ଭୁବନେଶ୍ୱର, ୧୮।୯: ଗଞ୍ଜାମ ତପ୍ତପାଣି ଚିଡ଼ିଆଖାନାରୁ ଭରତପୁର ଅଭୟାରଣ୍ୟକୁ ଆସିବେ ଆଉ ୮ ସମ୍ବର । ୫ଟି ମାଈ ଓ ୩ ଅଣ୍ଡିରା ସମ୍ବର ଆସିବେ । ଚନ୍ଦକା ବନଖଣ୍ଡର ଏକ ୮ ଜଣିଆ ଟିମ୍ ୩ଟି ସ୍ୱତନ୍ତ୍ର ଭ୍ୟାନ୍ ନେଇ ତପ୍ତପାଣି ଯାଇଛନ୍ତି । ମଙ୍ଗଳବାର ସକାଳେ ଉକ୍ତ ଟିମ୍ ୮ଟି ସମ୍ବର ଧରି ଆସି ଭରତପୁରରେ ପହଞ୍ଚିବେ । ଏବେ ଏଠାରେ ୧୨ଟି ସମ୍ବରଙ୍କୁ ଛଡ଼ାଯାଇଥିବା ବେଳେ ଆଉ ୮ଟି ପହଞ୍ଚିବା ପରେ ଭରତପୁର ଜଙ୍ଗଲରେ ସମ୍ବର ସଂଖ୍ୟା ୨୦ରେ ପହଞ୍ଚିବ ବୋଲି ସୂଚନା ଦେଇଛନ୍ତି ଚନ୍ଦକା ଡିଏଫ୍ଓ ଶରତ ଚନ୍ଦ୍ର ବେହେରା । ଚନ୍ଦକା-ଡମପଡ଼ା ଅଭୟାରଣ୍ୟ ତୃଣଭୋଜୀ ପ୍ରାଣୀଙ୍କ ପାଇଁ ଉପଯୁକ୍ତ ସ୍ଥାନ । ଏହି ଜଙ୍ଗଲରେ ହରିଣ, ବିଲୁଆ, କୋକିଶିଆଳି, ବାର୍ହା, ହାତୀ ଆଦି ବିଭିନ୍ନ ପ୍ରକାର ପ୍ରାଣୀ ରହୁଛନ୍ତି । ଏଠାରେ ସମ୍ବର ଆଦୌ ନଥିଲେ ।
ତେଣୁ ଏହି ଅଭୟାରଣ୍ୟରେ ସମ୍ବର ବଂଶ ବୃଦ୍ଧି କରିବା ପାଇଁ ବନବିଭାଗ ଯୋଜନା କରିଥିଲା । ଏନେଇ କେନ୍ଦ୍ରୀୟ ଚିଡ଼ିଆଖାନା କର୍ତ୍ତୃପକ୍ଷଙ୍କୁ ରାଜ୍ୟ ଜଙ୍ଗଲ ବିଭାଗ ପକ୍ଷରୁ ଆବେଦନ କରାଯାଇଥିଲା । ଗ୍ରୀନ ସିଗ୍ନାଲ ମିଳିବା ପରେ ସମ୍ବର ସ୍ଥାନାନ୍ତର ପ୍ରକ୍ରିୟା ଜାରି ରହିଛି । ପ୍ରାରମ୍ଭିକ ପର୍ଯ୍ୟାୟରେ ଗତ ଫେବ୍ରୁଆରୀ ମାସରେ ଭରତପୁର ଜଙ୍ଗଲରେ ୨ଟି ମାଈ ଓ ଗୋଟିଏ ଅଣ୍ଡିରା ସମ୍ବର ଛଡ଼ା ଯାଇଥିଲା । ଏହି ସମ୍ବରଙ୍କ ମଧ୍ୟରେ ଗୋଟିଏ ସମ୍ବର ଶାବକ ଜନ୍ମ ହୋଇଥିଲା । ତେଣୁ ଏହି ଜଙ୍ଗଲରେ ସମ୍ବର ବଂଶ ବୃଦ୍ଧି ଘଟିବା ବନବିଭାଗ ନିଶ୍ଚିତ ହୋଇଥିଲ । ତପ୍ତପାଣି ଚିଡ଼ିଆଖାନାରୁ ଜୁନ୍ ୨୬ରେ ୪ଟି ଓ ଜୁଲାଇ ୫ରେ ୫ଟି ସମ୍ବର ଆଣି ବନବିଭାଗ ଭରତପୁର ଜଙ୍ଗଲରେ ଛାଡ଼ିଥିଲା । ଚିଡ଼ିଆଖାନାରୁ ଆସିଥିବାରୁ ସେମାନଙ୍କୁ ପ୍ରଥମେ ସ୍ୱତନ୍ତ୍ର ଏନ୍କ୍ଲୋଜରରେ ରଖା ଯାଇଥିଲା । ଚିଡ଼ିଆଖାନା ଖାଦ୍ୟ ସହ ଜଙ୍ଗଲି ଖାଦ୍ୟ ଦିଆଯାଇଥିଲା । ଜଙ୍ଗଲି ଖାଦ୍ୟ ସହ ଅଭ୍ୟସ୍ତ ହେବାପରେ ସେମାନଙ୍କୁ ଗତ ଅଗଷ୍ଟ ୧୫ରେ ମୁକ୍ତ ଜଙ୍ଗଲରେ ଛାଡ଼ି ଦିଆଯାଇଛି ।
ବୁଧବାର ୮ଟି ସମ୍ବର ପହଞ୍ଚିବା ପରେ ସେମାନଙ୍କୁ ପ୍ରଥମେ ଏନ୍କ୍ଲୋଜରରେ ରଖାଯାଇ ଜଙ୍ଗଲି ଖାଦ୍ୟ ସହ ଅଭ୍ୟସ୍ତ କରାଯିବ । ସେମାନଙ୍କ ସ୍ୱାସ୍ଥ୍ୟକୁ ଗୁରୁତ୍ୱ ଦେବା ସହ ସ୍ୱତନ୍ତ୍ର ଡାକ୍ତରୀ ଟିମ୍ ସମ୍ବରଙ୍କ ଉପରେ ନଜର ରଖିବେ । ପ୍ରତି ସପ୍ତାହରେ ଗୋଟିଏ ଦିନ ସେମାନଙ୍କ ସ୍ୱାସ୍ଥ୍ୟ ପରୀକ୍ଷା କରାଯିବ । ଜଙ୍ଗଲ ପରିବେଶ ସହ ସମ୍ପୂର୍ଣ୍ଣ ଭାବେ ମିଶିବା ପରେ ସେମାନଙ୍କୁ ଚନ୍ଦକା-ଡମପଡ଼ା ଅଭୟାରଣ୍ୟରେ ମୁକ୍ତଭାବେ ଛଡ଼ାଯିବ । ଚନ୍ଦକା-ଡମପଡ଼ା ଅଭୟାରଣ୍ୟରେ ସମ୍ବର ସହିତ ଗୟଳ ବଂଶ ବୃଦ୍ଧି କରିବା ଲକ୍ଷ୍ୟରେ ରହିଛି ବନବିଭାଗ । ଚଳିତ ମାସରେ ଦେବ୍ରୀଗଡ଼ ଅଭୟାରଣ୍ୟରୁ ୨୦ ଗୟଳ ଆଣି ଏହି ଜଙ୍ଗଲରେ ଛଡ଼ାଯିବ ବୋଲି ଡିଏଫ୍ଓ ଶ୍ରୀ ବେହେରା କହିଛନ୍ତି ।
