ଲକ୍ଷ୍ନୌ: ଉତ୍ତର ପ୍ରଦେଶର କାସଗଞ୍ଜରେ ଚନ୍ଦନ ଗୁପ୍ତାଙ୍କ ହତ୍ୟା ମାମଲାରେ ୨୮ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡ ଦେଇଛନ୍ତି ଏନଆଇଏ କୋର୍ଟ । ୨୦୧୮ ଜାନୁଆରୀ ୨୬ରେ କାସଗଞ୍ଜରେ ଆୟୋଜିତ ତ୍ରିରଙ୍ଗା ରାଲି ସମୟରେ ଚନ୍ଦନ ଗୁପ୍ତାଙ୍କ ହତ୍ୟା କରାଯାଇ ଥିଲା । ଶୁକ୍ରବାର ସ୍ବତନ୍ତ୍ର ଜଜ୍ ବିବେକାନନ୍ଦ ଶରଣ ତ୍ରିପାଠୀ ଅଭିଯୁକ୍ତଙ୍କୁ ସଜା ଶୁଣାଇଛନ୍ତି । ଅଭିଯୁକ୍ତଙ୍କ ବିରୋଧରେ ହତ୍ୟା, ଦଙ୍ଗା ଏବଂ ଜାତୀୟ ପତାକାକୁ ଅସମ୍ମାନ କରିଥିବା ନେଇ ମାମଲା ରହିଛି । ତେବେ ଚନ୍ଦନ ଗୁପ୍ତାଙ୍କ ପରିବାରକୁ ଦୀର୍ଘ ୭ ବର୍ଷ ପରେ ନ୍ୟାୟ ମିଳିଛି ।
NIA ସ୍ପେଶାଲ କୋର୍ଟ ଜଜ୍ ବିବେକାନନ୍ଦ ଶରଣ ତ୍ରିପାଠୀ ଶୁକ୍ରବାର ଚନ୍ଦନ ଗୁପ୍ତା ହତ୍ୟାକାଣ୍ଡରେ ସମସ୍ତ ୨୮ ଅଭିଯୁକ୍ତଙ୍କୁ ଦୋଷୀ ଘୋଷଣା କରିଛନ୍ତି । ଅନ୍ୟପଟେ ଦୁଇ ଅଭିଯୁକ୍ତ ନସିରୁଦ୍ଦୀନ ଏବଂ ଅସୀମ କୁରେଶୀଙ୍କୁ ମୁକ୍ତ କରାଯାଇଛି । ଚନ୍ଦନଙ୍କ ବାପା ସୁଶୀଲ ଗୁପ୍ତାଙ୍କ ଦ୍ୱାରା ଦିଆଯାଇଥିବା ଏଫ୍ଆଇଆର୍ରେ ୨୦ ଜଣଙ୍କୁ ଅଭିଯୁକ୍ତ ଦର୍ଶାଯାଇଥିଲା । ତଦନ୍ତ ପରେ ପୋଲିସ ଆଉ ୧୦ ଜଣ ଅଭିଯୁକ୍ତଙ୍କ ନାଁ ଯୋଡ଼ି ମୋଟ ୩୦ ଜଣଙ୍କ ନାଁରେ ଚାର୍ଜସିଟ୍ ଦାଖଲ କରିଥିଲା । ୨୦୧୮ ଏପ୍ରିଲ୍ ୨୬ରେ କାସଗଞ୍ଜ ପୋଲିସ ମାମଲାରେ ଚାର୍ଜସିଟ୍ ଦାଖଲ କରିଥିଲା । ବର୍ତ୍ତମାନରେ ୨୮ ଦୋଷୀଙ୍କ ମଧ୍ୟରୁ ଜଣେ ଦୋଷୀ ମୁନାଜିର ରଫି ପୂର୍ବରୁ ଜେଲରେ ବନ୍ଦୀ ରହିଛି ।
ମୁନାଜିର ରଫି କାସଗଞ୍ଜର ଜଣେ ଓକିଲ ମୋହିନୀ ତୋମାର ହତ୍ୟାକାଣ୍ଡରେ ଜେଲରେ ବନ୍ଦୀ ଅଛି । ୨୦୧୮ ଜାନୁଆରୀ ୨୬ରେ ତ୍ରିରଙ୍ଗା ଯାତ୍ରା ବେଳେ ଚନ୍ଦନ ଗୁପ୍ତାଙ୍କୁ ହତ୍ୟା କରାଯାଇଥିଲା । ତ୍ରିରଙ୍ଗା ଯାତ୍ରା ବେଳେ ଦୁଇ ସମୁଦାୟ ମୁହାଁମୁହିଁ ହୋଇଥିଲେ । ଏହି ସମୟରେ ଚନ୍ଦନ ଗୁପ୍ତାଙ୍କୁ ଅତି ନିର୍ମମ ଭାବେ ଗୁଳି କରି ହତ୍ୟା କରାଯାଇଥିଲା । ଘଟଣାକୁ ନେଇ କାସଗଞ୍ଜରେ ଉତ୍ତେଜନା ବଢିଥିଲା । ହିଂସାର ନିଆଁରେ ପୂରା ଉତ୍ତର ପ୍ରଦେଶରେ ବ୍ୟାପିଥିଲା । ଚନ୍ଦନଙ୍କ ପରିବାର ସହ ଅନ୍ୟମାନେ ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ପାଇଁ ଦାବି କରିଥିଲେ । ଘଟଣା ପରେ ଚନ୍ଦନ ଗୁପ୍ତାଙ୍କ ନାଁରେ କାସଗଞ୍ଜର ଗୋଟିଏ ଛକ ନାଁ କରାଯିବ ବୋଲି ସରକାର ଘୋଷଣା କରିଥିଲେ ।
