ଭଦ୍ରକ, ୧୦/୦୧ : ଘର ମାଲିକାଣୀ ନଥିବା ବେଳେ କଳାକନା ବୁଲାଇଦେଲେ ଭଡ଼ାଟିଆ। ତାଲା ଭାଙ୍ଗି ନଗଦ ଟଙ୍କା ସହ ସୁନା ଗହଣା ଓ ଅନ୍ୟାନ୍ୟ ସାମଗ୍ରୀ କଲେ ଚୋରି। ଭଦ୍ରକ ସହରାଞ୍ଚଳ ଥାନା ଅଧୀନ କୁଆଂସ ଅଞ୍ଚଳର କଲ୍ୟାଣୀ ସାହୁଙ୍କ ଘରୁ ଚୋରି ହୋଇଛି। ତଲାସି ବେଳେ ଭଡାଟିଆଙ୍କ ଘରୁ ଚୋରି ଜିନିଷ ଉଦ୍ଧାର ହୋଇଥିଲେ ବି ପୋଲିସ କାର୍ଯ୍ୟାନୁଷ୍ଠାନ ନେଉନି। ଯାହାଫଳରେ ଘର ମାଲିକାଣୀ ଏସ୍ପିଙ୍କ ଦ୍ଵାରସ୍ଥ ହୋଇଛନ୍ତି।
ସୂଚନାନୁଯାୟୀ, ଭଦ୍ରକ ସହରାଞ୍ଚଳ ଥାନା ଅଧୀନ କୁଆଂସ ଅଞ୍ଚଳର କଲ୍ୟାଣୀ ସାହୁ ଘରେ ନଥିବା ବେଳେ ତାଙ୍କ ଘରୁ ନଗଦ ଟଙ୍କା ଓ ସୁନା ଚୋରି ହୋଇଥିଲା। ସହରାଞ୍ଚଳ ଥାନାରେ ଅଭିଯୋଗ ପରେ ପୋଲିସ ସନ୍ଦେହରେ ଭଡ଼ାରେ ରହୁଥିବା ଦୁଇ ଜଣଙ୍କୁ ପଚରାଉଚରା କରିଥିଲେ। ପରେ ଯାଞ୍ଚ ବେଳେ ଭଡାଟିଆଙ୍କ ଘରୁ କିଛି ଚୋରି ଜିନିଷ ଜବତ ହୋଇଥିଲା। ତେବେ ଚୋରି ଜିନିଷ ମିଳିବା ସତ୍ତ୍ଵେ ପୋଲିସ ଭଡାଟିଆଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନେଉନି। ଯାହାଫଳରେ ଘର ମାଲିକାଣୀ କାର୍ଯ୍ୟାନୁଷ୍ଠାନ ଦାବିରେ ଏସପିଙ୍କ ଦ୍ଵାରସ୍ଥ ହୋଇଛନ୍ତି।
