ଦେଓଗାଁ,୦୭/୦୧:   ଆଜିଠୁ   ଆଦିବାସୀଙ୍କ ପ୍ରସିଦ୍ଧ ଶୁଳିଆ ଯାତ୍ରା ଆରମ୍ଭ। ଏଥିପାଇଁ ଚଳଚଞ୍ଚଳ ହୋଇ ଉଠିଛି ବଲାଙ୍ଗିର ଜିଲ୍ଲାର  ଦେଓଗାଁ ବ୍ଲକର କୁଳୁ୍ତାପଡ଼ା ପଞ୍ଚାୟତ ଅନ୍ତର୍ଗତ ଖଇରଗୁଡ଼ା ଓ କୁମୁରିଆ ବଡ଼ଖଳା ଓ ସାନଖଳା। ରୀତିନୀତି ଅନୁସାରେ ଶୁଳିଆ ଦେବତାଙ୍କୁ ହେବ ପୂଜାର୍ଚ୍ଚନା । ଏଥିସହ ଦେହୁରୀମାନେ ଶିଆଳପତ୍ରର ବସ୍ତ୍ର ପରିଧାନ କରି ପାରମ୍ପରିକ ବାଦ୍ୟର ତାଳେ ତାଳେ ଅସ୍ତ୍ର ଶସ୍ତ୍ର ଧରି ନୃତ୍ୟ କରିବାର ରହିଛି   ପରମ୍ପରା । 

ସେହିପରି ଯାତ୍ରାରେ ମାନସିକଧାରୀମାନେ ବଳି ପ୍ରଦାନ କରିଥିବା ବେଳେ ଶତାଧିକ ପୋଢ଼, ଛେଳି, ମେଣ୍ଢା, କୁକୁଡ଼ା, ବତକଙ୍କ ବଳିରେ ରକ୍ତ ରଂଜିତ ହୋଇ ଉଠିଥିଲା ଶୁଳିଆ ପୀଠ। ବଡ଼ଖଳାରେ ମୁଖ୍ୟପୂଜକ ସୋମନାଥ ଦେହୁରୀଆ ଓ ସାନଖଳାରେ ହରିହର ଝାଙ୍କର ଦାୟିତ୍ୱ ତୁଲାଇଥିଲେ।  ଯାତ୍ରାରେ କନ୍ଧ ସମାଜର ରାଜ୍ୟ ସଭାପତି ଚିନ୍ତାମଣି ଭୋଇ ସମେତ ବଲାଙ୍ଗିର ଜିଲ୍ଲାର ସମସ୍ତ ଚଉଦଟି କନ୍ଧ ପ୍ରଗଣାର ନେତୃମଣ୍ଡଳୀ ଯୋଗ ଦେଇଥିଲେ । ଏହା ସହ ଜିଲ୍ଲା ବାହାରର କନ୍ଧ ନେତୃ ମଣ୍ଡଳୀ ଯୋଗଦେଇଥିବା ବେଳେ ପୂର୍ବତନ ମନ୍ତ୍ରୀ ନରସିଂହ ମିଶ୍ର, ସୁରେନ୍ଦ୍ର ସିଂ ଭୋଇ, ଅନଙ୍ଗ ଉଦୟ ସିଂ ଦେଓ ଉପସ୍ଥିତ ରହି ଆଶୀର୍ବାଦ ଭିକ୍ଷା କରିଥିଲେ।  ଯାତ୍ରାକୁ ଶାନ୍ତିଶୃଙ୍ଖଳାରେ ପରିଚାଳନା କରିବା ପାଇଁ ଡି ଏସ ପି ଅଜୟ କୁମାର ତୀର୍କୀ, ସଞ୍ଜୟ ମଣ୍ଡଳ , ଅତିରିକ୍ତ ଆରକ୍ଷୀ ଅଧୀକ୍ଷକ ଆଲୋକ ଜେନା,ଗୁଣନିଧି ମଲ୍ଲିକ ଏସଡ଼ିପିଓ ପ୍ରଦୀପ କୁମାର ସାହୁ, ଦେଓଗାଁ ଥାନାଧିକାରୀ ବୁଲୁ ମୁଣ୍ଡା, ତୁଷୁରା ଥାନାଧିକାରୀ ମନୋଜ ପ୍ରଧାନ, ମାଜିଷ୍ଟ୍ରେଟ ଭାବେ ଦେଓଗାଁ ତହସିଲଦାର ବିକ୍ରମ କେଶରୀ ନାୟକତୁଷୁରା ତହସିଲଦାର ଆର୍ତ୍ତତ୍ରାଣ ଥାଟିଙ୍କ ସହ ଦୁଇ ପ୍ଲାଟୁନ ପୋଲିସ ଫୋର୍ସ ମୁତୟନ ହୋଇ ଥିଲେ।