ହିନ୍ଦୋଳ,୧୩/୦୧: ଘର ଭିତରେ ମିଳିଲା ମହିଳାଙ୍କ ମୃତଦେହ । ହତ୍ୟା ଅଭିଯୋଗ ଆଣିଲେ ମହିଳାଙ୍କ ବାପଘର ଲୋକ । ଏହି ହତ୍ୟାର କାରଣ ଅସ୍ପଷ୍ଟ ଥିବା ବେଳେ ସ୍ୱାମୀ ଦିପୁ ଦେହୁରୀଙ୍କୁ ଅଟକ ରଖାଯାଇଛି । ମୃତ ମହିଳା ଜଣକ ରାସୋଳ ଥାନା କପିସାହି ଗ୍ରାମର ବଲ୍ଲୀ ଦେହୁରୀ (୨୬) ବୋଲି ଜଣା ପଡ଼ିଛି । ଢେଙ୍କାନାଳ ଜିଲ୍ଲା ରାସୋଳ ଥାନା କପିସାହିରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ସୋମବାର ବଲ୍ଲୀ ଦେହୁରୀଙ୍କୁ କେହି ଜଣେ ହତ୍ୟା କରିଥିଲା । ହତ୍ୟା ପରେ ମହିଳାଙ୍କ ମୃତଦେହ ଘର ଭିତରେ ଦେଖିବାକୁ ପାଇଥିଲେ ସ୍ଥାନୀୟଲୋକେ । ଏହା ଦେଖି ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ପୋଲିସ ପହଞ୍ଚିଥିଲା । ସେଠାରେ ପହଞ୍ଚି ଘର ଭିତରୁ ମହିଳାଙ୍କ ମୃତଦେହ ଉଦ୍ଧାର କରିଛି ରାସୋଳ ପୋଲିସ । ମହିଳାଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି ପୋଲିସ । ଏହା ସହ ମହିଳାଙ୍କ ସ୍ୱାମୀ ଦିପୁ ଦେହୁରୀଙ୍କୁ ରାସୋଳ ଥାନାରେ ଅଟକ ରଖି ପୋଲିସ ଘଟଣାର ତଦନ୍ତ ଚଳାଇଛି । ଅନ୍ୟପଟେ ଏହି ଘଟଣା ପରେ ମହିଳାଙ୍କ ବାପଘର ଲୋକେ ହତ୍ୟା ଅଭିଯୋଗ ଆଣିଛନ୍ତି ।
