ନୂଆଦିଲ୍ଲୀ, ୪।୬: ଜ୍ୟୋତିଙ୍କ ପରେ ଆଉ ଜଣେ ୟୁଟ୍ୟୁବର୍ ଗିରଫ । ପଞ୍ଜାବର ଜଣେ ୟୁଟ୍ୟୁବର୍ଙ୍କୁ ଗୁପ୍ତଚର ସନ୍ଦେହରେ ଗିରଫ କରିଛି ପୁଲିସ୍ । ଭାରତରେ ରହି ପାକିସ୍ତାନ ପାଇଁ ଗୁପ୍ତଚର ସାଜିଥିବା ଅନେକ ଜଣଙ୍କୁ ପୂର୍ବରୁ ପୁଲିସ୍ ଗିରଫ କରିଛି । ସେମାନଙ୍କ ମଧ୍ୟରେ କିଛି ୟୁଟ୍ୟୁବର୍ ବି ଅଛନ୍ତି । ବୁଧବାର ପଞ୍ଜାବ ପୁଲିସ ଆଉ ଜଣେ ୟୁଟ୍ୟୁବର ଜସବୀର ସିଂହଙ୍କୁ ଗିରଫ କରିଛି । ଜସବୀର ପଞ୍ଜାବର ରୂପନଗର ଜିଲ୍ଲା ମହଲାନ ଗାଁର ବାସିନ୍ଦା । ଭାରତ ସହ ବିଶ୍ୱାସଘାତକତା କରିବା ଅଭିଯୋଗରେ ଗିରଫ କରାଯାଇଛି । ତାଙ୍କ ଚ୍ୟାନେଲର ନାଁ "ଜାନ ମହଲ୍" ଏବଂ ତାଙ୍କର ୧.୧ ମିଲିୟନ୍ରୁ ଅଧିକ ସବସ୍କ୍ରାଇବର୍ ଅଛନ୍ତି । କୁହାଯାଉଛି ଯେ, ଜସବୀର ସିଂହଙ୍କର ଜ୍ୟୋତି ମାଲହୋତ୍ରାଙ୍କ ସହିତ ମଧ୍ୟ ସମ୍ପର୍କ ଅଛି । ଗୁପ୍ତଚର ସୂଚନା ଆଧାରରେ ମୋହାଲିର ଷ୍ଟେଟ୍ ସ୍ପେଶାଲ୍ ଅପରେସନ୍ସ ସେଲ୍ ଦ୍ୱାରା ହେପାଜତକୁ ନିଆଯାଇଛି ।
ପଞ୍ଜାବ ପୁଲିସ୍ର ଡିଜିପିଙ୍କ ଅନୁଯାୟୀ, ଜସବୀର ସିଂହଙ୍କର ଅନେକ ଭାରତୀୟ ବଂଶୋଦ୍ଭବ ବ୍ୟକ୍ତି (ପିଆଇଓ)ଙ୍କ ସହିତ ସମ୍ପର୍କ ଥିଲା, ଯେଉଁମାନେ ପାକିସ୍ତାନୀ ହ୍ୟାଣ୍ଡଲରଙ୍କ ପାଇଁ କାମ କରୁଥିବା ସନ୍ଦେହ କରାଯାଉଛି । ଜସବୀର ସିଂହ ଏହସାନ-ଉର-ରହିମ ଓରଫ ଡାନିଶଙ୍କ ସହିତ ସମ୍ପର୍କ ବଜାୟ ରଖିଥିଲେ । ଯିଏ ଜଣେ ପାକିସ୍ତାନୀ ନାଗରିକ ଏବଂ ଦିଲ୍ଲୀରେ ପାକିସ୍ତାନ ହାଇକମିସନର ପୂର୍ବତନ ଅଧିକାରୀ ଥିଲେ । ଯାହାଙ୍କୁ ପୂର୍ବରୁ ଗୁପ୍ତଚର ଅଭିଯୋଗରେ ବହିଷ୍କାର କରାଯାଇଥିଲା । ଅଧିକାରୀମାନେ କହିଛନ୍ତି ଯେ, ତାଙ୍କ ଇଲେକ୍ଟ୍ରୋନିକ୍ ଡିଭାଇସଗୁଡ଼ିକର ଫରେନସିକ୍ ବିଶ୍ଳେଷଣରୁ ଅନେକ ପାକିସ୍ତାନ-ଭିତ୍ତିକ ଯୋଗାଯୋଗ ନମ୍ବର ପ୍ରକାଶ ପାଇଛି, ଯାହା ଏବେ ତଦନ୍ତାଧୀନ ।
ମିଡିଆ ରିପୋର୍ଟ ଅନୁଯାୟୀ, ଜସବୀର ସିଂହ ପାକିସ୍ତାନୀ ଗୁପ୍ତଚର ଅଧିକାରୀ ଶାକିର ଓରଫ ଜୁଟ୍ ରନ୍ଧାୱାଙ୍କ ସହିତ ମଧ୍ୟ ଘନିଷ୍ଠ ସମ୍ପର୍କ ରଖିଥିଲେ । ଯିଏକି ଆଇଏସ୍ଆଇ ପାଇଁ କାର୍ଯ୍ୟ କରୁଥିବା ସନ୍ଦେହ କରାଯାଉଛି । କେବଳ ଏତିକି ନୁହେଁ, ସେ ତିନିଥର ପାକିସ୍ତାନ ଯାତ୍ରା ମଧ୍ୟ କରିଛନ୍ତି । ସେ ୨୦୨୦ ମସିହାରେ ପ୍ରଥମ ଥର ପାଇଁ ପାକିସ୍ତାନ ଯାଇଥିଲେ । ଏହା ପରେ ସେ ୨୦୨୧ ଏବଂ ୨୦୨୪ ମସିହାରେ ମଧ୍ୟ ପାକିସ୍ତାନ ଯାତ୍ରା କରିଥିଲେ । ପୁଲିସ୍ର ଅନୁଯାୟୀ, ମେ ମାସରେ ଜ୍ୟୋତି ମାଲହୋତ୍ରାଙ୍କୁ ଗିରଫ କରିବା ସମୟରେ ଜସବୀର ପିଆଇଓଙ୍କ ସହିତ ତାଙ୍କର ସମସ୍ତ ଯୋଗାଯୋଗ ବିଷୟବସ୍ତୁ ଏବଂ ପ୍ରମାଣକୁ ମଧ୍ୟ ହଟାଇ ଦେବାକୁ ଚେଷ୍ଟା କରିଥିଲେ, ଯାହା ଫଳରେ ସେ ପୁଲିସ୍ କାର୍ଯ୍ୟାନୁଷ୍ଠାନରୁ ବଞ୍ଚିପାରିବେ । ଏହି ପ୍ରସଙ୍ଗରେ, ମୋହାଲିର ଏସଏସଓସିରେ ଏହି ମାମଲାରେ ଏକ ମାମଲା ରୁଜୁ କରାଯାଇଛି । ବର୍ତ୍ତମାନ, ପୁଲିସ୍ ସମ୍ପୂର୍ଣ୍ଣ ମାମଲାର ତଦନ୍ତ କରୁଛି । ପଞ୍ଜାବ ପୁଲିସ୍ର ଡିଜିପି କହିଛନ୍ତି ଯେ, ଗୁପ୍ତଚର ନେଟୱାର୍କର ପରିମାଣ ଖୋଜିବା ଏବଂ ଅତିରିକ୍ତ ସହଯୋଗୀମାନଙ୍କୁ ଚିହ୍ନଟ କରିବା ପାଇଁ ଏକ ବିସ୍ତୃତ ତଦନ୍ତ ଚାଲିଛି । ଡିଜିପି କହିଛନ୍ତି, ‘ପଞ୍ଜାବ ପୁଲିସ୍ ଜାତୀୟ ସୁରକ୍ଷାକୁ ରକ୍ଷା କରିବା ପାଇଁ ଦୃଢ଼ ପ୍ରତିବଦ୍ଧ ଏବଂ ଆମ ମାଟିରେ ଜାତୀୟ ବିରୋଧୀ ତତ୍ତ୍ୱଗୁଡ଼ିକୁ ବୃଦ୍ଧି କରିବାକୁ ଦେବ ନାହିଁ ।’
