ଭୁବନେଶ୍ୱର,୦୪/୦୧: ମୁଖ୍ୟମନ୍ତ୍ରୀଙ୍କ ଅଫିସ୍ ଠାରୁ ଆରମ୍ଭ କରି ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ସବୁଠି ନିଜର ସେଟିଂ ଥିବା କହୁଥିଲେ ବିଷ୍ଣୁପ୍ରିୟା ଚାନ୍ଦ ଓରଫ ହଂସିକା । ବିଭିନ୍ନ କର୍ପୋରେଟ୍ ଅଫିସ୍ରେ ଅଟକି ପଡ଼ିଥିବା କାମ ହେଉ କି ଟେଣ୍ଡର ଫିକ୍ସିଂ..., ସବୁଥିରେ ସେ ମୁଣ୍ଡ ଖେଳାଉଥିଲେ । ଅନିଲ୍ଙ୍କୁ ନିଜ ବ୍ୟବସାୟୀ ପାର୍ଟନର୍ ବୋଲି ପରିଚୟ ଦେଉଥିଲେ । ଦଲାଲି କରି କୋଟି କୋଟି ଟଙ୍କା ରୋଜଗାର କରୁଥିଲେ ।
କିଏ କେଉଁ ଟେଣ୍ଡର ପାଇବ । କେଉଁ ଖଣି କାହାକୁ ଦିଆଯିବ । ସେ ସବୁକୁ ଗଳିପଶି କରାଉ ଥିଲେ ହଂସିକା । ହଂସିକା ସବୁବେଳେ ବିଭିନ୍ନ ଭିଭିଆଇପିଙ୍କ ସଂପର୍କୀୟ ବୋଲି ନିଜ ପରିଚୟ ଦେଉଥିଲେ । ଏଭଳି ନାଁ ଶୁଣି ବଡ଼ବଡ଼ ଅଫିସର ବି ହଡ଼ବଡ଼ ହୋଇଯାଉଥିଲେ । ଏଥିପାଇଁ ସେମାନେ ଅନେକ ଭିଭିଆଇପିଙ୍କ ସହ ନିଜ ଫଟୋ ଏଡିଟ୍ କରି ରଖୁଥିଲେ । ପୂର୍ବ ସରକାରଙ୍କ ଅମଳରେ ଏମାନଙ୍କ ବେସ୍ ଦବଦବା ଥିଲା। ହଂସିକା ସବୁବେଳେ ଷ୍ଟାର ହୋଟେଲ୍ରେ ରୁମ୍ ନେଇ ନେତା ଅଫିସରଙ୍କ ସହ ବୈଠକ କରୁଥିଲେ । ଯେଉଁ ବ୍ୟକ୍ତି ତାଙ୍କ ସହ ଥରେ ବସୁଥିଲେ, ସେ ହଂସିକାଙ୍କ ପଞ୍ଝାରୁ ବାହାରି ପାରୁ ନଥିଲେ । ୧୦ ବର୍ଷ ମଧ୍ୟରେ ଅନିଲ ଓ ହଂସିକା ୨ ଶହ କୋଟିରୁ ଅଧିକ ଟଙ୍କା କମାଇଥିଲେ । ନଗଦ ଆକାରରେ ଏମାନେ କାରବାର କରୁଥିଲେ ।
କଳାଟଙ୍କାକୁ ଧଳା କରିବା କାମ ଥିଲା ଅନିଲ୍ଙ୍କର । ଅନିଲ୍ ଓ ହଂସିକା ମିଶି ଦିଲ୍ଳୀର ଗୁରୁଗ୍ରାମ୍ ଅଞ୍ଚଳରେ ୧୫ ଏକର ଜମିରେ ଏକ ଢାବା ଓ ବାର୍ କରିଛନ୍ତି । କଳାଟଙ୍କାକୁ ଅନିଲ୍ ତାଙ୍କ ସହଯୋଗୀଙ୍କ ଜରିଆରେ ଧଳା କରୁଥିଲେ । ସ୍ପେଶାଲ୍ କ୍ରାଇମ୍ ୟୁନିଟ୍ ଜାଣିବାକୁ ପାଇଛି, କଳାଧନ ଧଳା କରିବାରେ ରାଜ୍ୟ ଓ ରାଜ୍ୟ ବାହାରେ ଥିବା ଜିମ୍ ସଂସ୍ଥା ସାମିଲ ଅଛନ୍ତି । ୟୁନିଟ୍-୮ର ସ୍କ୍ରାପ୍ ବ୍ୟବସାୟୀ, ଖଣି ବେପାରୀ ଓ ମାଛ ଗଦିର ମାଲିକଙ୍କ ପାଖରେ ଏମାନଙ୍କ କଳାଧନ ଲାଗିଥିବା ପୁଲିସ୍ କହିଛି ।
ହଂସିକା ଓ ଅନିଲ୍ଙ୍କ କଳା ଟଙ୍କାରେ ଜଣେ ଜିମ୍ ମାଲିକ ଦିଲ୍ଲୀରେ ଏକ ବଡ଼ ଜିମ୍ ସଂସ୍ଥା ଖୋଲିଛନ୍ତି । ଏହି ଜିମ୍ ମାଲିକଙ୍କର ଏକ ଏନ୍ଜିଓ ମଧ୍ୟ ଅଛି । ସ୍ପେଶାଲ୍ କ୍ରାଇମ୍ ୟୁନିଟ୍ ଏମାନଙ୍କୁ ତଦନ୍ତ ପରିସରଭୁକ୍ତ କରିବ । ହଂସିକାଙ୍କ ପଞ୍ଝାରେ ଥିଲେ ଏକାଧିକ ଖଣି କମ୍ପାନୀର ବରିଷ୍ଠ ଅଧିକାରୀ । ସେମାନେ ସବୁ କମ୍ପାନୀର ସିଏସ୍ଆର୍ ଫଣ୍ଡକୁ ଅନିଲ୍ଙ୍କ କମ୍ପାନୀକୁ ଦେଉଥିଲେ । କିଛି କମ୍ପାନୀ ଉପରେ ଚାପ ପକାଇ ହଂସିକା ଓ ଅନିଲ ସିଏସ୍ଆର ଫଣ୍ଡ ଆଣୁଥିଲେ । ଶୁକ୍ରବାର ସ୍ପୋଶାଲ୍ କ୍ରାଇମ୍ ୟୁନିଟ୍ ୨ଟି ବ୍ୟାଙ୍କ୍ ଯାଇ ସେମାନଙ୍କ ଆକାଉଣ୍ଟର ଖୋଳତାଡ଼ କରିଛି । ସବୁଠାରୁ ଆଶ୍ଚର୍ଯ୍ୟ କଥା ହେଲା ହଂସିକା ସବୁବେଳେ ପାଖରେ ଜଣେ ମେକ୍ଅପ୍ ଆର୍ଟିଷ୍ଟଙ୍କୁ ଧରି ବୁଲୁଥିଲେ । ବିନା ମେକ୍ଅପରେ ସେ କାହାକୁ ଭେଟୁ ନଥିଲେ । ହଂସିକାଙ୍କ ଶିକ୍ଷାଗତ ଯୋଗ୍ୟତା ବିଷୟରେ ପୁଲିସ୍ କିଛି ଟେର ପାଇନାହିଁ । ଜେଲ୍ରେ ରହିବା ଦିନ ଠାରୁ ତାକୁ କୌଣସି ଲୋକ ଭେଟିବାକୁ ଯାଇ ନାହାନ୍ତି ।
ସୂଚନା ମୁତାବକ, ପୂର୍ବତନ ଏମ୍ପି ତଥା ଏକ ବଡ଼ ଏନ୍ଜିଓ ସଂସ୍ଥା ମାଲିକ ମଧ୍ୟ ହଂସିକାଙ୍କ ଶିକାର ହୋଇଥିଲେ । ପି.କେ ମିଶ୍ରଙ୍କ ଝିଅ ଓ ଜ୍ୱାଇଁ ବୋଲି ଭାବି ଏନ୍ଜିଓ ସଂସ୍ଥା ମାଲିକ ତାଙ୍କୁ ଆତିଥ୍ୟ ଦେଇଥିଲେ । ଏନ୍ଜିଓ ସଂସ୍ଥାକୁ ୫୦ କୋଟି ଡୋନେସନ୍ କରାଇ ଦେବାକୁ କହିଥିଲେ ହଂସିକା । କିଛି ଦିନ ପରେ ଡୋନେସନ୍ କରାଇ ଦେଇଥିଲେ । ସେଥିପାଇଁ ହଂସିକା ୨୦% କମିଶନ ମାଗିଥିଲେ । ହେଲେ ଏନ୍ଜିଓ ସଂସ୍ଥା ମାଲିକ ମନା କରିଦେଇଥିଲେ । ହଂସିକା ତାଙ୍କୁ ବ୍ଲାକ୍ମେଲ କରିଥିଲେ । କିଛି ଉପାୟ ନ ପାଇ ଏନ୍ଜିଓ ସଂସ୍ଥା ମାଲିକଙ୍କ କର୍ମଚାରୀ ଥାନାରେ ଏତଲା ଦେବା ପରେ ପୁଲିସ୍ ଦୁଇ ଜଣଙ୍କୁ ଗିରଫ କରିଥିଲା ।
