ଭୁବନେଶ୍ୱର,୨୩/୦୨: ଫାର୍ମ୍ ହାଉସ୍ ଭିତରେ ପଶି ଗୁଳିମାଡ଼ କରିଲେ ୩ ଦୁର୍ବୁତ୍ତ । ଗୁଳିମାଡ଼ରେ ଚାଲିଗଲା ଫାର୍ମ ହାଉସ ମାଲିକଙ୍କ ଜୀବନ । ମୃତକ କଳାଙ୍ଗ ଚାକୁଣ୍ଡାନାଳୀର ଗୋବିନ୍ଦ ନାୟକ ବୋଲି ଜଣାପଡ଼ିଛି । ଗୁଳିକାଣ୍ଡର କାରଣ ବର୍ତ୍ତମାନ ଅସ୍ପଷ୍ଟ ରହିଛି । ଢେଙ୍କାନାଳ ଜିଲ୍ଲା ସଦର ଥାନା ଅନ୍ତର୍ଗତ ଫାଶୀଗାଁରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ଗୋବିନ୍ଦ ନାୟକ ଫାଶୀଗାଁରେ ଥିବା ନିଜ ଫାର୍ମ୍ ହାଉସ୍ରେ ଥିଲେ । ଏହି ସମୟରେ ହଠାତ ୩ ଜଣ ଦୁର୍ବୃତ୍ତ ଫାର୍ମ ହାଉସ୍ ଭିତରକୁ ପଶି ଆସିଥିଲେ । ଫାର୍ମ୍ ହାଉସ୍କୁ ଆସି ଗୋବିନ୍ଦଙ୍କ ଉପରକୁ ଗୁଳି ଚାଳନା କରିଥିଲେ । ଗୋବିନ୍ଦଙ୍କ ଛାତି, ପେଟ ଓ ଗୋଡ଼କୁ ୩ରାଉଣ୍ଡ ଗୁଳି ଚଳାଇଥିଲେ ଦୁର୍ବୃତ୍ତ । ଗୁଳି ମାଡ଼ ହେବା ପରେ ସେ ତଳେ ପଡ଼ି ଯାଇଥିଲେ । ଏହା ଦେଖି ଫାର୍ମ ହାଇସ୍ରେ ଥିବା ଲୋକମାନେ ତୁରନ୍ତ ତାଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରିଥିଲେ । ହେଲେ ସେଠାରେ ଡାକ୍ତର ତାଙ୍କଙ୍କୁ ମୃତ ଘୋଷଣା କରିଥିଲେ । ଏନେଇ ଖବର ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏହା ସହ ଘଟଣାର ତଦନ୍ତ ଚଳାଇଛି ପୋଲିସ ।
