ଭୁବନେଶ୍ୱର,୨୧/୦୨: ସ୍ୱାମୀଙ୍କ ସହ କାମ ଖୋଜିବା ପାଇଁ ତାମିଲନାଡୁରେ ପହଞ୍ଚିଲେ । କିନ୍ତୁ ସେଠାରେ କାମ ପାଇବା ପୂର୍ବରୁ ଗଣଦୁଷ୍କର୍ମ ଶିକାର ହେଲେ ଜଣେ ଓଡିଆ ମହିଳା । ଏହି ମାମଲାରେ ତାମିଲନାଡୁ ପୁଲିସ ୩ ଜଣଙ୍କୁ ଗିରଫ କରିଛି । ସେମାନେ ହେଉଛନ୍ତି, ମହମ୍ମଦ ନାଦିମ୍ (୨୪), ମହମ୍ମଦ ଦାନିଶ (୨୫), ବିହାରର ମହମ୍ମଦ ମୁର୍ସିଦ୍ଦ (୧୯) । ଏହି ୩ଜଣ କାମାନ୍ଧ ବନ୍ଧୁକ ଦେଖାଇ ସ୍ୱାମୀଙ୍କ ସାମ୍ନାରେ ଅତି ନିର୍ଦ୍ଦୟ ଭାବେ ମହିଳାଙ୍କୁ ଦୁଷ୍କର୍ମ କରିଥିବା ପୁଲିସ ସୂଚାଇଛି ।
ସୂଚନା ମୁତାବକ, ମଙ୍ଗଳବାର ୨୭ ବର୍ଷୀୟ ମହିଳାଜଣକ ସ୍ୱାମୀ ଓ ୩ ବର୍ଷର ଶିଶୁ ସହ ଓଡିଶାରୁ ଟ୍ରେନ୍ ଯୋଗେ ଯାଇ ତିରୁପ୍ପୁର ରେଳଷ୍ଟେସନରେ ପହଞ୍ଚିଲେ । ରେଳଷ୍ଟେସନରେ ବୁଲୁଥିବା ୩ କାମାନ୍ଧଙ୍କୁ ସେମାନେ ଭେଟିଥିଲେ । ଆଖପାଖରେ ଭଡ଼ା ଘର ଖୋଜିବାକୁ ସେମାନଙ୍କୁ ନିବେଦନ କରିଥିଲେ । ମହିଳାଙ୍କୁ ଦେଖି ଅଭିଯୁକ୍ତମାନଙ୍କ ମନରେ କାମନାର ଲାଳସା ବଢ଼ିଯାଇଥିଲା । ସେମାନେ ଦମ୍ପତିଙ୍କୁ ଭଡ଼ାଘର ଯୋଗାଇବା ସହ କାମଧନ୍ଦା ଖୋଜିଦେବାର ପ୍ରତିଶ୍ରୁତି ଦେଇଥିଲେ । ଅଜଣା ସହରରେ ଓଡିଆ ଦମ୍ପତି ବାଧ୍ୟ ହୋଇ ୩ ଜଣ ଅଚିହ୍ନାଙ୍କ କଥାରେ ବିଶ୍ୱାସ କରି ଯାଇଥିଲେ । ଏହାପରେ ୩ଜଣ କାମାନ୍ଧ ସେମାନଙ୍କୁ ଏକ ନିଛାଟିଆ ଜାଗାକୁ ନେଇଯାଇଥିଲେ । ସେଠାରେ ଏକ ପରିତ୍ୟକ୍ତ ଘରେ ବନ୍ଧୁକ ଦେଖାଇ ସ୍ୱାମୀଙ୍କୁ ଡରାଇ ପତ୍ନୀଙ୍କୁ ରାତିତମାମ ଦୁଷ୍କର୍ମ କରିଥିଲେ । ଥାନାରେ ଅଭିଯୋଗ କଲେ କି ଘଟଣା ସମ୍ପର୍କରେ କାହାରିକୁ ଜଣାଇଲେ, ଜୀବନରୁ ମାରିଦେବାକୁ ଧମକ ଦେଇଥିଲେ । ପରଦିନ ଓଡିଆ ଦମ୍ପତି ତିରୁପ୍ପୁର ଉତ୍ତର ଥାନାରେ ଲିଖିତ ଅଭିଯୋଗ କରିଥିଲେ । ପୁଲିସ ତତ୍ପର ହୋଇ ରେଳଷ୍ଟେସନର ସିସିକ୍ୟାମେରାରୁ ଅଭିଯୁକ୍ତମାନଙ୍କୁ ଚିହ୍ନଟ କରିଥିଲା । ସେମାନେ ରାଜ୍ୟ ବାହାରକୁ ଖସି ପଳାଇବାକୁ ଚେଷ୍ଟା କରୁଥିବା ବେଳେ ପୁଲିସ ୩ ଜଣଙ୍କୁ ମାଡି ବସିଛି ।
ସୂଚନାଯୋଗ୍ୟ, ତାମିଲ୍ନାଡୁର ତିରୁପ୍ପୁର ସହର ହେଉଛି ଟେକ୍ସଟାଇଲ୍ ହବ୍ । ଏଠାରେ ବିଭିନ୍ନ ରାଜ୍ୟରୁ ପାଖାପାଖି ୮ ଲକ୍ଷରୁ ଅଧିକ ପ୍ରବାସୀ କର୍ମଚାରୀ କାମ କରୁଛନ୍ତି । ଲକ୍ଷାଧିକ ଓଡି଼ଆ ମଧ୍ୟ ଏହି ଟେକ୍ସଟାଇଲ୍ ହବ୍ରେ ଦୀର୍ଘ ବର୍ଷ ଧରି କାମ କରି ଆସୁଛନ୍ତି ।
