ମୁକାବିଲା କରିବା ପାଇଁ ଲେଜର ଅଧାରିତ ଡାଇରେକ୍ଟ ଏନର୍ଜି ୱିପନ ବିକଶିତ କରିଛି । ରବିବାର ଏହି ୱିପନର ସଫଳ ପରୀକ୍ଷଣ ମଧ୍ୟ କରାଯାଇଛି । ଫଳରେ ଏଭଳି ଅସ୍ତ୍ର ବିକଶିତ କରିବାରେ ଆମେରିକା, ରୁଷ ଓ ଚୀନ୍ ସହ ଏଲିଟ କ୍ଲବରେ ଭାରତ ସାମିଲ ହୋଇଛି ।
ଆନ୍ଧ୍ରପ୍ରଦେଶର କୁର୍ନୁଲ ଠାରେ ଡିଆରଡିଓ (ପ୍ରତିରକ୍ଷା ଗବେଷଣା ଓ ଉନ୍ନୟନ ସଙ୍ଗଠନ) ପକ୍ଷରୁ ୩୦ କିଲୋୱାଟ ଲେଜର ଆଧାରିତ ୱିପନ ପରୀକ୍ଷଣ କରାଯାଇଛି । ଏହି ଉଚ୍ଚ କ୍ଷମତାସମ୍ପନ୍ନ ଲେଜର ବିମ୍ଡ ୱିପନ ମାଧ୍ୟମରେ ଆକାଶ ମାର୍ଗରେ ଆସୁଥିବା ଏକ ଡେମୋ ଡ୍ରୋନକୁ ଧ୍ୱଂସ କରିଦିଆଯାଇଛି । ଏହାର ନାମ ରଖାଯାଇଛି ଡାଇରେକ୍ଟ ଏନର୍ଜି ୱିପନ (ଡିଇଡବ୍ଲ୍ୟୁ) ଏମକେ-୨ (ଏ) । ପରୀକ୍ଷଣ ବେଳେ ଡିଆରଡିଓ ଅଧ୍ୟକ୍ଷ ସମୀର ବି. କାମାଥ ଓ ଅନ୍ୟ ବରିଷ୍ଠ ବୈଜ୍ଞାନିକମାନେ ଉପସ୍ଥିତ ଥିଲେ । ଏହି ଅବସରରେ କାମାଥ କହିଛନ୍ତି ଯେ ଏହା କେବଳ ଆରମ୍ଭ ମାତ୍ର । ଆଗକୁ ଡିଆରଡିଓର ବୈଜ୍ଞାନିକମାନେ ହାଇ ଏନର୍ଜି ମାଇକ୍ରୋୱେଭ, ଇଲେକ୍ଟ୍ରୋମ୍ୟାଗ୍ନେଟିକ ପଲ୍ସ ଟେକ୍ନୋଲୋଜି ଭଳି ହାଇ ଏନର୍ଜି ସିଷ୍ଟମ ଆଧାରିତ ୱିପନ ମଧ୍ୟ ବିକଶିତ କରିବେ । ବର୍ତ୍ତମାନ ଏହା ଉପରେ କାମ ଜାରି ରହିଛି । ଡିଆରଡିଓ ଏବେ ୩୦୦ କିଲୋୱାଟ ଡିଇଡବ୍ଲ୍ୟୁ ବିକଶିତ କରିବାରେ ଲାଗିଛି । ଏହାର ନାମ ସୂର୍ଯ୍ୟ ରଖାଯାଇଛି । ଏହାର ଲକ୍ଷ୍ୟଭେଦ କ୍ଷମତା ୨୦ କିଲୋମିଟର ହେବ । ଏହା ବିମାନ, ମିସାଇଲ ଓ ଡ୍ରୋନ ଭଳି ହାଇସ୍ପିଡ୍ ଟାର୍ଗେଟକୁ ଧ୍ୱଂସ କରିବାରେ ସକ୍ଷମ ହେବ ।
ଡିଇଡବ୍ଲ୍ୟୁକୁ ଡିଆରଡିଓର ହାଇଦ୍ରାବାଦସ୍ଥିତ ସେଣ୍ଟର ଫର ହାଇ ଏନର୍ଜି ସିଷ୍ଟମ ଆଣ୍ଡ ସାଇନ୍ସ ଲ୍ୟାବରେ ବିକଶିତ କରାଯାଇଛି । ଏହା ଏକ ୩୦ କିଲୋୱାଟ ଲେଜର ଆଧାରିତ ୱିପନ ସିଷ୍ଟମ । ଏହା ୫ କିଲୋମିଟର ଦୂରରୁ ଆସୁଥିବା କୌଣସି ବିମାନ, ହେଲିକପ୍ଟର, ମିସାଇଲ କିମ୍ବା ଡ୍ରୋନକୁ ଟାର୍ଗେଟ କରି ଧ୍ୱଂସ କରିପାରିବ । ଏହି ସିଷ୍ଟମ ୩୬୦ ଡିଗ୍ରୀ ଇଲେକ୍ଟ୍ରୋ ଅପଟିକାଲ ଇନଫ୍ରାରେଡ ସେନ୍ସର ସହ ସଜ୍ଜିତ। ଏହା ଶତ୍ରୁର ଫିକ୍ସଡ ୱିଙ୍ଗ ଡ୍ରୋନ, ସର୍ଭେଲାନ୍ସ ସେନ୍ସର ଓ ଆଣ୍ଟିନାକୁ ସହଜରେ ଧ୍ୱଂସ କରିପାରିବ । ରାଡାରରେ ଟାର୍ଗେଟ ଠାବ କରାଯିବା ପରେ ଲେଜର ଡିଇଡବ୍ଲ୍ୟୁ ବିଦ୍ୟୁତ ବେଗରେ ଟାର୍ଗେଟକୁ ଲକ୍ଷ୍ୟଭେଦ କରିପାରିବ । ଖର୍ଚ୍ଚ ଦୃଷ୍ଟିରେ ଦେଖିଲେ ଏହା ବେଶ୍ ଲାଭଦାୟକ । ଗୋଟିଏ ଟାର୍ଗେଟକୁ ଧ୍ୱଂସ କରିବା ଲାଗି ଅଳ୍ପ କିଛି ଲିଟର ପେଟ୍ରୋଲର ଦାମ ଲାଗିବ । ଆହୁରି ଏକ ବଡକଥା ହେଉଛି ଏହି ୱିପନ ସିଷ୍ଟମକୁ ରେଳ, ସଡକ କିମ୍ବା ଆକାଶ ପଥରେ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ସହଜରେ ନେଇ ହେବ ।
ଇତିମଧ୍ୟରେ ଭାରତୀୟ ସେନା ଓ ବାୟୁସେନା ଡ୍ରୋନ ବିଧ୍ୱଂସୀ ସିଷ୍ଟମ କ୍ରୟ କରିବାକୁ ପ୍ରୟାସ ଆରମ୍ଭ କରିଛି । ଆତ୍ମନିର୍ଭର ଭାରତ ଓ ମେକ୍ ଇନ୍ ଇଣ୍ଡିଆ ଅଭିଯାନ ଅଧୀନରେ ସ୍ୱଦେଶୀ କମ୍ପାନି ଠାରୁ ଏହା କିଣାଯିବ । ଏଥିପାଇଁ ଆରଏଫଆଇ ଅର୍ଥାତ ରିକ୍ୱେଷ୍ଟ ଫର ଇନ୍ଫର୍ମେସନ ମଧ୍ୟ ଜାରି କରାଯାଇଛି । ଭାରତ ତାର ଆବଶ୍ୟକତା ଅନୁସାରେ ସମସ୍ତ ତଥ୍ୟ ସ୍ୱଦେଶୀ କମ୍ପାନି ନିକଟରେ ରଖିଛି । ସିଷ୍ଟମ ଏଭଳି ହେବା ଦରକାର ଯାହାକି ଶତ୍ରୁପକ୍ଷର ଡ୍ରୋନକୁ ସହଜରେ ଚିହ୍ନଟ କରିବା ସହ ତାକୁ ଠାବ କରି ଧ୍ୱଂସ କରିପାରିବ । ଏଥିରେ ଫେଜ୍ଡ ଏରୋ ରାଡାର, ଆରଏଫ ସେନ୍ସର, ଇଲେକ୍ଟ୍ରୋ ଅପ୍ଟିକାଲ ଓ ଇନ୍ଫ୍ରାରେଡ୍ ସିଷ୍ଟମ ଭଳି ଡ୍ରୋନ ନିରୋଧୀ ସେନ୍ସର ରହିବା ଆବଶ୍ୟକ । ଶତ୍ରୁପକ୍ଷର ଡ୍ରୋନକୁ ଧ୍ୱଂସ କରିବା କିମ୍ବା ଖସାଇବା ଭଳି ସଫ୍ଟ ଓ ହାର୍ଡ କିଲ୍ ଉଭୟ ବିକଳ୍ପ ଉପରେ ବୈଜ୍ଞାନିକମାନେ ଗବେଷଣା ଚଳାଇଛନ୍ତି । ତେବେ ହାର୍ଡ କିଲ୍ ବିକଳ୍ପ ଲାଗି ଲେଜର ଆଧାରିତ ଡିଇଡବ୍ଲ୍ୟୁର ବିକାଶ ଏବେ ହୋଇପାରିଛି ।
