ନୂଆଦିଲ୍ଲୀ: ବିହାରରେ ବିଜେପିର କାର୍ଯ୍ୟକ୍ରମରୁ ଏକ ଆଶ୍ଚର୍ଯ୍ୟଜନକ ଖବର ଆସିଛି। ଏହି କାର୍ଯ୍ୟକ୍ରମରେ 'ଇଶ୍ୱର-ଆଲ୍ଲାହା ତେରୋ ନାମ' ଗୀତକୁ ନେଇ ବିବାଦ ଉପୁଜିଛି। ବାସ୍ତବରେ, ଡିସେମ୍ବର୨୫ରେ ଦେଶର ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ଜନ୍ମଦିନ ଅବସରରେ ପାଟନାରେ ବିଜେପି ଏକ ବଡ କାର୍ଯ୍ୟକ୍ରମ ଆୟୋଜନ କରିଥିଲା।ଏହି କାର୍ଯ୍ୟକ୍ରମର ନାମ ଥିଲା 'ମେଁ ଅଟଳ ରାହୁଙ୍ଗା'। ଏହି କାର୍ଯ୍ୟକ୍ରମରେ ଭୋଜପୁରୀ ଗାୟିକା ଦେବୀଙ୍କୁ ନିମନ୍ତ୍ରଣ କରାଯାଇଥିଲା। ତେବେ ଏହି କାର୍ଯ୍ୟକ୍ରମରେ ଦେବୀଙ୍କ ଗୋଟିଏ ଗୀତକୁ ନେଇ ଏକ ବଡ଼ ଧରଣର ଗଣ୍ଡଗୋଳ ହୋଇଥିଲା।
ଯେତେବେଳେ ଦେବୀ ଏହି କାର୍ଯ୍ୟକ୍ରମରେ ମହାତ୍ମା ଗାନ୍ଧୀଙ୍କ ଭଜନ 'ରଘୁପତି ରାଘବ ରାଜା ରାମ-ପତିତ ପାବନ ସୀତା ରାମ' ସବକୋ ସମ୍ମତି ଦେ ଭଗବାନ୍ କୁ ଗାଇବା ଆରମ୍ଭ କରିଥିଲେ, ସେତେବେଳେ ବିଜେପିର ଲୋକମାନେ ଉତ୍ତେଜନା ସୃଷ୍ଟି କରିବା ଆରମ୍ଭ କରିଥିଲେ। ବିଜେପି ଲୋକମାନେ ଉତ୍ତେଜନା ସୃଷ୍ଟି କରିବା ପରେ ଦେବୀଙ୍କୁ ସେଠାରେ କ୍ଷମା ମାଗିବାକୁ ପଡିଲା। ଏହି ପ୍ରସଙ୍ଗରେ ଗାୟିକା ଦେବୀ କହିଛନ୍ତି ଯେ ଅବଶ୍ୟ ମୋତେ କ୍ଷମା ମାଗିବାକୁ ପଡିଲା, କିନ୍ତୁ ଆମେ ବିଶ୍ୱାସ କରୁ ଯେ ହିନ୍ଦୁ, ମୁସଲମାନ, ଶିଖ, ଖ୍ରୀଷ୍ଟିଆନ ସମସ୍ତେ ଗୋଟିଏ ଏବଂ ମହାତ୍ମା ଗାନ୍ଧୀଙ୍କ ଏହି ଭଜନ ଏହାକୁ ପ୍ରତିଫଳିତ କରିଥାଏ।
ଭୋଜପୁରୀ ଗାୟିକା ଦେବୀ ଆହୁରି ମଧ୍ୟ କହିଛନ୍ତି ଯେ, ଆମ ମଧ୍ୟରେ ଏକତା ରହିବା ଉଚିତ୍ । ଯଦି ମୁସଲମାନ ମାନେ ହିନ୍ଦୁ ମାନଙ୍କ ପ୍ରତି ଅନ୍ୟାୟ କରୁଛନ୍ତି, ଏହାର ଅର୍ଥ ନୁହେଁ ଯେ ହିନ୍ଦୁମାନେ ମଧ୍ୟ ତାହା କରିବା ଉଚିତ୍। ଦେବୀ କହିଛନ୍ତି ଯେ ଆମେ ମାନବିକତାକୁ ଗ୍ରହଣ କରିବା ଉଚିତ୍ । ମାନବିକତା ସର୍ବଶ୍ରେଷ୍ଠ । ମୋର ଅନୁଭବ ହେଉଛି ମାନବିକତା ହେଉଛି ସବୁଠାରୁ ବଡ଼ ଧର୍ମ ଏବଂ ମୁଁ ଏଥିରେ ବିଶ୍ୱାସ କରେ ।
ଏହି ଘଟଣାରେ ଆରଜେଡି ସୁପ୍ରିମୋ ଲାଲୁ ପ୍ରସାଦ ଯାଦବ ବିଜେପି ଉପରେ ତୀବ୍ର ଆକ୍ରମଣ କରିଛନ୍ତି। ଲାଲୁ ଯାଦବ କହିଛନ୍ତି "ଗତକାଲି ପାଟନାରେ ଯେତେବେଳେ ଜଣେ ଗାୟିକା ଗାନ୍ଧିଜୀଙ୍କ ଭଜନ 'ରଘୁପତି ରାଘବ ରାଜା ରାମ, ଗୀତ ଗାଇଥିଲେ, ନୀତୀଶ କୁମାରଙ୍କ ସହକର୍ମୀ ବିଜେପି ସଦସ୍ୟମାନେ ଏକ ବିଶୃଙ୍ଖଳା ସୃଷ୍ଟି କରିଥିଲେ। ଆଉ ଶେଷରେ ଭଜନ ଗାୟିକା ଦେବୀଙ୍କୁ କ୍ଷମା ମାଗିବାକୁ ପଡ଼ିଲା।
