ନୂଆଦିଲ୍ଲୀ: ନିଜ ଟିକସ ବ୍ୟବସ୍ଥା ପାଇଁ ହରଡ ଘଣାରେ ସରକାର। ସାମାଜିକ ଗଣମାଧ୍ୟମ ଠୁ ନେଇ ସର୍ବସାଧାରଣରେ ଏହି ଟିକସ ବ୍ୟବସ୍ଥା ଉପରେ ପ୍ରଶ୍ନ ଉଠିବାରୁ ଅକଳରେ ଦେଶର ଶାସକ ଦଳ। ଏହାକୁ ନେଇ ଚାରିଆଡୁ ଟ୍ରୋଲ ହେବା ଏବେ ସରକାରଙ୍କ କରୁଣା ଦୃଷ୍ଟି ମଧ୍ୟବିତଙ୍କ ଉପରେ ପଡ଼ିପାରେ ବୋଲି ଚର୍ଚ୍ଚା ଜୋର ଧରିଛି। ବର୍ଷକୁ ୧୦ ଲକ୍ଷ ୫୦ ହଜାର ରୋଜଗାର କରୁଥିବା ବ୍ୟକ୍ତିଙ୍କ ପାଇଁ କେନ୍ଦ୍ର ସରକାର ଆୟକର କୋହଳ କରିପାରନ୍ତି ବୋଲି ଏକ ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଛି।
ମଧ୍ୟବିତ୍ତଙ୍କ ଉପରେ ପଡ଼ୁଥିବା ଆୟକର ଚାପକୁ ନେଇ ନିକଟରେ କେନ୍ଦ୍ର ସରକାର ଅନେକ ସମାଲୋଚିତ ହୋଇଛନ୍ତି। ସେପଟେ ଜୀବନ ଧାରଣ ମୂଲ୍ୟ ବଢ଼ି ଚାଲୁଥିବା ବେଳେ ମନ୍ଥର ଗତୀରେ ବଢୁଥିବା ଅର୍ଥନୀତି ସରକାରଙ୍କୁ ଚିନ୍ତାର ପକାଇଛି। ତେଣୁ ଖର୍ଚ୍ଚ(କଞ୍ଜପସନ) ବଢ଼ାଇକୁ କେନ୍ଦ୍ର ସରକାର ଟ୍ୟାକ୍ସ କୋହଳ କରିବାକୁ ଚିନ୍ତା କରୁଛନ୍ତି ବୋଲି ଖବର ମିଳିଛି।
ଏକ ବିଶେଷ ସୂତ୍ରରୁ ଖବର ପାଇ ଅନ୍ତର୍ଜାତୀୟ ଗଣମାଧ୍ୟମ ରୟଟର୍ସ ଏନେଇ ଖବର ପ୍ରକାଶ କରିଛି। ରିପୋର୍ଟରେ କୁହାଯାଇଛି ଯେ ୨୦୨୫ ଫେବ୍ରୁଆରୀ ୧ ବଜେଟ୍ ସେସନ୍ରେ ଏହା ଘୋଷଣା କରାଯିବାର କାର୍ଯ୍ୟକ୍ରମ ରହିଛି। ଖର୍ଚ୍ଚ ବଢ଼ାଇବା ସହିତ ଜୀବନ ଧାରଣ ମୂଲ୍ୟ ବୃଦ୍ଧିକୁ ହ୍ରାସ କରିବାକୁ ସରକାର ଏହି ନିଷ୍ପତ୍ତି ନେବେ। ସରକାରଙ୍କ ଏହି ନିଷ୍ପତ୍ତି କାର୍ଯ୍ୟକାରୀ ହେଲେ ବହୁତ ଲୋକ ଉପକୃତ ହେବେ। ବିଶେଷ କରି ସହରାଞ୍ଚଳରେ ଅତ୍ୟଧିକ ଖର୍ଚ୍ଚ ସହ ସଂଗ୍ରାମ କରୁଥିବା ଲୋକଙ୍କୁ ଏଥିରୁ ତ୍ରାହି ମିଳିବ।
୨୦୨୦ରେ ଜାରି ହୋଇଥିବା ନିୟମ ଅନୁସାରେ, ବର୍ତ୍ତମାନର ସରକାର ୩ ଲକ୍ଷରୁ ୧୦.୫ ଲକ୍ଷ ଟଙ୍କା ପର୍ଯ୍ୟନ୍ତ ଆୟ କରୁଥିବା ବ୍ୟକ୍ତିଙ୍କ ଉପରେ ୫% ରୁ ୨୦% ମଧ୍ୟରେ ଟିକସ ଲଗାଉଛନ୍ତି। ସେହିପରି ବାର୍ଷିକ ୧୦.୫ ଲକ୍ଷରୁ ଅଧିକ ଆୟରେ ୩୦% ଟିକସ ଲଗାଯାଉଛି। ତେବେ କେତେ ଆୟକର କାଟ କରାଯିବ ସେ ନେଇ କୌଣସି ସୂଚନା ମିଳି ନାହିଁ। ବଜେଟ ସେସନରେ ତାହା ସ୍ଥିର ହେବ ବୋଲି ଆଶା କରାଯାଉଛି।
