ପାଟନା: ଚଳିତ ବର୍ଷ ବିହାରରେ ବିଧାନସଭା ନିର୍ବାଚନ ହେବାକୁ ଯାଉଛି । ଏଡା ପୂର୍ବରୁ ଲାଲୁ ପ୍ରସାଦ ଯାଦବଙ୍କ ଦଳ ଆରଜେଡି ନିଷ୍ପତ୍ତି ନେଇଛି ଯେ, ଅପରାଧୀଙ୍କୁ ଟିକେଟ୍ ଦିଆଯିବ ନାହିଁ । ଗୁରୁବାର ସାମ୍ବାଦିକ ସମ୍ମିଳନୀରେ ଦଳର ମୁଖପାତ୍ର ଶକ୍ତି ସିଂହ ଯାଦବ ଏହା କହିଛନ୍ତି । ତେଜସ୍ବୀ ରାଜରେ ଅପରାଧୀଙ୍କ କୌଣସି ସ୍ଥାନ ନାହିଁ ବୋଲି ସେ କହିଛନ୍ତି । ଏହା ସହ ମୋକାମାରେ ହୋଇଥିବା ଗୁଳି କାଣ୍ଡ ମାମଲାକୁ ନେଇ ଶକ୍ତି ସିଂହ କହିଛନ୍ତି, ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ ଏ ସଂପର୍କରେ ଜଣାନଥିବ ।
ପାଟନାରେ ଏକେ-୪୭ର ତାଣ୍ଡବ ଚାଲିଛି । ଥାନାରୁ କିଛି ଦୂରରେ ଗୁଳି ମାଡ଼ ହେଉଛି, ଦୋଷୀ କହୁଛି ଏଫଆଇଆରକୁ ଖାତିର ନାହିଁ । ଜଣେ ଲୋକ ପୂରା ସରକାରୁ ଚ୍ୟାଲେଞ୍ଜ କରୁଛି । ଶାସକ ଦଳର ସାହାରାରେ ଥିବା ଅପରାଧୀ ନିଡର ହୋଇ ବୁଲୁଛି ବୋଲି ସେ ଅଭିଯୋଗ କରିଛନ୍ତି । ଶକ୍ତି ସିଂହ କହିଛନ୍ତି, ବିହାରରେ ଅପରାଧ ବଢ଼ିବାରେ ଲାଗିଛି । ପ୍ରତିଦିନ ଶାସକ ଦଳର ଛତ୍ରଛାୟା ତଳେ ଥିବା ଅପରାଧୀ ଅପରାଧ ଘଟାଉଛନ୍ତି । ଯେଉଁମାନେ ୨୦୦୫ ପୂର୍ବରୁ ନିଜକୁ ବାହୁବଳୀ କହୁଥିଲେ ସେମାନେ ସବୁ ଜେଡିୟୁରେ ସାମିଲ ହୋଇଗଲେଣି । ସବୁ ଅପରାଧୀଙ୍କୁ ଜେଡ୍ ସୁରକ୍ଷା ଦିଆଯାଉଛି ।
ଆରଜେଡି ନେତା ଆହୁରି କହିଛନ୍ତି ଯେ, ଏଭଳି ଅପରାଧୀଙ୍କୁ ସୁପ୍ରିମ ବସ୍ଙ୍କ ସୁରକ୍ଷା ମିଳୁଛି । ସୁପ୍ରିମ ବସ୍ ଦିଲ୍ଲୀରେ ବସି ମାମଲାର ରଫାଦଫା କରୁଛନ୍ତି । ଏମିତିରେ ଅପରାଧ କାହିଁକି ହେବନି ବୋଲି ସେ ପ୍ରଶ୍ନ କରିଛନ୍ତି । ଆରଜେଡି ସାଂସଦ ସଂଜୟ ଯାଦବଙ୍କୁ ଧମକ ମିଳୁଛି । ଡିଜିପିଙ୍କ ସମେତ ବହୁ ଅଧିକାରୀଙ୍କୁ ପତ୍ର ଲେଖି ଅଭିଯୋଗ କଲୁ କିନ୍ତୁ କିଛି ଲାଭ ହେଲା ନାହିଁ । ଅପରାଧୀଙ୍କୁ ବଞ୍ଚାଇବା ଲାଗି ନିୟମର ପରିବର୍ତ୍ତନ କରାଯାଉଛି ବୋଲି ଅଭିଯୋଗ କରିଛନ୍ତି ଆରଜେଡି ନେତା ଶକ୍ତି ସିଂହ ଯାଦବ ।
