ନୂଆଦିଲ୍ଲୀ ୦୪/୦୨: ଦିଲ୍ଲୀ ବିଧାନସଭା ନିର୍ବାଚନ ଲାଗି ସୋମବାର ସନ୍ଧ୍ୟାରେ ପ୍ରଚାର ଶେଷ ହୋଇଛି । ପ୍ରଚାରର ଶେଷ ଦିନରେ ସବୁ ରାଜନୈତିକ ଦଳ ପକ୍ଷରୁ ମତଦାତାଙ୍କ ମନ ଜିଣିବାକୁ ଜୋରଦାର ପ୍ରଚାର କରାଯାଇଥିଲା । ବିଜେପି ପକ୍ଷରୁ ୨୨ଟି ରୋଡ୍ ଶୋ’ ଓ ରାଲି କରାଯାଇଥିବାବେଳେ ଆପ୍-କଂଗ୍ରେସ ମଧ୍ୟ ଅନେକଗୁଡିଏ ରାଲି, ରୋଡ୍ ଶୋ’ କରିଥିଲେ ।
ଆସନ୍ତା ୫ ତାରିଖରେ(ବୁଧବାର) ଗୋଟିଏ ପର୍ଯ୍ୟାୟରେ ରାଜ୍ୟର ସମସ୍ତ ୭୦ଟି ଆସନରେ ମତଦାନ ଅନୁଷ୍ଠିତ ହେବ । ୮ ତାରିଖରେ ଫଳାଫଳ ସାମ୍ନାକୁ ଆସିବ । ଦିଲ୍ଲୀରେ ଏଥରକ ୧.୫୬ କୋଟି ମତଦାତା ୧୩,୭୬୬ଟି ମତଦାନ କେନ୍ଦ୍ରରେ ସେମାନଙ୍କର ମତାଧିକାର ପ୍ରୟୋଗ କରିବେ । ସେମାନଙ୍କ ମଧ୍ୟରୁ ୮୩.୭୬ ଲକ୍ଷ ହେଉଛନ୍ତି ପୁରୁଷ, ୭୨.୩୬ ଲକ୍ଷ ହେଉଛନ୍ତି ମହିଳା । ୧୨୫୭ ଜଣ ତୃତୀୟ ଲିଙ୍ଗୀ ବି ସାମିଲ । ଦିବ୍ୟାଙ୍ଗମାନଙ୍କ ଲାଗି ୭୩୩ଟି ମତଦାନ କେନ୍ଦ୍ର ନିର୍ଦ୍ଧାରିତ କରାଯାଇଛି ।
ମୁସଲିମ ଭୋଟବ୍ୟାଙ୍କକୁ ନେଇ ଆପ୍-କଂଗ୍ରେସ ଭିତରେ ମତଭେଦ, ତ୍ରିକୋଣୀୟ ମୁକାବିଲାର ଫାଇଦା ଉଠାଇବ କି ବିଜେପି?
ଏଥର ଦିଲ୍ଲୀରେ ଆମ୍ ଆଦ୍ମୀ ପାର୍ଟି(ଆପ୍), ବିଜେପି ଓ କଂଗ୍ରେସ ମଧ୍ୟରେ ତ୍ରିମୁଖୀ ଲଢ଼େଇ ଦେଖିବାକୁ ମିଳିବ । ସେଥିମଧ୍ୟରୁ ଆପ୍ ଶେଷ ଦୁଇ ଥର ୨୦୧୫ ଓ ୨୦୨୦ରେ ବିଧାନସଭା ନିର୍ବାଚନ ଜିତିଥିଲା । ସୁଶାସନ ଓ ବିଭିନ୍ନ ଜନକଲ୍ୟାଣକାରୀ ଯୋଜନାର ଦ୍ୱାହି ଦେଇ ଦଳ ତୃତୀୟ ଥର ରାଜଧାନୀ ଦଖଲ କରିବାକୁ ଆଶାୟୀ ରହିଛି । ଆପ୍ ପୂର୍ବରୁ କଂଗ୍ରେସ ୧୫ ବର୍ଷ ଧରି ଦିଲ୍ଲୀରେ କ୍ଷମତାରେ ଥିଲା । ଦଳ ଏଥରକ ପୁଣି ଥରେ ଦିଲ୍ଲୀ ଦଖଲ କରିବା ଦାବି କରିଛି । ସେହିଭଳି ବିଜେପି ୨୫ ବର୍ଷ ହେଲା ଦିଲ୍ଲୀରେ କ୍ଷମତାରୁ ଦୂରେଇ ଥିବାବେଳେ ଏଥରକ କ୍ଷମତା ହାସଲ କରିବାକୁ ଆପ୍ରାଣ ଉଦ୍ୟମ କରୁଛି ।
