ନୂଆଦିଲ୍ଲୀ: ରମେଶ ବିଧୁରୀଙ୍କ ବିବାଦୀୟ ମନ୍ତବ୍ୟକୁ ନେଇ ପ୍ରତିକ୍ରିୟା ଦେଇଛନ୍ତି କଂଗ୍ରେସ ସାଂସଦ ପ୍ରିୟଙ୍କା ଗାନ୍ଧୀ ଭଦ୍ରା । ପ୍ରିୟଙ୍କା ଗାନ୍ଧୀଙ୍କ ଗାଲ ଭଳି ଚିକ୍କଣ ରାସ୍ତା ତିଆରି କରିବେ ବୋଲି କହିଥିଲେ ଦିଲ୍ଲୀର କାଲକାଜୀ ଆସନରୁ ପ୍ରାର୍ଥୀ ହୋଇଥିବା ବିଜେପି ନେତା ରମେଶ ବିଧୁରୀ । ରମେଶ ବିଧୁରୀଙ୍କ ଏହି ମନ୍ତବ୍ୟକୁ ନିନ୍ଦନୀୟ ବୋଲି ପ୍ରିୟଙ୍କା ଗାନ୍ଧୀ କହିଛନ୍ତି । ଭିତ୍ତିହୀନ ପ୍ରସଙ୍ଗରେ ଆଲୋଚନା କରିବାକୁ ପସନ୍ଦ କରନ୍ତି ନାହିଁ ବୋଲି ସେ କହିଛନ୍ତି । ଆଗକୁ ଦିଲ୍ଲୀ ବିଧାନସଭା ନିର୍ବାଚନ ହେବାକୁ ଥିବା ବେଳେ ଗୁରୁତ୍ବପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା ହେବା ଦରକାର ବୋଲି କହିଛନ୍ତି ଓ୍ବାୟନାଡ ସାଂସଦ ।
କାଲକାଜୀରେ ଆୟୋଜିତ ଏକ କାର୍ଯ୍ୟକ୍ରମରେ ପ୍ରିୟଙ୍କା ଗାନ୍ଧୀଙ୍କ ଉପରେ ଅଭଦ୍ର ଟିପ୍ପଣୀ ଦେଇଥିଲେ ରମେଶ ବିଧୁରୀ । ଏହାର ଏକ ଭିଡିଓ ଭାଇରାଲ ହେବା ପରେ ରାଜନୀତି ଜୋର ଧରିଥିଲା । କଂଗ୍ରେସ ଏବଂ ଆମ ଆଦମୀ ପାର୍ଟି ନେତାମାନେ ବିଜେପିକୁ ଟାର୍ଗେଟ କରିଥିଲେ । ବିଜେପି ମହିଳା ବିରୋଧୀ ପାର୍ଟି ବୋଲି ଅଭିଯୋଗ କରିଥିଲେ କଂଗ୍ରେସ ଏବଂ ଆପ୍ ।
କଂଗ୍ରେସ କହିଥିଲା ଯେ, ପ୍ରିୟଙ୍କା ଗାନ୍ଧୀଙ୍କ ସଂପର୍କରେ ଦିଆଯାଇଥିବା ମନ୍ତବ୍ୟ ଅତ୍ୟନ୍ତ ଅଶୋଭନୀୟ । ଏହା ସହ ବିଜେପି ମହିଳାଙ୍କ ସଂପର୍କରେ କଣ ଚିନ୍ତା କରୁଛି ତାକୁ ଏହା ଦର୍ଶାଉଛି ।’ ରମେଶ ବିଧୁରୀଙ୍କ ମନ୍ତବ୍ୟକୁ ବିରୋଧ କରି ଦିଲ୍ଲୀ ମୁଖ୍ୟମନ୍ତ୍ରୀ ଆତିଶୀ କହିଥିଲେ, ବିଜେପି ମହିଳା ବିରୋଧୀ ଦଳ । ଦିଲ୍ଲୀର ଆଇନ ଶୃଙ୍ଖଳା ବ୍ୟବସ୍ଥା ବିଜେପି ସରକାର ହାତରେ ରହିଛି, ଭାବିଲେ ଭୟ ଲାଗୁଛି । ଯଦି ବିଜେପି ନେତା ରମେଶ ବିଧୁରୀ ଏମିତି ଅଭଦ୍ର ଟିପ୍ପଣୀ ଦେଉଛନ୍ତି ତେବେ ଦଳରେ ସେମାନେ ମହିଳାଙ୍କୁ କିଭଳି ସୁରକ୍ଷା ଦେଉଥିବେ ତାହ ଜଣାପଡ଼ୁଛି । ଦିଲ୍ଲୀବାସୀ ରମେଶ ବିଧୁରୀଙ୍କୁ କଡ଼ା ଜବାବ ଦେବେ ବୋଲି ଆତିଶୀ କହିଥିଲେ । ସେପଟେ ଚାରିଆଡୁ ସମାଲୋଚିତ ହେବା ପରେ ରମେଶ ବିଧୁରି କ୍ଷମା ମାଗିଥିଲେ ।
