ନୂଆଦିଲ୍ଲୀ, ୨୭/୪: ଚଳିତ ଆଇପିଏଲ୍ର ୪୬ତମ ଲିଗ୍ ମୁକାବିଲାର ଦିଲ୍ଲୀ କ୍ୟାପିଟାଲ୍ସ ଘରୋଇ ଗ୍ରାଉଣ୍ଡ୍ରେ ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁକୁ ଭେଟିବ । ଘରୋଇ ସମର୍ଥକଙ୍କ ଗହଣରେ ବିଜୟ ଜାରି ରଖି କ୍ୟାପିଟାଲ୍ସ ପୂନର୍ବାର ପଏଣ୍ଟ ତାଲିକାର ଶୀର୍ଷକୁ ଉଠିବାକୁ ଲକ୍ଷ୍ୟ ରଖିଛି । ଠିକ ସେହିପରି ରୟାଲ୍ ଚ୍ୟାଲେଞ୍ଜର୍ସ ବିଜୟ ସହ ପ୍ରତିଶୋଧ ନେବାକୁ ଚେଷ୍ଠା କରିବ । ପରୋକ୍ଷ ଭାବରେ ଦେଖିବାକୁ ଗଲେ ଏହି ମ୍ୟାଚ୍ ଜରିଆରେ ଦୁଇ ଷ୍ଟାର୍ ଖେଳାଳି ବିରାଟ କୋହଲି ଓ କେଏଲ ରାହୁଲଙ୍କ ମଧ୍ୟରେ ଏକ ଅଘୋଷିତ ଲଢେଇ ହେବ ।
ଗତ ୧୦ ତାରିଖରେ ଉଭୟ ଦଳ ମଧ୍ୟରେ ପ୍ରଥମ ମୁକାବିଲା ଖେଳାଯାଇଥିଲା । ରୟାଲ୍ ଚ୍ୟାଲେଞ୍ଜର୍ସର ଘରୋଇ ଗ୍ରାଉଣ୍ଡ ଚିନ୍ନାସ୍ୱାମୀ ଷ୍ଟାଡ଼ିୟମ୍ରେ ଅନୁଷ୍ଠିତ ଉକ୍ତ ମ୍ୟାଚ୍ରେ ଦିଲ୍ଲୀ କ୍ୟାପିଟାଲ୍ସ ୬ ୱିକେଟ୍ରେ ବିଜୟ ହାସଲ କରିଥିଲା । ରାହୁଲ ଅପରାଜିତ ୯୩ ରନ୍ର ମ୍ୟାଚ୍ ବିଜୟୀ ଇନିଂସ ଖେଳିଥିଲେ । ତାଙ୍କ ସେଲିବ୍ରେସନ ମଧ୍ୟ ରୁକ୍ଷ ରହିଥିଲା । ଏହା ତାଙ୍କ ଘରୋଇ ଗ୍ରାଉଣ୍ଡ ବୋଲି ବ୍ୟାଟ୍ ଜରିଆରେ ସେ ଦର୍ଶକଙ୍କୁ ସଂକେତ ଦେଇଥିଲେ । ସତ କହିବାକୁ ଗଲେ ରାହୁଲ ଏହି ଗ୍ରାଉଣ୍ଡରେ ବିଭିନ୍ନ ବୟସ ବର୍ଗ କ୍ରିକେଟ୍ ଖେଳି ବଡ ହୋଇଛନ୍ତି । ଆସନ୍ତା କାଲି କୋଟଲା ଗ୍ରାଉଣ୍ଡ୍ରେ ମ୍ୟାଚ୍ ଖେଳାଯିବ । ଏହା କୋହଲିଙ୍କ ଘରୋଇ ଗ୍ରାଉଣ୍ଡ୍ । କୋହଲି ଏହି ଗ୍ରାଉଣ୍ଡ୍ରେ ଦିଲ୍ଲୀ ପକ୍ଷରୁ ବିଭିନ୍ନ ବୟସ ବର୍ଗ କ୍ରିକେଟ୍ ଖେଳି ବଡ଼ ହୋଇଛନ୍ତି । ତେଣଉ କ୍ରିକେଟ୍ ପ୍ରେମୀଙ୍କ ନଜର କୋହଲିଙ୍କ ଉପରେ ରହିବା ନିଶ୍ଚିତ ।
ପୂର୍ବ ରେକର୍ଡ ରୟାଲ୍ ଚ୍ୟାଲେଞ୍ଜର୍ସ ପକ୍ଷରେ ରହିଥିଲେ ହେଁ ବର୍ତ୍ତମାନର ଫର୍ମକୁ ଦେଖିଲେ ଦିଲ୍ଲୀ କ୍ୟାପିଟାଲ୍ସର ପଲା ଭାରି ରହିବ । ଉଭୟ ଦଳ ମଧ୍ୟରେ ମୋଟ୍ ୩୨ଟି ମ୍ୟାଚ୍ ଖେଳାଯାଇଛି । ଏଥିରୁ ରୟାଲ୍ ଚ୍ୟାଲେଞ୍ଜର୍ସ ୧୯ଟି ମ୍ୟାଚ୍ ଜିତିଛି । ଦିଲ୍ଲୀ କ୍ୟାପିଟାଲ୍ସ ୧୨ଟି ମ୍ୟାଚ୍ରେ ବିଜୟୀ ହୋଇଛି ଓ ଗୋଟିଏ ମ୍ୟାଚ୍ ବିନା ଫଳାଫଳରେ ଶେଷ ହୋଇଛି । ରୟାଲ୍ ଚ୍ୟାଲେଞ୍ଜର୍ସ ମଧ୍ୟ ଇତି ମଧ୍ୟରେ ବାହାର ଗ୍ରାଉଣ୍ଡ୍ରେ ଖେଳିଥିବା ୫ଟି ଯାକ ମ୍ୟାଚ୍ରେ ବିଜୟୀ ହୋଇଛି ।
କୋଟଲା ଗ୍ରାଉଣ୍ଡରେ କୋହଲିଙ୍କ ପ୍ରଦର୍ଶନ ସର୍ବଦା ଉନ୍ନତ ରହିଛି । ଏହି ଗ୍ରାଉଣ୍ଡ୍ରେ ସେ ୧୦ଟି ଆଇପିଏଲ୍ ମ୍ୟାଚ୍ ଖେଳି ୬୯ହାର ଓ ୧୪୫.୫ ଷ୍ଟ୍ରାଇକ ରେଟ୍ରେ ୪୮୩ ରନ ସଂଗ୍ରହ କରିଛନ୍ତି । ରାହୁଲ ମଧ୍ୟ ଚଳିତ ସିଜନରେ ଟି-ଟ୍ୱେଣ୍ଟି ଫର୍ମ ଫେରି ପାଇଛନ୍ତି । ପୂର୍ବ ବର୍ଷ ତୁଳନାରେ ସେ ଅଧିକ ଆକ୍ରମଣାତ୍ମକ ସଟ୍ ଖେଳୁଛନ୍ତି ଓ କ୍ରିଜ୍ରେ ଜମି ରହି ବଡ଼ ଇନିଂସ ଖେଳିବାରେ ଗୁରୁତ୍ୱ ଦେଉଛନ୍ତି । ସେ ଇତି ମଧ୍ୟରେ ୧୫୩.୮୦ ଷ୍ଟ୍ରାଇକ ରେଟ୍ରେ ୩୨୩ ରନ ସଂଗ୍ରହ କରିସାରିଛନ୍ତି ।
ଦିଲ୍ଲୀ କ୍ୟାପିଟାଲ୍ସର ବ୍ୟାଟିଂ ବିଭାଗ ବେଶ୍ ସନ୍ତୁଳିତ ଓ ସମସ୍ତ ପ୍ରମୁଖ ବ୍ୟାଟର ଫର୍ମରେ ରହିଛନ୍ତି । ଆହତ ହୋଇ କିଛି ମ୍ୟାଚ୍ ଖେଳିପାରିନଥିବା ଫାଫ ଡୁ ପ୍ଲେସି ମଧ୍ୟ ଫିଟ୍ ଘୋଷିତ ହୋଇଛନ୍ତି ଓ ଆଜି ଖେଳିବାର ଯଥେଷ୍ଟ ସମ୍ଭାବନା ରହିଛି । ରୟାଲ ଚ୍ୟାଲେଞ୍ଜର୍ସ ଏକାଦଶ ଅପରିବର୍ତ୍ତିତ ରହିବା ଏକ ପ୍ରକାର ନିଶ୍ଚିତ ।
କୋହଲି-ରାହୁଲଙ୍କ ବ୍ୟତୀତ ଆଜି ମିଚେଲ ଷ୍ଟାର୍କ ଓ ଜୋସ ହାଜେଲଉଡ୍ଙ୍କ ମଧ୍ୟରେ ଏକ ପ୍ରତିଦ୍ୱନ୍ଦ୍ୱିତା ଦେଖିବାକୁ ମିଳିବ । ଉଭୟ ଅଷ୍ଟ୍ରେଲୀୟ ପେସ୍ ବୋଲର ନିଜ ନିଜ ଦଳର ବିଜୟରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛନ୍ତି । ଉଭୟ ଦଳର ସ୍ପିନର କୁଲଦୀପ ଯାଦବ ଓ କୃନାଲ୍ ପାଣ୍ଡ୍ୟାଙ୍କ ଉପରେ ନଜର ରହିବ । ଉଭୟ ମଧ୍ୟ ଓଭରଗୁଡିକରେ ଶୃଙ୍ଖଳିତ ବୋଲିଂ କରି ପ୍ରତିପକ୍ଷ ବ୍ୟାଟରଙ୍କୁ ବାନ୍ଧି ରଖିବାରେ ସଫଲ ହୋଇଛନ୍ତି । ଉଭୟ ଇତି ମଧ୍ୟରେ ୧୨ଟି ଲେଖାଏଁ ୱିକେଟ୍ ନେଇ ସାରିଛନ୍ତି ।
ଗତ ସିଜନ ତୁଳନାରେ ଏଥର କୋଟଲା ଗ୍ରାଉଣ୍ଡ୍ର ପିଚ୍ ସାମାନ୍ୟ ମନ୍ଥର ରହିଛି । ତଥାପି ବ୍ୟାଟରଙ୍କୁ ବେଶ୍ ସହାୟତା କରୁଛି ପିଚ୍ । ଦ୍ୱିତୀୟ ଭାଗରେ କାକର ଯୋଗୁଁ ବ୍ୟାଟିଂ ସହଜ ହେବ । ତେଣୁ ପ୍ରଥମେ ବ୍ୟାଟିଂ କରୁଥିବା ଦଳ ବିଶାଳ ସ୍କୋର ଉପରେ ଗୁରୁତ୍ୱ ଦେବ । ସ୍ପିନରମାନେ ପ୍ରଥମ ଭାଗରେ ପିଚ୍ର ଫାଇଦା ଉଠାଇ ପାରିବେ । ଏଠାରେ ଖେଳାଯାଇଥିବା ୨ଟି ମ୍ୟାଚ୍ରେ ସ୍ପିନରମାନେ ୧୩ଟି ୱିକେଟ୍ ନେଇଛନ୍ତି ।
ସମ୍ଭାବ୍ୟ ଦ୍ବାଦଶ
ଦିଲ୍ଲୀ କ୍ୟାପିଟାଲ୍ସ :- ଅଭିଷେକ ପୋରେଲ, ଫାଫ ଡୁ ପ୍ଲେସି, କରୁଣ ନାଏର, କେଏଲ ରାହୁଲ, ଅକ୍ଷର ପଟେଲ (ଅଧିନାୟକ), ଟ୍ରିଷ୍ଟନ ଷ୍ଟବ୍ସ, ଆଶୁତୋଷ ଶର୍ମା, ବିପ୍ରଜ ନିଗମ, ମିଚେଲ ଷ୍ଟାର୍କ, କୁଲଦୀପ ଯାଦବ, ମୁକେଶ କୁମାର, ଦୁଷ୍ମନ୍ତ ଚାମିରା ।
ରୟାଲ୍ ଚ୍ୟାଲେଞ୍ଜର୍ସ:- ବିରାଟ କୋହଲି, ଫିଲ ସଲ୍ଟ, ଦେବଦତ୍ତ ପାଡ଼ିକଲ, ରଜତ ପାତିଦାର(ଅଧିନାୟକ), ଜିତେଶ ଶର୍ମା, ରୋମାରିଓ ସେପର୍ଡ, ଟିମ ଡେଭିଡ୍, କୃନାଲ ପାଣ୍ଡ୍ୟା, ଭୁବନେଶ୍ୱର କୁମାର, ଜୋସ ହାଜେଲଉଡ୍, ୟଶ ଦୟାଲ, ସୂୟାଶ ଶର୍ମା ।
