ଭୁବନେଶ୍ୱର, ୨୦।୧୨: କରୋନାର ନୂଆ ଭାରିଆଣ୍ଟ ଜେଏନ୍‌-୧ ନେଇ କେନ୍ଦ୍ର ସରକାର ସମସ୍ତ ରାଜ୍ୟ ସରକାରମାନଙ୍କୁ ଗତକାଲି ସତର୍କ କରାଇଛନ୍ତି । ଏହାପରେ ରାଜ୍ୟ ସରକାର ସତର୍କତା ପଦକ୍ଷେପ ସ୍ୱରୂପ ଗାଇଡ୍‌ଲାଇନ୍‌ ଜାରି କରିପାରନ୍ତି । ତେବେ ସରକାର କରୋନା ମୁକାବିଲା ଦିଗରେ ସମ୍ପୂର୍ଣ୍ଣ ପ୍ରସ୍ତୁତ ଅଛନ୍ତି ବୋଲି ସ୍ୱାସ୍ଥ୍ୟ ବିଭାଗ ନିର୍ଦ୍ଦେଶକ ଡାକ୍ତର ବିଜୟ ମହାପାତ୍ର ସୂଚନା ଦେଇଛି । କରୋନାର ସବ୍‌ ଭାରିଆଣ୍ଟ ଜେଏନ୍‌ ୧ କର୍ଣ୍ଣାଟକ ଓ କେରଳରେ ଠାବ ହୋଇଛି । ଏହାକୁ ଅତି ଗୁରୁତର ସହ ଗ୍ରହଣ କରିଛନ୍ତି ରାଜ୍ୟ ସରକାର । 

ଏନେଇ ସ୍ୱାସ୍ଥ୍ୟ ନିର୍ଦ୍ଦେଶକ ଡାକ୍ତର ବିଜୟ ମହାପାତ୍ର କହିଛନ୍ତି, ଯେଉଁ ନୂଆ ଭାରିଆଣ୍ଟ କଥା କୁହାଯାଉଛି, ତାହା ନାଚୁରାଲ୍‌ । ନୂଆ ଭାରିଆଣ୍ଟ ଚିହ୍ନଟ ହେଲେ ଜିନମ୍‌ ସିକ୍ୟୁଏନ୍ସ ପାଇଁ ପଠାଯିବ । କେନ୍ଦ୍ର ଗାଇଡ୍‌ଲାଇନ୍‌ ଅନୁସାରେ ଆମେ ପ୍ରସ୍ତୁତ ଅଛୁ । ଆବଶ୍ୟକ ହେଲେ ରାଜ୍ୟ ସରକାର ଗାଇଡଲାଇନ୍‌ ଜାରି କରିପାରନ୍ତି । ସ୍ୱାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି ଯେ ଭୟଭୀତ ହେବାର କୌଣସି କାରଣ ନାହିଁ । ଓଡ଼ିଶା ପାଇଁ କୌଣସି ବିପଦ ନାହିଁ । କିନ୍ତୁ ସତର୍କ ରହିବାକୁ ପଡ଼ିବ । ଦରକାର ପଡ଼ିଲେ ମାସ୍କ ପିନ୍ଧନ୍ତୁ । ବୟସ୍କମାନେ ଜନଗହିଳ ସ୍ଥାନକୁ ଯାଆନ୍ତୁ ନାହିଁ । ରାଜ୍ୟ ସରକାର ନିୟମିତ ହସ୍ପିଟାଲରେ ସନ୍ଦିଗ୍ଧଙ୍କ କୋଭିଡ୍‌ ଟେଷ୍ଟିଂ କରାଯାଉଛି । ଟେଷ୍ଟିଂ ସଂଖ୍ୟା ବଢ଼ାଇବାକୁ କୁହାଯାଇଛି । ସଂକ୍ରମଣ ସ୍ଥିତି ସମ୍ପର୍କରେ ଜାଣିବା ପାଇଁ ଆରଏମ୍‌ଆର୍‌ସି ସହିତ ଯୋଗାଯୋଗ କରାଯାଉଛି । ସନ୍ଦିଗ୍ଧଙ୍କ ନମୁନା ଜେନମ୍‌ ସିକ୍ୱେନ୍ସିଂ ପାଇଁ ପଠାଯାଉଛି । ଏହା ଉପରେ ତୀକ୍ଷ୍ଣ ନଜର ରଖିବା ପାଇଁ ଜିଲ୍ଲାସ୍ତରରେ ବିଶେଷଜ୍ଞଙ୍କୁ ଦାୟିତ୍ୱ ଦିଆଯାଉଛି ।