ମୁମ୍ବାଇ: ମହାରାଷ୍ଟ୍ର ରାଜନୀତିରେ ଝଡ଼ ସୃଷ୍ଟି କଲା ଭଳି ମନ୍ତବ୍ୟ ଦେଇଛନ୍ତି ଶିବସେନା (ୟୁବିଟି) ନେତା ସଂଜୟ ରାଉତ । ଶରଦ ପାଓ୍ବାରଙ୍କ ଏନସିପି ଭାଙ୍ଗିବାକୁ ଉପମୁଖ୍ୟମନ୍ତ୍ରୀ ଅଜିତ ପାଓ୍ବାର ଚେଷ୍ଟା କରୁଥିବା ଦାବି କରିଛନ୍ତି ସଂଜୟ । ଏନସିପି (ଏସପି)ର ସାଂସଦଙ୍କୁ କେନ୍ଦ୍ରୀୟ ମନ୍ତ୍ରିମଣ୍ଡଳରେ ସ୍ଥାନ ଦେବାକୁ କହି ସେମାନଙ୍କୁ ଶରଦ ପାଓ୍ବାରଙ୍କ ବିରୋଧୀ କରାଇବାକୁ ଅଜିତ ପାଓ୍ବାରଙ୍କ ଏନସିପି ଚେଷ୍ଟା ଚଳାଇଛି ବୋଲି ସେ କହିଛନ୍ତି । ଏହା ପୂର୍ବରୁ ଅଜିତ ପାଓ୍ବାରଙ୍କ ଏନସିପି ନେତା ଅମୋଲ ମିଟକରୀ କହିଥିଲେ, ଶରଦ ପାଓ୍ବାରଙ୍କ ନେତୃତ୍ବାଧୀନ ଏନସିପିର କେତେ ଜଣ ସାଂସଦ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଅଜିତ ପାଓ୍ବାରଙ୍କ ସଂପର୍କରେ ରହିଛନ୍ତି ।
ଏନସିପି(ଏସପି) ବିଧାୟକ ଏବଂ ପୂର୍ବତନ ରାଜ୍ୟ ମନ୍ତ୍ରୀ ଜିତେନ୍ଦ୍ର ଆହ୍ବାଦ ଅଭିଯୋଗ ଆଣିଛନ୍ତି ଯେ, ଅଜିତ ପାଓ୍ବାରଙ୍କ ନେତୃତ୍ବାଧୀନ ଏନସିପିର ରାଜ୍ୟ ମୁଖ୍ୟ ସୁନୀଲ ତଟକରେ ଏନସିପି (ଏସପି)ର ସାଂସଦଙ୍କୁ ଦଳ ଛାଡ଼ିବାକୁ କହିଥିଲେ । ତେବେ ଏନେଇ ତଟକରେଙ୍କ ପ୍ରତିକ୍ରିୟା ମଳିପାରି ନାହିଁ । ସେପଟେ ସଂଜୟ ରାଉତ ଆହୁରି କହିଛନ୍ତି, ‘ବରିଷ୍ଠ ଏନସିପି ନେତା ପ୍ରଫୁଲ ପଟେଲ ଏବଂ ତଟକରେଙ୍କୁ ଶରଦ ପାଓ୍ବାରଙ୍କ ନେତୃତ୍ବାଧୀନ ଏନସିପିକୁ ଭାଙ୍ଗିବାକୁ ଦାୟିତ୍ବ ଦିଆଯାଇଛି । ଏପରିକି ଏଥିରେ ସଫଳ ହେଲେ ସେମାନଙ୍କୁ କେନ୍ଦ୍ର ମନ୍ତ୍ରିମଣ୍ଡଳରେ ସ୍ଥାନ ମିଳିବ ବୋଲି କୁହାଯାଇଛି ।’
ଅନ୍ୟପଟେ ଏନସିପିର ଦୁଇ ଗୋଷ୍ଠୀ ପୁଣି ତରେ ମିଶିଯିବେ କି ବୋଲି ପ୍ରଶ୍ନରେ ଜିତେନ୍ଦ୍ର ଆହ୍ବାଦ କହିଛନ୍ତି, ଯଦି ଏନସିପିର ଦୁଇ ଗୋଷ୍ଠୀ ଏକାଠି ହେବାର ଅଛି ତେବେ ସୁନୀଲ ତଟକରେ କାହିଁକି ଆମ ଲୋକସଭା ସଦସ୍ୟଙ୍କୁ ଦଳ ପରିବର୍ତ୍ତନ ପାଇଁ କହିଥିଲେ ? ସେ ପ୍ରସ୍ତାବ ଦେଇଥିଲେ ବାପ-ଝିଅଙ୍କୁ ଛାଡ଼ ଏବଂ ଆମ ପାଖକୁ ଆସ । ଜିତେନ୍ଦ୍ର ଆହ୍ବାଦ କହିଛନ୍ତି, ମୋତେ ଲାଗୁଛି ଦୁଇ ପାଓ୍ବାର ପୁଣି ଥରେ ଏକ ହୋଇଯାଆନ୍ତୁ ବୋଲି ଖୋଦ ତଟକରେ ହିଁ ଚାହୁଁନାହାନ୍ତି ।
