ଚାନ୍ଦବାଲି,୧୭/୦୧: ଗ୍ରାହକଙ୍କ ଆକାଉଣ୍ଟରୁ ଆପେ ଆପେ ଗାଏବ ହେଉଛି ଟଙ୍କା । ଭଦ୍ରକ ଜିଲ୍ଲା ଚାନ୍ଦବାଲି ଥାନା ଅଧୀନସ୍ଥ ବିଜୟ ନଗର ଗାଁରେ ଜଣଙ୍କ ଆକାଉଣ୍ଟରୁ ୮୫ ହଜାର ଗୋଲ୍ ହେବା ପରେ ସେହି ଗାଁର ଆଉ ଜଣଙ୍କ ଆକାଉଣ୍ଟରୁ ଆପେ ଆପେ କଟିଲା ୩୫ ହଜାର ଟଙ୍କା । ଏବେ କାହା ଭରସାରେ ଟଙ୍କା କେଉଁଠି ରଖିବେ, ଚିନ୍ତାରେ ଗ୍ରାହକ । ଗୋଟିଏ ପରେ ଗୋଟେ ସାଇବର ଠକେଇରେ ଶିକାର ହେଉଛନ୍ତି ଗାଁ ଗଣ୍ଡାରେ ଲୋକେ। କିଏ ଦାଦନ ଖଟି ସଞ୍ଚିତ ରଖିଥିବା ଟଙ୍କା ତ ପୁଣି ଆଉ କିଏ ମଜୁରି ଲାଗି ସାଇତି ରଖିଥିବା ଟଙ୍କାକୁ ଆକାଉଣ୍ଟରୁ ଲୁଟ୍ କରା ଯାଉଛି । ସ୍ଵାମୀଙ୍କ ପରିଶ୍ରମରେ ଶଶ୍ମିତା ନାଥଙ୍କ ଆକାଉଣ୍ଟରେ ରଖିଥିବା ଟଙ୍କା ୩୪ ହଜାର ୪୦୦ ଟଙ୍କା ଆକାଉଣ୍ଟରୁ ଗୋଲ୍ ହୋଇ ଯାଇଛି।
ସୂଚନା ମୁତାବକ, ବିଜୟ ନଗର ଗାଁର ସନାତନ ନାଥଙ୍କ ପତ୍ନୀ ଶଶ୍ମିତା ନାଥଙ୍କ ଚାନ୍ଦବାଲି ଷ୍ଟେଟ ବ୍ୟାଙ୍କ ଆକାଉଣ୍ଟରେ ୨୦୨୫ ଜାନୁଆରୀ ୬ ତାରିଖରେ ୪ ହଜାର ୪୦୦ ଟଙ୍କା କଟିଥିବା ବେଳେ ପୁଣି ୯ ତାରିଖରେ ୩୦ ହଜାର ଟଙ୍କା କୁଆଡେ ଗୋଲ୍ ହୋଇ ଥିଲା । କୋୖଣସି ଓଟିପି ନଦେଇ ଆକାଉଣ୍ଟରେ ଟଙ୍କାକୁ କିଏ ନେଉଛି ଏଥି ପାଇଁ ଚିନ୍ତାର କାରଣ ହୋଇଛି । ଚୋରି ଭୟରେ ଲୋକେ ଘରେ ଟଙ୍କା ନରଖି ବ୍ୟାଙ୍କରେ ରଖୁଥିବା ବେଳେ ଯଦି ଆପେ ଆପେ ଆକାଉଣ୍ଟରେ ଥିବା ଟଙ୍କାକୁ ହଡ଼ପ ହେଉଛି ସେଥିପାଇଁ ବ୍ୟାଙ୍କ କର୍ତ୍ତୃପକ୍ଷ ଦାୟି ବୋଲି ଅଭିଯୋଗ କରିଛନ୍ତି ପରିବାର ସମେତ ଗ୍ରାମବାସୀ । ନ୍ୟାୟ ପାଇଁ ଥାନା ଠୁ ବ୍ୟାଙ୍କ ଏବଂ ବ୍ୟାଙ୍କ ଠୁ ଥାନା ପର୍ଯ୍ୟନ୍ତ ଗ୍ରାହକ ଦୌଡ଼ି ଦୌଡ଼ି ନୟାନ୍ତ ହେଲେଣି କିନ୍ତୁ ଟଙ୍କା ଠକେଇରେ କୋୖଣସି ପତ୍ତା ମିଳି ନାହିଁ । ଏବେ ଏହି ଗାଁରେ ଏମିତି ଗୋଟେ ପରେ ଗୋଟେ ସାଇବର ଠକେଇରେ ଶିକାର ହେଉଥିବା ବେଳେ ଲୋକଙ୍କ ମଧ୍ୟରେ କୋକୁଆ ଭୟ ସୃଷ୍ଟି କରିଛି ।
