ଭୁବନେଶ୍ୱର,୧୮/୦୨: କଳିଙ୍ଗ ଷ୍ଟାଡିୟମରେ ଚାଲିଛି ଏଫ୍ଆଇଏଚ୍ ପ୍ରୋ ଲିଗ୍। ଆଜି ୩ଟି ମ୍ୟାଚ୍ ଖେଳାଯିବ । ଭାରତୀୟ ପୁରୁଷ ଦଳ ପ୍ରଥମ ଚରଣରେ ଜର୍ମାନୀକୁ ଭେଟିବ । ସେମିତି ପୁରୁଷରେ ଦ୍ୱିତୀୟ ମ୍ୟାଚ୍ ଇଂଲଣ୍ଡ-ସ୍ପେନ ମଧ୍ୟରେ ଖେଳାଯିବ । ଭାରତୀୟ ମହିଳା ଦଳ ପ୍ରଥମ ଚରଣରେ ସ୍ପେନକୁ ଭେଟିବାର ସୂଚୀ ରହିଛି ।
ଭାରତ-ଜର୍ମାନୀ: ପୂର୍ବ ମ୍ୟାଚ୍ରେ ଭାରତ ୨ଟି ମ୍ୟାଚ୍ ସ୍ପେନ ସହ ଖେଳିଥିଲା । ପ୍ରଥମ ମ୍ୟାଚ୍ରେ ୩-୧ ଗୋଲରେ ପରାଜିତ ହୋଇଥିଲା। କିନ୍ତୁ ଦ୍ୱିତୀୟ ମ୍ୟାଚ୍ରେ ୨-୦ରେ ବିଜୟୀ ହୋଇ ପଏଣ୍ଟ ଖାତା ଖୋଲିଥିଲା । ଜର୍ମାନୀ ଏକ ଶକ୍ତିଶାଳୀ ଦଳ, ଏଫ୍ଆଇଏଚ୍ ମାନ୍ୟତାରେ ଚତୁର୍ଥ ସ୍ଥାନରେ ରହିଛି । ପୂର୍ବରୁ ଦଳ ୪ଟି ମ୍ୟାଚ୍ ଖେଳି ଗୋଟିଏ ବିଜୟ ସହ ୪ ପଏଣ୍ଟ ପାଇଛି । ନେଦରଲାଣ୍ଡସ ଓ ବେଲଜିୟମକୁ ଭେଟିଥିଲା । କେବଳ ଗୋଟିଏ ମ୍ୟାଚରେ ନେଦରଲାଣ୍ଡସକୁ ହରାଇଛି । ଘରୋଇ ଭାରତ ବିପକ୍ଷରେ ଦଳ ଉନ୍ନତ ପ୍ରଦର୍ଶନ କରିବାକୁ ଲକ୍ଷ୍ୟ ରଖିଛି । ଭାରତ ବିଜୟ ଖାତା ଖୋଲିଛି । ତେଣୁ ଏହି ଧାରା ଜର୍ମାନୀ ବିପକ୍ଷରେ ଜାରି ରଖିବାକୁ ହର୍ମନପ୍ରୀତ ସିଂହଙ୍କ ନେତୃତ୍ୱାଧୀନ ଦଳ ଟାର୍ଗେଟ ରଖିଛି । ଭାରତୀୟ ଦଳ ୧୮ ଓ ୧୯ ତାରିଖରେ ଜର୍ମାନୀ ସହ ଖେଳିବ ।
ଭାରତ-ସ୍ପେନ (ମହିଳା): ମହିଳା ଦଳ ଘରୋଇ ଭେନ୍ୟୁରେ ଇଂଲଣ୍ଡ ବିପକ୍ଷରେ ଭଲ ପ୍ରଦର୍ଶନ କରିଥିଲେ । ପ୍ରଥମ ମ୍ୟାଚ୍ ଜିତିଥିବାବେଳେ ଦ୍ୱିତୀୟ ମ୍ୟାଚ୍ରେ ସୁଟଆଉଟ୍ରେ ପରାଜିତ ହୋଇଥିଲେ । କିନ୍ତୁ ସ୍ପେନ ବିପକ୍ଷରେ ଦଳ ପୁଣି ବିଜୟ ଧାରାକୁ ଫେରିବା ପାଇଁ ଲକ୍ଷ୍ୟ ରଖିଛି। ସ୍ପେନ ସହ ଦଳ ୨ଟି ମ୍ୟାଚ୍ ଖେଳି ସାରିବା ପରେ ଜର୍ମାନୀକୁ ଭେଟିବ ।
