ଭୁବନେଶ୍ୱର, ୪।୨: ମାଟ୍ରିମୋନିଆଲ ସାଇଟରେ ଖେଳିଲା ମାଷ୍ଟର ଷ୍ଟ୍ରୋକ । ସୋସିଆଲ ମିଡିଆରେ ଫେକ୍ ଡକ୍ୟୁମେଣ୍ଟ ଦେଇଥିଲେ । ନିଜକୁ ବାଚେଲର୍ର ପରିଚୟ ଦେଉଥିଲେ । ନିଜ ପ୍ରେମ ଜାଲରେ ଗୋଟିଏ ପରେ ଗୋଟିଏ ଯୁବତୀଙ୍କୁ ଫସାଉଥିଲେ । ଏଭଳି ସୁପର୍ ଫ୍ରଡ୍ ମାତିଛି ରାଜଧାନୀରେ । ଟାର୍ଗେଟ୍ରେ ମାଟ୍ରିମୋନି ସାଇଟରେ ଲଗଇନ୍ କରିଥିବା ଝିଅ । ଜଣଙ୍କ ସହିତ ସମ୍ପର୍କ ରଖି ଫସିବା ପରେ ସାମନାକୁ ଆସଲା ସତ । ଗିରଫ ଠକ ଜଣକ ହେଉଛନ୍ତି ଦୀପ୍ତି ରଞ୍ଜନ ପଟ୍ଟନାୟକ । ମାଟ୍ରିମୋନିଆ ସାଇଟରେ ନିଜକୁ ଡିଭୋର୍ସିର ପରିଚୟ ଦେଇଥିଲେ । ଆଉ ଯୁବତୀଙ୍କୁ ମିଠା ମିଠା କଥା କହି ଫସାଇଥିଲା । ନିଜକୁ କୋଟିପତିର ମାଲିକ ବୋଲି କହିଥିଲା । ତା’ ନାଁ ବଡ଼ ବଡ଼ କଲେଜ ଚାଲୁଥିବା ବେଳେ ଭୁବନେଶ୍ୱର ନିଳାଦ୍ରି ବିହାରରେ ଫ୍ଲାଟ୍ ଥିବା ମଧ୍ୟ କହିଥିଲା । ସେ ଟ୍ରେଡିଂ କରୁଥିବା ବେଳେ ମାସକୁ ୫ରୁ ୧୦ ଲକ୍ଷ ଟଙ୍କା ରୋଜଗାର କରୁଥିବା କହିଥିଲା ।
ମାଟ୍ରିମୋନିଆଲ ସାଇଟରେ ପରସ୍ପରକୁ ଜାଣିଥିଲେ । ଡିସେମ୍ୱର ୨୪ ତାରିଖରେ ଯୁବତୀଙ୍କ ସହ ଦେଖାହୋଇଥିଲା । ଧିରେ ଧିରେ ଯୁବତୀ ଓ ତାଙ୍କ ପରିବାର ସଦସ୍ୟଙ୍କ ମନରେ ବିଶ୍ୱାସ ଭରିଲା । ଯୁବତୀଙ୍କ ସହ ତାଙ୍କ ଗାଁକୁ ମଧ୍ୟ ଗଲା । ଏପରିକି ଯୁବତୀଙ୍କ ଟଙ୍କାରେ ଆଇଫୋନ୍ 16-pro Max କିଣିଲା । ସାଙ୍ଗଙ୍କୁ ପାର୍ଟି ଦେବା ସହ ଯୁବତୀଙ୍କ କ୍ରେଡିଟ୍ କାର୍ଡ ସ୍ୱାଇପ୍ କରି ଅଏସ୍ କଲା । ଶେଷରେ ମ୍ୟାରେଜ୍ ଡେଟ୍ ଫାଇନାଲ ହେଲା । ବିବାହ ସ୍ଥାନ ଠିକ୍ ହେଲା । ବିବାହ କଥା ଫାଇନାଲ ହେବା ପରେ ଆଉ ଧରାଛୁଆଁ ଦେଇନଥିଲା । ଯୁବତୀ ଜଣକ ତାଙ୍କ ଗାଁକୁ ଯିବାକୁ ଜିଦ୍ ଧରି ବସିବାରୁ ବାଧ୍ୟ ହୋଇ ନିଜ ଗାଁକୁ ନେଇଥିଲା । ଗାଁକୁ ଯିବା ପରେ ପାଖ ପଡ଼ୋଶୀଙ୍କଠୁ ଯାହା ଶୁଣିବାକୁ ପାଇଲେ, ଯୁବତୀ ଜଣକ ତାକୁ ବିଶ୍ୱାସ କରିପାରିନଥିଲେ । ଏହା ଶୁଣି ସେ ବିଚଳିତ ହୋଇପଡ଼ିଥିଲେ ।
ଦୀପ୍ତି ବିବାହିତ ଥିବା ବେଳେ ତା’ର ୩ଟି ପିଲା ମଧ୍ୟ ଥିବା ଗାଁ ଲୋକ କହିଥିଲେ । ସେ ନିଜ ସ୍ତ୍ରୀ-ପିଲାଙ୍କ ସହ ଭୁବନେଶ୍ୱରର ସହିଦନଗରରେ ରହୁଥିବା ଜାଣିବାକୁ ପାଇଥିଲେ । ଯାହା ପରେ ଠକ ଦୀପ୍ତିର ଅସଲ ମୁଖା ସାମନାକୁ ଆସିଥିଲା । ପୂର୍ବରୁ ଏକାଧିକ ଯୁବତୀ ଏବଂ ମହିଳାଙ୍କ ସହ ଏପରି ଫ୍ରଡ୍ କରିଥିବା ଜଣାପଡ଼ିଥିଲା । ସେପଟେ ଠକେଇର ଶିକାର ଯୁବତୀ ନ୍ୟାୟ ପାଇଁ ଚନ୍ଦ୍ରଶେଖରପୁର ଥାନାର ଦ୍ୱାରସ୍ଥ ହୋଇଥିଲେ । ସୋମବାର ଥାନାରେ ମହିଳାଙ୍କ ଅଭିଯୋଗ ପରେ ରସିକିଆ ଠକକୁ ଗିରଫ କରି ପୋଲିସ ଅଟକ ରଖିଛି । ପୋଲିସ ତଦନ୍ତରୁ ଜାଣିବାକୁ ପାଇଛି ଯେ, ଅଭିଯୁକ୍ତ ଦୀପ୍ତି ସମାନ ଢଙ୍ଗରେ ଗୋପ ଅଞ୍ଚଳର ଜଣେ ଯୁବତୀଙ୍କୁ ବିବାହ ପ୍ରତିଶ୍ରୁତି ଦେଇ ୧୫ ଲକ୍ଷ ଟଙ୍କା ଠକିନେଇଛି । ତା’ ନାଁରେ ତିନି ତିନିଟି ପ୍ରେମ ଜନିତ ଠକେଇ ମାମଲା ରହିଛି । ଏହି ମାମଲାରେ ଅଧିକ ତଦନ୍ତ ଜାରି ରହିଛି ।
