ପାଣିକୋଇଲି/କଟକ, ୬।୧: ଯାଜପୁର ଜିଲ୍ଲା ପାଣିକୋଇଲିସ୍ଥିତ ପଣ୍ଡା ଅଳଙ୍କାରରୁ ସଶସ୍ତ୍ର ଡକାୟତି ମାମଲାରେ ପୁଲିସ ତଦନ୍ତକୁ ଜୋରଦାର କରିଛି । ରବିବାର ଦିନ ତମାମ ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ଛାନଭିନ୍ ଚଳାଇଥିଲେ । ପୂର୍ବାହ୍ଣ ପ୍ରାୟ ୯ଟାରେ ଆସିଷ୍ଟାଣ୍ଟ ସାଇଣ୍ଟିଫିକ୍ ଅଫିସର (ଏଏସ୍ଓ) ବିଜୟ କୁମାର ରୟଙ୍କ ନେତୃତ୍ୱରେ ତିନିଜଣିଆ ଟିମ୍ ପଣ୍ଡା ଅଳଙ୍କାର ସମ୍ମୁଖରେ ପହଞ୍ଚି ପ୍ରଥମେ ଘଟଣାସ୍ଥଳକୁ ସିଲ୍ କରିଥିଲେ । ପରେ ତଦନ୍ତ ଆରମ୍ଭ କରିଥିଲେ । ଆଙ୍ଗୁଳି ଛାପ ସହ ଜବତ ହୋଇଥିବା ଗୋଟିଏ ପିସ୍ତଲ, ୪ଟି ଗୁଳି, ୩ଟି ଖୋକା, ଛୁରୀ, କଇଁଚି ସହ ଡକାୟତଙ୍କ ବ୍ୟାଗ୍ରୁ ମିଳିଥିବା କିଛି କପଡ଼ାକୁ ପରୀକ୍ଷା ପାଇଁ ଲ୍ୟାବ୍କୁ ପଠାଇଛନ୍ତି । ସ୍ପେଶାଲ ଟାସ୍କ ଫୋର୍ସ (ଏସ୍ଟିଏଫ୍) ଏସ୍ପି ରବି ଶତପଥୀଙ୍କ ନେତୃତ୍ୱରେ ଏକ ତିନିଜଣିଆ ଟିମ୍ ମଧ୍ୟ ଘଟଣାସ୍ଥଳରେ ୧୫ମିନିଟ୍ ଧରି ବିଭିନ୍ନ ଦିଗ ଉପରେ ଅନୁଧ୍ୟାନ କରି ଫେରି ଯାଇଥିଲେ । ସନ୍ଧ୍ୟା ପ୍ରାୟ ୭ଟା ପର୍ଯ୍ୟନ୍ତ ସାଇଣ୍ଟିଫିକ୍ ଟିମ୍ ଓ ପୁଲିସ ତଦନ୍ତ ଜାରି ରଖିଥିଲେ । ଯାଜପୁର ରୋଡ ରେଳ ଷ୍ଟେସନ୍ରେ ଥିବା ସିସିଟିଭିକୁ ଯାଞ୍ଚ ପାଇଁ ଜିଆର୍ପିକୁ ନିର୍ଦ୍ଦେଶ ଦିଆଯାଇଛି ।
ସେହିପରି ପାଣିକୋଇଲି ଅଞ୍ଚଳରେ ମଧ୍ୟ ଗତ ସପ୍ତାହକ ମଧ୍ୟରେ ବିଭିନ୍ନ ସିସିଟିଭିକୁ ପୁଲିସ ଯାଞ୍ଚ କରିବ ବୋଲି ବିଶେଷ ସୂତ୍ରରୁ ସୂଚନା ମିଳିଛି । ଅନ୍ୟପକ୍ଷରେ ଏହି ଡକାୟତମାନେ ବିହାର ଅଞ୍ଚଳରୁ ଆସିଥିବା ଶୁଣିବାକୁ ମିଳୁଛି । ଡକାୟତଙ୍କ ଗୁଳିରେ ପ୍ରାଣ ହରାଇଥିବା ଯାଜପୁର ବ୍ଲକ ଭୁବନେଶ୍ୱରପୁର ପଞ୍ଚାୟତ କଳସଡ଼ିହି ଗ୍ରାମର ଦେବେନ୍ଦ୍ର ରାୟଙ୍କ ପୁଅ ସୁନିଲ ଓ ପାଣିକୋଇଲି ଥାନା ଗୋଳେଇପୁର ପଞ୍ଚାୟତ ସୋତି ଗ୍ରାମର ସ୍ୱର୍ଗତ ଗୌରାଙ୍ଗ ପଣ୍ଡାଙ୍କ ପୁଅ ନୀଳମାଧବଙ୍କ ପରିବାରଙ୍କୁ ୨ଲକ୍ଷ ଟଙ୍କା ଲେଖାଏଁ କ୍ଷତିପୂରଣ ପ୍ରଦାନ ନିମନ୍ତେ ମୁଖ୍ୟମନ୍ତ୍ରୀ ମୋହନ ମାଝୀ ଘୋଷଣା କରିଛନ୍ତି । ସେହିପରି ଗୁଳିକାଣ୍ଡରେ ଗୁରୁତର ହୋଇ ଚିକିତ୍ସାଧୀନ କଳସଡିହି ଗ୍ରାମର ଦୀପକ ସାହୁଙ୍କ ସମସ୍ତ ଚିକିତ୍ସା ଖର୍ଚ୍ଚ ରାଜ୍ୟ ସରକାର ବହନ କରିବେ ବୋଲି ମୁଖ୍ୟମନ୍ତ୍ରୀ ସୂଚନା ଦେଇଛନ୍ତି । ସ୍ଥାନୀୟ ଲୋକଙ୍କ ମାଡ଼ରେ ଆହତ ହୋଇଥିବା ଦୁଇ ଡକାୟତ ଏବେ କଟକ ଏସ୍ବି ଟ୍ରମା କେୟାରେ ଚିକିତ୍ସାଧୀନ ଅଛନ୍ତି । ଗିରଫ ଅଭିଯୁକ୍ତ ଦ୍ୱୟ ବିହାର ଛାପ୍ରା ଜିଲ୍ଲାର ସି. ଓମ୍ ଏବଂ ମଧୁକାନ୍ତ ସିଂ ବୋଲି ଖବର ମିଳିଛି । ପାଣିକୋଇଲି ପୁଲିସ ମାମଲା ରୁଜୁ କରି ତଦନ୍ତ ଚଳାଇଛି । ସେମାନଙ୍କ ସ୍ୱାସ୍ଥ୍ୟାବସ୍ଥା ସେପରି ଜଟିଳ ନାହିଁ । ତଥାପି ସେମାନେ ଟ୍ରମା କାଜୁଆଲ୍ଟିରେ ଡାକ୍ତରଙ୍କ ତତ୍ତ୍ୱାବଧାନରେ ରହି ଚିକିତ୍ସା ହେବେ ବୋଲି ଜଣେ ବିଶେଷଜ୍ଞ କହିଛନ୍ତି ।
ସୁରକ୍ଷା ଦୃଷ୍ଟିରୁ ବନ୍ଧୁକଧାରୀ ପୁଲିସ ସମ୍ପୃକ୍ତ ଅଭିଯୁକ୍ତ ଦୁହିଙ୍କୁ ଜଗି ରହିବା ସହ ଟ୍ରମା କାଜୁଆଲ୍ଟି ଏବେ ଯାଜପୁର ପୁଲିସ୍ ବଳୟରେ ରହିଛି । ନିର୍ଦ୍ଦିଷ୍ଟ ସମୟରେ ଜଣେ ଡାକ୍ତର ଓ ଜଣେ ନର୍ସିଂ କର୍ମଚାରୀ ଭିତରକୁ ଯାଇ ଇଞ୍ଜେକସନ୍ ଦେଇ ଆସୁଛନ୍ତି । ପାଣିକୋଇଲି ଥାନା ଟିମ୍ ସହ ଜଣେ ଇନ୍ସପେକ୍ଟର, ଜଣେ ଡିଏସ୍ପିଙ୍କ ସମେତ ଯାଜପୁର ଜିଲ୍ଲାର କିଛି ବରିଷ୍ଠ ଅଧିକାରୀ କାଜୁଆଲଟିରେ ଅଭିଯୁକ୍ତ ଦ୍ୱୟଙ୍କୁ ଆଜି ମାରାଥନ୍ ଜେରା କରିଥିଲେ । ତିନି ସେକ୍ସନ ଫୋର୍ସ ମଧ୍ୟ ଏଠାରେ ମୁତୟନ ହୋଇଛନ୍ତି । ଲୋକଙ୍କଠାରୁ ନିସ୍ତୁକ ମାଡ଼ ଖାଇଥିବା ଅଭିଯୁକ୍ତ ଓମ୍ ପୁଲିସ୍ ପାଖରେ ତଥ୍ୟ ଲୁଚାଇବା ପାଇଁ ବାଉଳି ଚାଉଳି ହେବାର ଅଭିନୟ କରୁଥିବା ସୂଚନା ମିଳିଛି । ତଦନ୍ତକୁ ବାଟବଣା କରିବା ପାଇଁ ସେ ତାର ବୟାନ ବଦଳାଉଛି । ଅନ୍ୟତମ ଅଭିଯୁକ୍ତ ମଧୁକାନ୍ତ ପୁଲିସ୍କୁ କିଛି ତଥ୍ୟ ଓ ସୂଚନା ଦେଇଥିବା ଜଣାଯାଇଛି । ଦୁଇଜଣ ଯାକ ଅଭିଯୁକ୍ତ ସୁପାରି ନେଇ ଡକାୟତି ଗ୍ୟାଙ୍ଗ୍ ସହ ମିଶି ଜୁଏଲାରୀ ଦୋକାନରୁ ସୁନା ଅଳଙ୍କାର ଲୁଟିଥିଲେ ବୋଲି ସ୍ୱୀକାର କରିଛନ୍ତି । ସୁପାରି ଦେଇଥିବା ମାଷ୍ଟର ମାଇଣ୍ଡ ବିହାର ଅଞ୍ଚଳରେ ଥିବା ଖବର ମିଳିଛି । ଧରାପଡ଼ିଥିବା ଉକ୍ତ ଡକାୟତ ଗ୍ୟାଙ୍ଗ୍ ରାଜ୍ୟ ବାହାରର ହୋଇଥିଲେ ହେଁ ଓଡ଼ିଶାର ଅନେକ ସହରରେ ଏମାନଙ୍କର ଚଳପ୍ରଚଳ ରହିଛି ।
