ବୈପାରୀଗୁଡ଼ା, ୦୭/୦୧ : କୋରାପୁଟ ଜିଲ୍ଲା କୁନ୍ଦୁରା ବ୍ଲକରେ ଭାଲୁ ଆତଙ୍କ। ସଦର ମହକୁମା ସ୍ଥିତ ଗାନ୍ଧୀ ଛକରେ ବୁଲୁଛନ୍ତି ଭାଲୁ। ରାତି ହେଲେ ଛକରେ ବୁଲୁଛନ୍ତି ୭ରୁ ୮ଟି ଭାଲୁ। ସୋସିଆଲ୍ ମିଡିଆରେ ଭିଡିଓ ଭାଇରାଲ୍ ପରେ ଚାରିଆଡେ ଖେଳିଯାଇଛି ଆତଙ୍କ।
ଖାଦ୍ୟ ଅନ୍ଵେଷଣ ପାଇଁ ଗାଁ ମୁହାଁ ଭାଲୁ। ରାତି ହେଲେ ଜନବସତି ଆଡ଼କୁ ମାଡ଼ି ଆସୁଛନ୍ତି। ନିର୍ଦ୍ଵନ୍ଦରେ ଚାରିଆଡ଼େ ଘୂରି ବୁଲୁଛନ୍ତି। କୁନ୍ଦୁରା ବ୍ଲକ ସଦର ମହକୁମା ସ୍ଥିତ ଗାନ୍ଧୀ ଛକରେ ରାତିରେ ୭ରୁ ୮ଟି ଭାଲୁ ବୁଲୁଥିବା ଦେଖିବାକୁ ମିଳିଛି। ସିସିଟିଭି ଭିଡିଓ ଭାଇରାଲ୍ ହେବା ପରେ ଲୋକମାନେ ଆତଙ୍କିତ ହୋଇପଡ଼ିଛନ୍ତି। ସନ୍ଧ୍ୟା ହେଲେ ଲୋକମାନେ ପଦାକୁ ବାହାରୁ ନାହାଁନ୍ତି। ଘରେ ତାଟି କବାଟ ପଡୁଛି। ସେପଟେ ଭାଲୁ ଘଉଡ଼ାଇବାକୁ ବନ ବିଭାଗ ପକ୍ଷରୁ ଉଦ୍ୟମ ଜାରି ରହିଛି। କୁନ୍ଦୁରା ସହରରେ ଡାକବାଜି ଯନ୍ତ୍ର ମାଧ୍ୟମରେ ଲୋକଙ୍କୁ ସତର୍କ ରହିବାକୁ ସୂଚନା ଦିଆଯାଉଛି।
