ଭଦ୍ରକ,୨୨।୧ : ପୁରୀ ଅଭିମୁଖେ ଯାଉଥିବା ଏକ ତୀର୍ଥଯାତ୍ରୀ ବସରେ ଲାଗିଲା ନିଆଁ, ଅଳ୍ପକେ ବର୍ତ୍ତିଲେ ଯାତ୍ରୀ । ୧୬ ନଂ ଜାତୀୟ ରାଜପଥର ନଳାଙ୍ଗ ଛକ ନିକଟରେ ଅଘଟଣ ଘଟିଛି । ବସରେ ଲାଗିଥିବା ନିଆଁକୁ ଆୟତ୍ତ କରାଯାଇଥିଲେ ମଧ୍ୟ ଆଞ୍ଚଳିକ ପରିବହନ ବିଭାଗ ଦ୍ଵାରା ଅନ୍ୟ ଏକ ଗାଡ଼ିରେ ଯାତ୍ରୀଙ୍କୁ ପୁରୀ ପଠାଯାଇଥିଲା।
ପୁରୀ ଅଭିମୁଖେ ୪୦ ଜଣ ତୀର୍ଥଯାତ୍ରୀଙ୍କୁ ନେଇ ବସଟି ଯାଉଥିଲା। ୧୬ ନମ୍ୱର୍ ଜାତୀୟ ରାଜପଥର ନଳାଙ୍ଗ ଛକ ନିକଟରେ ବସ ପଛରେ ନିଆଁ ଲାଗିଯାଇଥିଲା । ଏହି ସମୟରେ ଭଦ୍ରକ ଆରଟିଓ ବାମଦେବ ସାହୁ ଉକ୍ତ ରାସ୍ତାରେ କୌଣସି କାର୍ଯ୍ୟରେ ଯାଉଥିଲେ । ବସରେ ନିଆଁ ଲାଗିଥିବା ଦେଖି ଅଗ୍ନି ନିର୍ବାପକ ଯନ୍ତ୍ରରେ ନିଆଁ ଲିଭାଇବା ପରେ ଯାତ୍ରୀଙ୍କୁ ଉଦ୍ଧାର କରିଥିଲେ । ପରେ ବସଟିକୁ ଅଟକ ରଖି ଆରଟିଓ ଅନ୍ୟ ଏକ ବସରେ ଯାତ୍ରୀଙ୍କୁ ପୁରୀ ପଠାଇଥିଲେ।
