ନୂଆଦିଲ୍ଲୀ: ଗୋଆର ପୂର୍ବତନ ବିଧାୟକ ଲାଭୋ ସୂର୍ଯ୍ୟାଜୀ ମାମଲେଦାର ଏକ ଅଟୋରିକ୍ସା ଚାଳକଙ୍କ ଚାପୁଡାରେ ମୃତ୍ୟୁବରଣ କରିଛନ୍ତି। ଶନିବାର ଦ୍ୱିପ୍ରହର ସମୟରେ ସେ କର୍ଣ୍ଣାଟକର ବେଲାଗାଭି ଅଞ୍ଛଳକୁ ଯାଉଥିବା ବେଳେ ଜଣେ ଅଟୋ ଚାଳକଙ୍କ ସହ ଯୁକ୍ତିତର୍କ ହୋଇଥିଲା। ଏଥିରେ ଉତକ୍ଷିପ୍ତ ହୋଇ ଅଟୋଚାଳକ ଜଣଙ୍କ ତାଙ୍କୁ ଏକ ଚାପୁଡା ମାରିଥିଲେ। ଏଥିରେ ତାଙ୍କର ମୃତ୍ୟୁ ହୋଇଥିଲା ବୋଲି ସ୍ଥାନିୟ ଅଧିକାରୀମାନେ ପ୍ରକାଶ କରିଛନ୍ତି।
ସୂଚନା ମୁତାବକ, ୬୮ ବର୍ଷିୟ ସୂର୍ଯ୍ୟାଜୀ ୨୦୧୨ ମସିହାରୁ ୨୦୧୭ ମସିହା ଯାଏ ପୋଣ୍ଡା ନିର୍ବାଚନମଣ୍ଡଳୀରେ ବିଧାୟକ ଭାବେ କାର୍ଯ୍ୟ କରିଥିଲେ। ସେ ଶନିବାର ଖାଡେ ବଜାରରେ ଥିବା ଶ୍ରୀନିବାସ ଲଜରେ ଏକ ହୋଟେଲ ବୁକ୍ କରିଥିଲେ। ସେ ନିଜ ହୋଟେଲ ଯିବା ପାଇଁ ତାଙ୍କ କାର ଯୋଗେ ଏକ ଅଣଓସାରିଆ ଗଳିରେ ଯାଇଥିବା ବେଳେ ତାଙ୍କ କାରଟି ଏକ ଅଟୋ ରିକ୍ସା ସହ ଘଷି ହୋଇ ଯାଇଥିଲା। ଆଉ ଏହାକୁ ନେଇ ଉଭୟଙ୍କ ମଧ୍ୟରେ ପାଟିତୁଣ୍ଡ ଆରମ୍ଭ ହୋଇଯାଇଥିଲା। ଏହି ସାମାନ୍ୟ କଥାକୁ ନେଇ ଅଟୋରିକ୍ସା ଚାଳକ ମୁଜ୍ଜାହିଦ ସନଦି ପୂର୍ବତନ ବିଧାୟକ ସୂର୍ଯ୍ୟାଜୀଙ୍କୁ ଏକ ଶକ୍ତ ଚାପୁଡା ମାରିଥିଲେ।
ପରେ ଏହାକୁ ନେଇ ଉଭୟଙ୍କ ମଧ୍ୟରେ ବୁଝାମଣା ମଧ୍ୟ ହୋଇଯାଇଥିଲା। ତା ପରେ ବିଧାୟକ ଜଣଙ୍କ ନିଜ ହୋଟେଲକୁ ଫେରିଯାଇଥିଲେ। କିନ୍ତୁ ସୂର୍ଯ୍ୟାଜୀ ନିଜ ରୁମ୍ କୁ ଯିବା ପାଇଁ ସିଡି ଚଢୁଥିବା ବେଳେ ହଠାତ ସଂଜ୍ଞାହୀନ ହୋଇପଡିଥିଲେ। ଏହାପରେ ତାଙ୍କୁ ସଙ୍ଗେସଙ୍ଗେ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଥିଲା। କିନ୍ତୁ ସେଠାରେ ତାଙ୍କୁ ମୃତ ଘୋଷଣା କରାଯାଇଥିଲା। ତାହ୍କ ମୃତଶରୀରକୁ ପୋଷ୍ଟମର୍ଟମ ପାଇଁ ପଠାଯାଇଥିବା ବେଳେ ରିପୋର୍ଟ ଆସିଲେ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ପୋଲିସ କହିଛି।
ଏ ସମ୍ପର୍କରେ ପୋଲିସକୁ ସୂଚନା ମିଳିବା ପରେ ପୋଲିସ ଅଭିଯୁକ୍ତ ଅଟୋରିକ୍ସା ଡ୍ରାଇଭରକୁ ଧରିବା ପାଇଁ ବିଭିନ୍ନ ସିସିଟିଭି ଯାଞ୍ଚ କରିଥିଲା। ପରେ ପୋଲିସ ଅଭିଯୁକ୍ତକୁ ଚିହ୍ନଟ କରିବା ସହ ନିଜ ହେପାଜତକୁ ନେଇଛି। ପୋଷ୍ଟମର୍ଟମ ରିପୋର୍ଟ ଆସିବା ପରେ ଏହି ମାମଲାର ସ୍ଥିତି ସ୍ପଷ୍ଟ ହେବ ବୋଲି ବୋଲି ପୋଲିସ ପ୍ରକାଶ କରିଛି।
