ଭୁବନେଶ୍ୱର, ୨୨।୫: ଯଦି ଅତ୍ୟଧିକ ଖରା କାରଣରୁ ଡାଇରିଆ ବା ଶରୀରରେ ଜଳର ଅଭାବରୁ ଡିହାଇଡ୍ରେସନ୍ ହୋଇଛି, ତାହେଲେ ବିଳମ୍ୱ ନକରି କିଛି ଘରୋଇ ଉପଚାର ଅପଣେଇବା ଆବଶ୍ୟକ । ଜାଣିରଖନ୍ତୁ କେଉଁ ପରିସ୍ଥିତିରେ ନେବେ ଡାକ୍ତରଙ୍କ ପରାମର୍ଶ ।
ମେ ମାସର ଏହି ଗରମରେ ପାହାଡ଼ଠାରୁ ଆରମ୍ଭ କରି ପଡ଼ିଆ ପର୍ଯ୍ୟନ୍ତ ସବୁ ଜଳୁଛି । ଏଭଳି ଗରମରେ ଲୋକଙ୍କର ସ୍ୱାସ୍ଥ୍ୟ ବହୁତ ଶୀଘ୍ର ଖରାପ ହେଉଥିବାର ଦେଖାଯାଉଛି । ଖରାଦିନେ ଅଧିକ ଝାଳ ବାହାରୁଥିବାରୁ ଶରୀର ଶୀଘ୍ର ଡିହାଇଡ୍ରେସନ୍ର ଶିକାର ହେଉଛି । ଏହାଛଡ଼ା ଡାଇରିଆ ମଧ୍ୟ ଶୀଘ୍ର ହେଉଛି । ଡାଇରିଆରେ ବାନ୍ତିର ସମସ୍ୟା ଉପୁଜିଥାଏ ଏବଂ ପାଣି, ପୋଷକତତ୍ତ୍ୱର ଅଭାବ ଦେଖାଦେଇଥାଏ ।
ଅଧିକ ଗରମ, ବାସି ଓ ବାକ୍ଟେରିଆ ଯୁକ୍ତ ଭୋଜନ, ଅଧିକ ମସଲାଯୁକ୍ତ ଖାଦ୍ୟ ଖାଇବା ଦ୍ୱାରା ବାନ୍ତି ଏବଂ ଡାଇରିଆ ହେଉଛି । ଯାହାଦ୍ୱାରା ଶରୀର ପୂର୍ବାପେକ୍ଷା ଅଧିକ ଦୁର୍ବଳ ହେଉଛି । ଏପରି ସମୟରେ ଯଦି ଆପଣ ଚାହିଁବେ , କିଛି ଘରୋଇ ଉପଚାର ଆପଣାଇ ପାରିବେ । ତେବେ ଆସନ୍ତୁ ଜାଣିବା ଏଥିରୁ ରକ୍ଷା ପାଇବାର କିଛି ଘରୋଇ ଉପାୟ ଏବଂ କେଉଁ ପରିସ୍ଥିତିରେ ଡାକ୍ତରଙ୍କ ପରାମର୍ଶ ଏକ ଉଚିତ୍ ବିକଳ୍ପ ହେବ ।
ଡିହାଇଡ୍ରେସନ୍ ଓ ଡାଇରିଆ ରୋକିବାର ଉପାୟ :
ଡିହାଇଡ୍ରେସନ୍ ହେବା ଦ୍ୱାରା ଶରୀରରେ ପାଣିର ଅଭାବ ହୋଇଥାଏ । ସାଧା ପାଣି ଜାଗାରେ ଲେମ୍ୱୁ ସରବତ୍, ପଇଡ଼ ପାଣିର ସେବନ କରନ୍ତୁ । ପାଣିରେ ଓଆରଏସ୍ ମିଶାଇ ରୋଗୀଙ୍କୁ ଦିଅନ୍ତୁ । ଏହାଦ୍ୱାରା ରୋଗୀର ଶରୀରରେ ପୋଷକତତ୍ତ୍ୱର ଅଭାବ ପୁରଣ ହେବ । ଏପରି ଫଳର ସେବନ କରନ୍ତୁ, ଯେଉଁଥିରେ ଜଳର ମାତ୍ରା ଅଧିକ ଥିବ । ଦୈନିକ ଦହି ଓ ଘୋଳଦହି ସହ ଇଲେକ୍ଟ୍ରୋଲାଇଟ୍ସ୍ ର ସେବନ କରନ୍ତୁ । ରୋଗୀକୁ କଦଳୀ ଓ ଦହି ସେବନ କରିବାକୁ ଦିଅନ୍ତୁ । ଏହାଦ୍ୱାରା ଡାଇରିଆରୁ ମୁକ୍ତି ମିଳିଥାଏ ।
ଏହି ଟିପ୍ସରୁ ରୋଗରୁ ମିଳିବ ଆରାମ :
ପାନମଧୁରୀକୁ ଡାଇରିଆ ଓ ଡିହାଇଡ୍ରେସନରୁ ରକ୍ଷା କରିଥାଏ । ଅଧାଚାମଚ ପାନମଧୁରୀକୁ ୪ ଗ୍ଲାସ୍ ପାଣିରେ ଫୁଟାଇ ନିଅନ୍ତୁ । ସେହି ପାଣିକୁ ଥଣ୍ଡା କରି ଦିନରେ ୩ରୁ୪ ଥର ଚା’ ଭଳି ପିଅନ୍ତୁ । ଏହାଦ୍ୱାରା ଡାଇରିଆରୁ ଆରାମ ମିଳିବ । ତୁଳସୀ ମଧ୍ୟ ଡିହାଇଡ୍ରେସନ୍ ଓ ଡାଇରିଆ ପାଇଁ ଉପକାରୀ ଅଟେ । ଏଥିରେ ଡାଇରିଆରେ ହେଉଥିବା ପେଟକଟାରୁ ଆରାମ ମିଳିଥାଏ ଓ ଡାଇରିଆର ବାକ୍ଟେରିଆ ମଧ୍ୟ ମରିଯାଇଥାନ୍ତି । ବଜାରରେ ତୁଳସୀରସ ମିଳୁଛି, ଏହାକୁ ପାଣିରେ ମିସାଇ ଦିନକୁ ୩ରୁ ୪ଥର ସେବନ କରନ୍ତୁ ।
ମନ୍ଦାର ଫୁଲର ଚା’ :
ମନ୍ଦାର ଫୁଲର ଚା’ ପିଇବା ଦ୍ୱାରା ଶରୀରରେ ପାଣିର ଅଭାବ ଦୂରହୁଏ । ଏହାର ଚା’ ବନାଇ ଥଣ୍ଡା କରି ଦିନରେ ଦୁଇଥର ପିଇଲେ ଶରୀରରେ ପୋଷକତତ୍ତ୍ୱର ଅଭାବ ଦୂର ହେବା ସହ ଡାଇରିଆରୁ ମଧ୍ୟ ଆରାମ ମିଳିଥାଏ । ଏହାସହ ଗୁଳୁଚି ରସ ମଧ୍ୟ ଡାଇରିଆର ଲକ୍ଷଣକୁ କମ୍ କରିଥାଏ । ଏଥିରେ ପାଚନ ସମ୍ୱନ୍ଧିୟ ସମସ୍ୟା ମଧ୍ୟ ଦୂର ହୁଏ ।
କେତେବେଳେ ଡାକ୍ତରଙ୍କ ପରାମର୍ଶ ଆବଶ୍ୟକ ?
ସାଧାରଣତଃ ଅଳ୍ପ ଡିହାଇଡ୍ରେସନ୍ ଓ ଡାଇରିଆରେ ଘରୋଇ ଉପଚାର ଦ୍ୱାରା ଆରାମ ମିଳିଯାଏ । କିନ୍ତୁ, ଯଦି ଡାଇରିଆର ସ୍ଥିତି ଗମ୍ଭୀର ବା ଶରୀରରେ ଜଳର ଅଭାବ ଅଧିକ ଥାଏ, ତେବେ ଡାକ୍ତରଙ୍କ ପରାମର୍ଶ ନେବା ଉଚିତ୍ । ଯଦି ରୋଗୀର ବାରମ୍ୱାର ବାନ୍ତି ହେଉଥାଏ, ତେବେ ଡାକ୍ତରଙ୍କ ପରାମର୍ଶ ଆବଶ୍ୟକ । ଶରୀରରେ ପାଣିର ଅଭାବ ଅଧିକ ହେଲେ, ବାରମ୍ୱାର ବାନ୍ତି ସହ ପେଟ ମୋଡ଼ି ହେବା, ମୁଣ୍ଡ ବିନ୍ଧା ହେବା ସହ ବୁଲାଇଥାଏ । ଏହାର ଅର୍ଥ ଡାଇରିଆ ଗମ୍ଭୀର ଭାବରେ ହୋଇଛି । ଏପରି ପରିସ୍ଥିତିରେ ଘରୋଇ ଉପଚାର ନ ଆପଣାଇ ଡାକ୍ତରଙ୍କ ପରାମର୍ଶ ନିତ୍ୟାନ୍ତ ଆବଶ୍ୟକ ।