ନୂଆଦିଲ୍ଲୀ: ଆହୁରି ବଢ଼ିବ ୩ ସେନାର ଶକ୍ତି । ଭାରତ ସରକାର ଆମେରିକା ସହ ଏକ ବଡ଼ ଚୁକ୍ତି କରିଛନ୍ତି। ଆମେରିକାର ଶକ୍ତିଶାଳୀ ପ୍ରିଡେଟର MQ-9B ଡ୍ରୋନ୍ କ୍ରୟ କରିବେ ଭାରତ ସରକାର । ଏଥିପାଇଁ ଭାରତ ସରକାର ଆମେରିକା ସହ ୩୨ ହଜାର କୋଟି ଟଙ୍କାର ଚୁକ୍ତି କରିଥିବା ଜଣାପଡ଼ିଛି । ନିକଟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଆମେରିକା ରାଷ୍ଟ୍ରପତି ଜୋ ବାଇଡେନ୍ଙ୍କ ମଧ୍ୟରେ ଡ୍ରୋନ୍କୁ ଆଲୋଚନା ହେବା ପରେ ଏହି ଖବର ସାମ୍ନାକୁ ଆସିଛି ।
ଆମେରିକାର ସାମରିକ ଏବଂ କର୍ପୋରେଟ୍ ଅଧିକାରୀଙ୍କ ଏକ ଟିମ୍ ଭାରତ ସରକାରଙ୍କ ସହ ଆଜି (ମଙ୍ଗଳବାର) ଏହି ଚୁକ୍ତିନାମା ସ୍ୱାକ୍ଷର କରିଛନ୍ତି । ଏହା ବ୍ୟତୀତ ଡ୍ରୋନର ରକ୍ଷଣାବେକ୍ଷଣା ଏବଂ ମରାମତି ପାଇଁ ଭାରତରେ କେନ୍ଦ୍ର ସ୍ଥାପନ ପାଇଁ ମଧ୍ୟ ସହମତି ପ୍ରକାଶ ପାଇଛି । ମିଳିଥିବା ସୂଚନା ଅନୁସାରେ, ମୋଟ ୩୧ଟି ଡ୍ରୋନ୍ ମଧ୍ୟରୁ ୧୫ ଟି ନୌସେନାକୁ, ୮ଟି ଲେଖାଏଁ ଡ୍ରୋନ୍ ସ୍ଥଳସେନା ଏବଂ ବାୟୁସେନାକୁ ଦିଆଯିବ ।
ସେପଟେ ଏହି ଚୁକ୍ତି ଲାଗି ଆହୁରି ୨,୫୦୦ କୋଟି ଟଙ୍କା ଅଧିକ ଖର୍ଚ୍ଚ ହୋଇପାରେ । ଭାରତ ମୋଟ୍ ୩୪,୫୦୦ କୋଟି ଟଙ୍କାର ଡ୍ରୋନ୍ ଆଣିବାର ସମ୍ଭାବନା ରହିଛି । ଏସବୁ ଡ୍ରୋନ୍ ଚେନ୍ନାଇ ନିକଟ INS ରାଜଲି, ଗୁଜରାଟର ପୋରବନ୍ଦର, ଉତ୍ତରପ୍ରଦେଶର ସରସବା ଏବଂ ଗୋରଖପୁର ସମେତ ଚାରିଟି ସ୍ଥାନରେ ନିୟୋଜିତ ହୋଇପାରେ ।
କାହିଁକି ଖାସ୍ ପ୍ରିଡେଟର ଡ୍ରୋନ୍ ?
ଏହି ଡ୍ରୋନ୍ ଖୁବ୍ ଶକ୍ତିଶାଳୀ । ଏହା ୧୯୦୦ କିଲୋମିଟର ଉପରୁ ନଜର ରଖିବାର କ୍ଷମତା ରଖିଛି । ଏଥିସହ ଘଣ୍ଟା ପ୍ରତି ୪୪୨ କିଲୋମିଟର ବେଗରେ ମଧ୍ୟ ଉଡିପାରିବ ପ୍ରିଡେଟର MQ-9B ଡ୍ରୋନ୍ । ଆମେରିକା ଏହି ଡ୍ରୋନ୍ ସାହାଯ୍ୟରେ କୁଖ୍ୟାତ ଆତଙ୍କବାଦୀ ଓସମା ବିନ୍ ଲାଡେନର ଠିକଣା ଠାବ କରିଥିଲା । ଏହି ଡ୍ରୋନ୍ ଆକ୍ରମଣରେ ମଧ୍ୟ ଅଲ କାଏଦା ଲିଡର୍ ଅଲ ଜାୱାହାରୀ ନିପାତ ହୋଇଥିଲା ।
ପ୍ରିଡେଟର MQ-9B ଡ୍ରୋନ୍ ବ୍ୟବସାୟିକ ବିମାନ ଠାରୁ ୫୦ ହଜାର ଫୁଟ୍ ଉଚ୍ଚରେ ଉଡ଼ାଣ କରିପାରିବ । ଯେକୌଣସି ପାଣିପାଗରେ ଲକ୍ଷ୍ୟଭେଦ କରିବାକୁ ସକ୍ଷମ ଏହି ଡ୍ରୋନ୍ । ଏହା ଆକଶରୁ ସ୍ଥଳ ଏବଂ ଏୟାର ଟୁ ଏୟାର ମିସାଇଲ୍ ମାଡ଼ କରିପାରିବ । ଥରେ ଇନ୍ଧନ ଭାରିଲେ ୨ ହଜାର ମାଇଲ୍ ଉଡ଼ିପାରିବାର କ୍ଷମତା ରଖିଥିବା ପ୍ରିଡେଟର MQ-9B ଡ୍ରୋନ୍ ୧୭ ହଜାର କେଜିର ଯୁଦ୍ଧାସ୍ତ୍ର ପରିବହନ କ୍ଷମତା ରଖିଛି । ଲଗାତାର ୩୫ ଘଣ୍ଟା ଉଡ଼ାଣ କରିବା ସହ ଶତ୍ରୁଙ୍କୁ ଖୋଜି ଖୋଜି ମାରିବାରେ ସକ୍ଷମ ପ୍ରିଡେଟର MQ-9B ଡ୍ରୋନ୍ ।
