ନୂଆଦିଲ୍ଲୀ: ଭାରତର ସବୁଠାରୁ ଧନୀ ମହିଳା ଏବଂ ହରିୟାଣା ବିଧାନସଭା ନିର୍ବାଚନରେ ସ୍ବାଧୀନ ପ୍ରାର୍ଥୀ ସାବିତ୍ରୀ ଜିନ୍ଦଲ ବଡ଼ ବିଜୟ ହାସଲ କରିଛନ୍ତି । ହରିୟାଣାର ହିସାର ବିଧାନସଭାନ ଆସନରେ ବିଜେପିର କମଲ ଗୁପ୍ତାଙ୍କୁ ୧୮,୯୪୧ ଭୋଟରେ ପରାସ୍ତ କରିଛନ୍ତି ସାବିତ୍ରୀ ଜିନ୍ଦଲ । ହିସାରର ଭୋଟରଙ୍କୁ ଧନ୍ୟବାଦ ଜଣାଇ ସୋସିଆଲ ମିଡିଆ ପ୍ଲାଟଫର୍ମରେ ସାବିତ୍ରୀ ଜିନ୍ଦଲ ଲେଖିଛନ୍ତି, ‘ହିସାର ପରିବାର ପାଖରେ ମୁଁ ଋଣୀ ।’
୭୪ ବର୍ଷୀୟା ବ୍ୟବସାୟୀ ସାବିତ୍ରୀ ଜିନ୍ଦଲ ହିସାର ଆସନରୁ ତୃତୀୟ ଥର ଲାଗି ବିଜୟୀ ହୋଇଛନ୍ତି । ଏହା ପୂର୍ବରୁ ୨୦୦୫ ଏବଂ ୨୦୦୯ରେ ହିସାର ଆସନରୁ କଂଗ୍ରେସ ଟିକେଟରେ ନିର୍ବାଚନ ଲଢ଼ି ଜିତିଥିଲେ ସାବିତ୍ରୀ ଜିନ୍ଦଲ । ବିଶିଷ୍ଟ ବ୍ୟବସାୟୀ ଓପି ଜିନ୍ଦଲଙ୍କ ମୃତ୍ୟୁ ପରେ ପତ୍ନୀ ସାବିତ୍ରୀ ଜିନ୍ଦଲ ଦାୟିତ୍ବ ଗ୍ରହଣ କରିଛନ୍ତି । ସେ ଜିନ୍ଦଲ ଗ୍ରୁପ୍ର ମୁଖ୍ୟ ହୋଇଥିବା ବେଳେ ତାଙ୍କ କମ୍ପାନି ଷ୍ଟିଲ୍, ଶକ୍ତି, ମାଇନିଂ ଏବଂ ନିର୍ମାଣ କ୍ଷେତ୍ରରେ ରାଜ କରୁଛି । ତାଙ୍କର ନେତୃତ୍ବ ବିଶ୍ବ ଦରବାରରେ ଲୋକପ୍ରିୟତା ହାସଲ କରିଛି । ସାବିତ୍ରୀ ଜିନ୍ଦଲଙ୍କୁ ସମ୍ମାନଜନକ ପଦ୍ମ ଭୂଷଣ ସମ୍ନାନରେ ସମ୍ମାନିତ କରାଯାଇଛି ।
ପ୍ରଥମେ ୨୦୦୫ରେ କଂଗ୍ରେସ ଟିକେଟରେ ହିସାର ଆସନରୁ ନିର୍ବାଚନ ଲଢ଼ିଥିଲେ । ପୁଣି ୨୦୦୯ରେ ସେହି ଆସନରୁ ବିଜୟୀ ହୋଇଥିଲେ । ୨୦୨୩ରେ ମନ୍ତ୍ରୀ ହୋଇଥିବା ସାବିତ୍ରୀ ଜିନ୍ଦଲ କଂଗ୍ରେସରୁ ଦୂରେଇ ଯାଇଥିଲେ । ଫୋର୍ବସ ରିପୋର୍ଟ ଅନୁସାରେ, ସାବିତ୍ରୀ ଜିନ୍ଦଲଙ୍କ ମୋଟ ସମ୍ପତ୍ତିର ମୂଲ୍ୟ ୩.୬୫ ଲକ୍ଷ କୋଟି ଟଙ୍କା । ସେ ଭାରତର ସବୁଠାରୁ ଧନୀ ମହିଳା । ହିସାରରେ ସାବିତ୍ରୀ ଜିନ୍ଦଲଙ୍କ ମୁଖ୍ୟ ପ୍ରତିଦ୍ବନ୍ଦୀ ବିଜେପିର କମଲ ଗୁପ୍ତା । ସେ ୨୦୨୧ରେ ହରିୟାଣାର ସହରୀ ବିକାଶ ମନ୍ତ୍ରୀ ଭାବରେ କାର୍ଯ୍ୟ କରିଥିଲେ । ପେଶାରେ ଜଣେ ଡାକ୍ତର ହୋଇଥିବା ବେଳେ କମଲ ଗୁପ୍ତା ହିସାର ଆସନରୁ ୨୦୧୪ ଏବଂ ୨୦୧୯ରେ ବିଜୟୀ ହୋଇଥିଲେ ।
