ନୂଆଦିଲ୍ଲୀ: ସ୍ୱାମୀ ବିବେକାନନ୍ଦ ଜୟନ୍ତୀ ଅବସରରେ, ମହାରାଷ୍ଟ୍ରର ଶିରିଡିରେ ଆଜି (ରବିବାର) ମହାରାଷ୍ଟ୍ର ବିଜେପିର ଏକ ରାଜ୍ୟସ୍ତରୀୟ ସମ୍ମିଳନୀ ଆୟୋଜନ ହୋଇଥିଲା । ଏଥିରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଅଂଶଗ୍ରହଣ କରି କର୍ମୀ ମାନଙ୍କୁ ସମ୍ବୋଧିତ କରିଥିଲେ । ଏହି ସମୟରେ ସେ ୨୦୨୫ ଦିଲ୍ଲୀ ବିଧାନସଭା ନିର୍ବାଚନକୁ ନେଇ ଏକ ବଡ଼ ଭବିଷ୍ୟବାଣୀ ମଧ୍ୟ କରିଛନ୍ତି।

ଶାହ କହିଛନ୍ତି ଯେ, “ଦିଲ୍ଲୀରେ ଭାରତୀୟ ଜନତା ପାର୍ଟିର ସରକାର ଗଠନ ହେବାକୁ ଯାଉଛି । ୨୦୨୪ ମସିହାରେ, ବର୍ଷଟି ମହାରାଷ୍ଟ୍ରରେ ଏକ ବଡ଼ ବିଜୟ ସହିତ ଶେଷ ହୋଇଥିଲା ଏବଂ ନୂତନ ବର୍ଷ ୨୦୨୫ ଦିଲ୍ଲୀରେ ଏକ ବିଜୟ ସହିତ ଆରମ୍ଭ ହେବ।” ସମ୍ମିଳନୀ ସମୟରେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବୀସ, କେନ୍ଦ୍ରମନ୍ତ୍ରୀ ଅମିତ ଶାହ, କେନ୍ଦ୍ରମନ୍ତ୍ରୀ ନୀତିନ ଗଡକରୀ, ରାଜ୍ୟ ସଭାପତି ଚନ୍ଦ୍ରଶେଖର ବାୱନକୁଲେ କର୍ମୀ ମାନଙ୍କୁ ସମ୍ବୋଧିତ କରିଥିଲେ।

ପୂର୍ବତନ ମୁଖ୍ୟମନ୍ତ୍ରୀ ତଥା ଶିବସେନା (UBT) ସଭାପତି ଉଦ୍ଧବ ଠାକରେଙ୍କୁ ଟାର୍ଗେଟ କରି ଅମିତ ଶାହ ବିଜେପି କର୍ମୀ ମାନଙ୍କୁ କହିଥିଲେ ଯେ, "ଉଦ୍ଧବ ଠାକରେ ଆମ ସହିତ ବିଶ୍ୱାସ ଘାତକତା କରିଥିଲେ ଏବଂ ତୁମେମାନେ (ବିଜେପି କର୍ମୀମାନେ) ତାଙ୍କୁ ତାଙ୍କର ସ୍ଥାନ ଦେଖାଇ ଦେଇଥିଲ । ଏହା ସହିତ, ଶରଦ ପାୱାର ଏବଂ ଉଦ୍ଧବ ଠାକରେଙ୍କୁ ଟାର୍ଗେଟ କରି ସେ କହିଛନ୍ତି କି, “ପ୍ରକୃତ ଏନସିପି ଏବଂ ପ୍ରକୃତ ଶିବସେନା ମହାରାଷ୍ଟ୍ରରେ ନିର୍ବାଚନ ଜିତିଛନ୍ତି । ରାଜ୍ୟର ଲୋକମାନେ ଶରଦ ପାୱାର ଏବଂ ଉଦ୍ଧବ ଠାକରେଙ୍କ ରାଜନୀତିକୁ ସମ୍ପୂର୍ଣ୍ଣ ପ୍ରତ୍ୟାଖ୍ୟାନ କରିଛନ୍ତି । ମହାରାଷ୍ଟ୍ରର ଲୋକମାନେ ବଂଶବାଦ ରାଜନୀତି ଏବଂ ଶରଦ ପାୱାର ଏବଂ ଉଦ୍ଧବ ଠାକରେଙ୍କ ବିଶ୍ୱାସଘାତକତାକୁ ପ୍ରତ୍ୟାଖ୍ୟାନ କରିଛନ୍ତି । ଏହି ନିର୍ବାଚନ ଶରଦ ପାୱାର ଏବଂ ଉଦ୍ଧବ ଠାକରେଙ୍କୁ ସେମାନଙ୍କର ପ୍ରକୃତ ସ୍ଥାନ ଦେଖାଇ ଦେଇଛି ।