ନୂଆଦିଲ୍ଲୀ: ପତ୍ନୀଙ୍କ ନିର୍ଯାତନା ସହିନପାରି କିଛିଦିନ ତଳେ ଆତ୍ମହତ୍ୟା ଭଳି ଚରମ ନିଷ୍ପତ୍ତି ନେଇଥିଲେ ବେଙ୍ଗାଲୁରୁର ଯୁବ ଇଂଜିନିୟର ଅତୁଲ ସୁଭାଷ। ଆତ୍ମହତ୍ୟା ପୂର୍ବରୁ ପତ୍ନୀଙ୍କ ନିର୍ଯାତନା ସହ ଜଡ଼ିତ ଦୁଇ ଘଣ୍ଟାର ଭିଡ଼ିଓ ସହ ୨୪ ପୃଷ୍ଟା ବିଶିଷ୍ଟ ଏକ ସୁଇସାଇଡ ନୋଟ ଛାଡିଯାଇଥିଲେ ଅତୁଲ। ସେ ସମୟରେ ଏହି ଘଟଣା ସାରା ଦେଶରେ ହଇଚଇ ସୃଷ୍ଟି କରିଥିଲା। ଗତ ମଙ୍ଗଳବାର ଦିଲ୍ଲୀର ମଡେଲ ଟାଉନ ଅଞ୍ଚଳର ପୁନିତ ଖୁରାନା ନାମକ ଜଣେ ଯୁବ ବ୍ୟବସାୟୀ ନିଜ ପତ୍ନୀଙ୍କ ନିର୍ଯାତନା ସହି ନପାରି ସମାନଢ଼ଙ୍ଗରେ ଆତ୍ମହତ୍ୟା କରିଛନ୍ତି।
ଆତ୍ମହତ୍ୟା ପୂର୍ବରୁ ପୁନିତ ନିଜ ମୋବାଇଲରେ ୫୯ ମନିଟର ଏକ ଭିଡ଼ିଓ ରେକର୍ଡିଂ କରିଯାଇଥିଲେ। ଏହି ଭିଡିଓରେ ପୁନିତ ନିଜ ସ୍ତ୍ରୀ ଓ ତାଙ୍କ ପରିବାର ଦ୍ୱାରା ନିର୍ଯାତିତ ହେଉଥିବା କଥା କହିଛନ୍ତି। ଶେଷରେ ନିର୍ଯାତନା ଏତେ ବଢିଯାଇଥିଲା ଯେ ମୁଁ ଆତ୍ମହତ୍ୟା କରିବାକୁ ବାଧ୍ୟ ହେଲି ବୋଲି ପୁନିତ ଏହି ଭିଡିଓରେ କହୁଥିବା ନଜର ଆସୁଛନ୍ତି।
ପୁନିତଙ୍କ ଏହି ଭିଡିଓ ଆଜି ଏକ ଜାତୀୟ ଗଣମାଧ୍ୟମ ହାତରେ ଲାଗିବା ପରେ ଏହା ଭାଇରାଲ ହେବାରେ ଲାଗିଛି। ଏହି ଭିଡିଓରେ ପୁନିତ ନିଜ ଛାଡ଼ପତ୍ର ପ୍ରକ୍ରିୟା ପାଇଁ ନିଜ ପତ୍ନୀଙ୍କୁ ୧୦ ଲକ୍ଷ ଟଙ୍କା ଦେବାକୁ ଅକ୍ଷମ ଥିବାରୁ ତାଙ୍କ ପତ୍ନୀ ଓ ପତ୍ନୀଙ୍କ ପରିବାର ଲୋକ ତାଙ୍କୁ ମାନସିକ ନିର୍ଯାତନା ଦେଉଥିବା କଥା କହିଛନ୍ତି। ଶେଷରେ ମାନସିକ ନିର୍ଯାତନା ଏତେ ବଢ଼ିଯାଇଥିଲା ଯେ ସେ ଆତ୍ମହତ୍ୟା ଭଳି ଚରମ ନିଷ୍ପତ୍ତି ନେବାକୁ ବାଧ୍ୟ ହୋଇଛନ୍ତି ବୋଲି ଏହି ଭିଡିଓରେ କହିଛନ୍ତି।
ଆମ ଦୁଇଜଣଙ୍କ ସହମତି ଭିତ୍ତିରେ ଏହି ଛାଡ଼ପତ୍ର ହେଉଥିଲା। ପୂର୍ବରୁ ଭରଣପୋଷଣ ପାଇଁ ମୁଁ ମୋ ପତ୍ନୀଙ୍କୁ ଅନେକ କିଛି ଦେଇସାରିଛି। ତଥାପି ସେ ଓ ତାଙ୍କ ପରିବାର ଲୋକ ମତେ ଆଉ ୧୦ ଲକ୍ଷ ଟଙ୍କା ଦେବାକୁ ଦାବି କରୁଥିଲେ। କିନ୍ତୁ ମୋ ପକ୍ଷେ ଆଉ କିଛି ଅଧିକ ଦବା ସମ୍ଭବ ନୁହେଁ। ଏହାଠୁ ଭଲ ମୁଁ ଆତ୍ମହତ୍ୟା କରିନେବି ବୋଲି ପୁନିତ ଏହି ଭିଡିଓରେ କହୁଥିବା ନଜରରେ ଆସୁଛନ୍ତି।
ସୁଚନା ମୁତାବକ, ମଙ୍ଗଳବାର ମଡ଼େଲ ଟାଉନର କଲ୍ୟାଣ ବିହାର ଅଞ୍ଚଳରେ ରହୁଥିବା ପୁନିତ ଖୁରାନାଙ୍କୁ ଘରେ ଫାଶି ଲଗାଇ ଆତ୍ମହତ୍ୟା କରିଥିଲେ। ଦିଲ୍ଲୀର ଏହି ୪୦ ବର୍ଷିୟ ଯୁବକ ଫର ଗଡସ୍ କେକ୍ ନାମରେ ଏକ ବେକରୀ ଚଳାଉଥିଲେ। ଏହି ଆତ୍ମହତ୍ୟା ପଛରେ ତାଙ୍କ ପତ୍ତ୍ନୀଙ୍କ ହାତ ଥିବା ନେି ପୁନିତହ୍କ ପରିବାର ଲୋକ ଅଭିଯୋଗ ଆଣିଥିଲେ। ତେବେ ଉଭୟ ଦମ୍ପତ୍ତି ଛାଡ଼ପତ୍ର ପାଇଁ ଆବେଦନ କରିଥିବା ବେଳେ ତାଙ୍କୁ ବହୁ ଜଲଦି ଛାଡ଼ପତ୍ର ମିଳିବାର ଥିଲା।
