ଢେଙ୍କାନାଳ, ୦୯/୦୧ : ଢେଙ୍କାନାଳ ସଦର ଥାନା ପଞ୍ଚୁବଟି ସ୍ଥିତ ଏସବିଆଇ ଏଟିଏମ୍ରୁ ଲୁଟ୍। ଲକ୍ଷାଧିକ ଟଙ୍କା ଲୁଟି ନେବା ପରେ ସିସିଟିଭି କ୍ୟାମେରା ଓ ହାର୍ଡଡିସ୍କ ଭାଙ୍ଗି ନେଇଗଲେ ଦୁର୍ବୃତ୍ତ। ଚିହ୍ନ ଛପେଇବାକୁ ଏଟିଏମ୍ରେ ଲଗାଇଦେଲେ ନିଆଁ। ଦୁର୍ବୃତ୍ତଙ୍କୁ ପିଛା କରି କାର୍ ସହ ୨ ଜଣଙ୍କୁ କାବୁ କଲା ପୋଲିସ। ମାତ୍ର ଲୁଟ୍ ଟଙ୍କାକୁ ଅନ୍ୟ କାର୍ରେ ଧରି ଛୁ ମାରିଲେ ଆଉ କିଛି ଦୁର୍ବୃତ୍ତ।
ସୂଚନାନୁଯାୟୀ, ଢେଙ୍କାନାଳ ଜିଲ୍ଲା ସଦର ଥାନା ଅନ୍ତର୍ଗତ ପଞ୍ଚୁବଟି ନିକଟ ୫୫ ନଂ ଜାତୀୟ ରାଜପଥ ପାର୍ଶ୍ୱରେ ଥିବା ଏସବିଆଇ ଏଟିଏମ୍ରୁ ଲୁଟ୍ ହୋଇଛି। ବୁଧବାର ରାତି ବିଳମ୍ବିତ ପ୍ରହରରେ କିଛି ଦୁର୍ବୃତ୍ତମାନେ ଏଟିଏମ୍କୁ ତାଡି ଟଙ୍କା ସବୁ ନେଇଯାଇଛନ୍ତି। ପରେ ଏଟିଏମ୍ ର ସିସିକ୍ୟାମେରା, ହାର୍ଡ ଡିସ୍କକୁ ଭାଙ୍ଗି ନେଇ ଏଟିଏମ୍ରେ ନିଆଁ ଲଗାଇ ପୋଡି ଦେଇଛନ୍ତି। ଖବର ପାଇ ପୋଲିସ ଅଭିଯୁକ୍ତଙ୍କୁ ପିଛା କରିଥିଲା। ମୋଟଙ୍ଗା ପୁଲିସ ଜଗି ରହିଥିବା ଦୁର୍ବୃତ୍ତମାନେ କାର୍ ଛାଡି ଦୌଡ଼ି ମେରାମୁଣ୍ଡଳୀ କେନାଲ ରାସ୍ତାରେ ଖସି ପଳାଉ ଥିଲେ। ଏତିକି ବେଳେ ପୋଲିସ କାର୍ ସହ ୨ ଜଣଙ୍କୁ କାବୁ କରିଛି। ମାତ୍ର ଆଉ କିଛି ଦୁର୍ବୃତ୍ତ ଅନ୍ୟ ଏକ କାର୍ରେ ଟଙ୍କା ନେଇ ଫେରାର୍ ହୋଇଯାଇଛନ୍ତି। ସେମାନେ ସମ୍ଵଲପୁର ଆଡ଼କୁ ଯାଇଥିବାରୁ ପୋଲିସର ଏକ ଟିମ୍ ପିଛାକରି ଯାଇଛି। ସେପଟେ କାବୁ ହୋଇଥିବା ୨ ଅଭିଯୁକ୍ତଙ୍କୁ ପୋଲିସ ଅଟକ ରଖି ଛାନଭିନ୍ ଚଳାଇଛି। ତେବେ ଏଟିଏମ୍ରୁ ଲୁଟ୍ ହୋଇଥିବା ଟଙ୍କାର ପରିମାଣ ଜଣାପଡ଼ି ନଥିବା ବେଳେ ଗତକାଲି ସନ୍ଧ୍ୟାରେ ଟଙ୍କା ଲୋଡ୍ ହୋଇଥିବା ସୂଚନା ମିଳିଛି।
