ଭୁବନେଶ୍ୱର, ୦୫/୦୨ : ମାଘ ମାସରୁ ହେଲାଣି ପ୍ରଚଣ୍ଡ ଖରା । ଗରମ ଏମିତି ବଢ଼ି ଚାଲିବ ବୋଲି ପାଣିପାଗ ବିଭାଗ ଆକଳନ କରିଛି । ସେଥିପାଇଁ ଶୀତବସ୍ତ୍ର ବଜାର ପୂରା ମାନ୍ଦା । ନଭେମ୍ବର ମାସ ଆରମ୍ଭରୁ ଭୁବନେଶ୍ୱରର ବିଭିନ୍ନ ଛକରେ ଶୀତବସ୍ତ୍ର ବିକ୍ରି ଆରମ୍ଭ ହୋଇଯାଏ । ବିଶେଷକରି ୟୁନିଟ୍-୧ ବଜାର, ରସୁଲଗଡ଼, ସହିଦନଗର, ବରଗଡ଼, ଉତ୍ତରାଛକ ଭଳ ଜନଗହଳିପୂର୍ଣ୍ଣ ସ୍ଥାନରେ ଦେଖିବାକୁ ମିଳେ । ଦୂରଦୂରାନ୍ତରରୁ ବେପାରୀମାନେ ଛୁଟି ଆସିଥାନ୍ତି ରାଜଧାନୀକୁ । ଭଳିକି ଭଳି ସୁଇଟର, ଶାଲ୍, କମ୍ବଳ, ଟୋପି, ଜ୍ୟାକେଟ୍ ଆଣିଥାନ୍ତି ।
ଚଳିତ ବର୍ଷ ମଧ୍ୟ ଶୀତବସ୍ତ୍ରର ବଜାର ପଡ଼ିଥିଲା । କିନ୍ତୁ ଦୋକାନୀଙ୍କୁ ଏବର୍ଷ ନିରାଶ କରିଛି ଶୀତ । ଶୀତ ନଥିବାରୁ ଶୀତବସ୍ତ୍ର ବିକ୍ରି ହେଲାନି । କେଉଁ ଦୋକାନୀ ୨୫ ଲକ୍ଷ ଟଙ୍କାର ତ କିଏ ୫୦ ଲକ୍ଷ ଟଙ୍କାର ଶୀତଲୁଗା ଆଣିଥିଲେ ବିକ୍ରି କରିବାକୁ । ୨୦ ପ୍ରତିଶତ ମଧ୍ୟ ବିକ୍ରି ହୋଇନାହିଁ ବୋଲି ଦୋକାନୀମାନେ କହିଛନ୍ତି । ବେପାର ନଥିବା ଯୋଗୁ ନିଜର ଖାଇବା ଖର୍ଚ୍ଚ ବି ଉଠୁନି । ଶୀତ କମିଯିବା ଯୋଗୁ ଆଉ ତିବ୍ଦତୀୟମାନେ ମଧ୍ୟ ରାଜଧାନୀକୁ ଉଲ୍ ସାମଗ୍ରୀ ଆଣି ଆସୁନାହାନ୍ତି । ତେଣୁ ଚଳିତ ବର୍ଷ ଓଡ଼ିଶାର କିଛି ବେପାରୀ, କୋଲକାତା ଓ ରାଜସ୍ଥାନର ବେପାରୀ ଶୀତବସ୍ତ୍ର ବଜାରରେ ଥିଲେ । ଆସନ୍ତା ୧୦ ତାରିଖ ପର୍ଯ୍ୟନ୍ତ ଶୀତବସ୍ତ୍ର ବଜାର ଖୋଲାରହିବ ବୋଲି ସେମାନେ କହୁଛନ୍ତି ।
ଏହି ଖବରଟିକୁ ପଢନ୍ତୁ-୨୧ ବର୍ଷରେ ପ୍ରଥମଥର ରାଜଧାନୀରେ ରେକର୍ଡ ତାତି, ପାଞ୍ଚ ଦିନ ଯାଏ କମିବନି ଦିନ ତାପମାତ୍ରା
ଶୀତବସ୍ତ୍ର ବେପାରୀ ସଞ୍ଜୟ କହିଛନ୍ତି ଯେ, ୫୦ ଲକ୍ଷ ଟଙ୍କାର ଶୀତବସ୍ତ୍ର ଆଣିଥିଲି। ସେଥିରୁ ମାତ୍ର ୧୫ ଲକ୍ଷ ଟଙ୍କାର ବିକ୍ରି ହୋଇଛି । କ’ଣ କରିବୁ । ଏହାକୁ ଆରବର୍ଷକୁ ରଖିଲେ ଖରାପ ହୋଇଯାଇପାରେ । ମୂଲ୍ୟ ବି କମିବାର ଆଶଙ୍କା ରହୁଛି । ମୁଖ୍ୟ କଥା ହେଲା ଶୀତ ନାହିଁ । ମାଘ ମାସରେ ଖରା ଆସିଲାଣି । ଏହା କେବଳ ସଞ୍ଜୟଙ୍କ ଦୁଃଖ ନହେଁ ଦୁଇପଇସା ଲାଭ ଆଶାରେ ଶୀତବସ୍ତ୍ର ବଜାରରେ ଷ୍ଟଲ ଖୋଲିଥିବା ସମସ୍ତ ବ୍ୟବସାୟୀଙ୍କ ସମାନ କଥା।
