ଚାନ୍ଦବାଲି,୨୧/୧୨: ବିବାହକୁ ପୁରିନି ୫ ମାସ । ଯୌତୁକ ଜୁଇରେ ଜଳିଲା ବୋହୂ । କେନ୍ଦ୍ରାପଡ଼ା ଜିଲ୍ଲା ହଟିଆପଡା ଗାଁର ବୁଦ୍ଧଦେବ ସାହୁଙ୍କ ଝିଅ ଅନୁସୟା ସାହୁଙ୍କୁ ତାଙ୍କ ଶାଶୁଘର ଲୋକ ଯୌତୁକ ପାଇଁ ହତ୍ୟା କରିଥିବା ନେଇ ଅଭିଯୋଗ କରିଛନ୍ତି ବାପଘର ଲୋକ । ଭଦ୍ରକ ଜିଲ୍ଲା ଚାନ୍ଦବାଲି ଏନଏସି ଅନ୍ତର୍ଗତ କୃଷ୍ଣପୁର ୨ନମ୍ବର ୱାର୍ଡରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ହଟିଆପଡା ଗାଁର ବୁଦ୍ଧଦେବ ସାହୁଙ୍କ ଝିଅ ଅନୁସୟା ସାହୁ ଚଳିତ ବର୍ଷ ଚାନ୍ଦବାଲି ଏନଏସି କୃଷ୍ଣପୁର ୱାର୍ଡର ଲକ୍ଷ୍ମୀଧର ବେହେରାଙ୍କ ପୁଅ ଚିତ୍ତରଞ୍ଜନ ବେହେରାଙ୍କୁ ବୈଦିକ ରୀତିରେ ବିବାହ କରିଥିଲେ । ବିବାହର ଆଠ ଦିନ ପରେ ଯୌତୁକ ପାଇଁ ଝିଅ ଅନୁସୟାଙ୍କୁ ଶାରୀରିକ ଓ ମାନସିକ ନିର୍ଯାତନା ଦେଇଥିଲେ । ଶେଷରେ ଜୀବନରୁ ମାରି ଦେଇଛନ୍ତି ବୋଲି ଚାନ୍ଦବାଲି ଥାନାରେ ଅଭିଯୋଗ କରିଛନ୍ତି ମୃତକଙ୍କ ମା ସୁକାନ୍ତି ସାହୁ । ମୃତ ମହିଳାଙ୍କ ମାଆ ଥାନାରେ ନିଜ ଜ୍ୱାଇଁଙ୍କ ସମେତ ଅନ୍ୟ ଚାରି ଜଣଙ୍କ ନାମରେ ଅଭିଯୋଗ କରିଛନ୍ତି । ଅଭିଯୋଗ ପରେ ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏହା ସହ ଘଟଣାର ତଦନ୍ତ ଚଳାଇଛି ପୋଲିସ ।
