କଟକ, ୦୪/୦୨: ଆସନ୍ତା ୯ ତାରିଖ ରବିବାର ବାରବାଟୀ ଷ୍ଟାଡିୟମ୍ରେ ହେବାକୁ ଥିବା ଭାରତ ଇଂଲଣ୍ଡ୍ ଏକଦିବସୀୟ କ୍ରିକେଟ୍ ମ୍ୟାଚ୍ ପାଇଁ ୫ ତାରିଖରୁ ଟିକଟ୍ ବିକ୍ରି ଆରମ୍ଭ ହେବ । ବୁଧବାର ସକାଳ ପ୍ରାୟ ୯ ଟାରୁ ଟିକେଟ୍ ବିକ୍ରି ହେବ । ଏନେଇ ପୁଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ।
ଆଶାୟୀ ଦର୍ଶକମାନେ ମଙ୍ଗଳବାର ରାତିରୁ ଆସି ଷ୍ଟାଡିୟମ୍ ପାଖରେ ଭିଡ଼ ଲଗାଇବେ ବୋଲି ପୁଲିସ ଆଶଙ୍କା କରୁଛି । ତେଣୁ ମଙ୍ଗଳବାର ରାତି ପ୍ରାୟ ୯ଟାଠାରୁ ଫୋର୍ସ ମୁତୟନ କରାଯିବ । ରାତିରୁ ପ୍ରାୟ ୯ ପ୍ଲାଟୁନ୍ ଫୋର୍ସ ଷ୍ଟାଡିୟମ୍ ପାଖରେ ରହିବେ । ରାତିରୁ ଲାଇନ୍ ଲଗାଇବାକୁ ପୁଲିସ ବାରଣ କରିଛି । ତେଣୁ ସକାଳ ପର୍ଯ୍ୟନ୍ତ କାଉଣ୍ଟର ପାଇଁ ତିଆରି ହୋଇଥିବା ବ୍ୟାରିକେଡ୍ ପାଖକୁ ଦର୍ଶକଙ୍କୁ ଛଡ଼ାଯିବନି। ରହିଥିବା ଫୋର୍ସ ରାତି ତମାମ୍ କାଉଣ୍ଟର ପାଖରେ ପଇଁତରା ମାରିବେ । ଏମିତିକି ସେଠାରେ ଆଇନଶୃଙ୍ଖଳା ପରିସ୍ଥିତି ଉପୁଜିବା ନେଇ ଆଶଙ୍କା ଥିବାରୁ ପ୍ରାୟ ୨୦ ଜଣ ଅଫିସର ଓ ଜଣେ ଏସିପି ମଧ୍ୟ ସୁରକ୍ଷା ତଦାରଖ କରିବେ । ତେବେ ସକାଳ ହେବା ପରେ ଆଉ ବାକି ୧୯ ପ୍ଲାଟୁନ୍ ଫୋର୍ସଙ୍କୁ ଦାୟିତ୍ୱ ଦିଆଯିବ ।
ସକାଳ ପ୍ରାୟ ୬ଟାରୁ ଦିନ ୨ଟା ୧୦ ପ୍ଳାଟୁନ୍ ଓ ପରେ ଦିନ ୨ରୁ ଟିକଟ୍ କାଉଣ୍ଟର ବନ୍ଦ ହେବା ପର୍ଯ୍ୟନ୍ତ ଡ୍ୟୁଟି କରିବେ । ପ୍ରାୟ ଗୋଟିଏ ପ୍ଲାଟୁନ୍ ମହିଳା ଏପିଆର୍ ପୁଲିସ ମଧ୍ୟ ଡ୍ୟୁଟି କରିବେ । ତେବେ ଦିନ ସମୟରେ ପ୍ରାୟ ୮୦ ଜଣ ଅଫିସର, ୫ରୁ ଅଧିକ ଏସିପି, ୨ ଜଣ ଏଡିସିପି ସୁରକ୍ଷା ଦାୟିତ୍ୱ ତଦାରଖ କରିବେ । ଶାନ୍ତି ଶୃଙ୍ଖଳାର ସହିତ ଟିକଟ୍ ବିକ୍ରି କରିବା ପାଇଁ ପୁଲିସ ପକ୍ଷରୁ ସବୁପ୍ରକାର ଉଦ୍ୟମ ହେଉଥିବା ସୂଚନା ଦିଆଯାଇଛି । ତେବେ ସେଠାରେ କେହି ଟିକଟ୍ ପାଇଁ ଗଣ୍ଡଗୋଳ କଲେ କିମ୍ବା ଟିକଟ୍ ଆଣି ବ୍ଲାକ୍ କରାଇଲେ ତାଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ଡିସିପି ନିର୍ଦ୍ଦେଶ ଦେଇଛନ୍ତି । ତେବେ ଗୁରୁବାର ଦିନ ମଧ୍ୟ କାଉଣ୍ଟର ଖୋଲିବ ବୋଲି ସୂଚନା ମିଳିଛି । ବୁଧବାର ବଳକା ରହିଥିବା ଟିକଟ୍କୁ ଗୁରୁବାର ଦିନ ବିକ୍ରି କରାଯିବ । ତେଣୁ ସେଦିନର ଗହଳି ଦେଖି ସୁରକ୍ଷା ବ୍ୟବସ୍ଥା ଗ୍ରହଣ କରାଯିବ ବୋଲି ପୁଲିସ ପକ୍ଷରୁ ସୂଚନା ଦିଆଯାଇଛି ।
