ଭୁବନେଶ୍ଵର, ୩୧/୦୧ : ଅନ୍ତ ଫାଡ଼ି ତିନି ତିନିଟା ପୁଅଙ୍କୁ ଜନ୍ମ ଦେଇଥିଲା। ପାଳିପୋଷି ମଣିଷ କରିଥିଲା। ବୁଢୀ ହୋଇଗଲା ବୋଲି ଅଲୋଡ଼ା ହେଲା ଜନ୍ମକଲା ମା'। ପାଳି କରି ବି ବୁଢୀ ମା'କୁ ଦାନା ଗଣ୍ଡେ ଦେଇ ପାରିଲେନି ୩ ଚାକିରିଆ ପୁଅ। ରାସନ କାର୍ଡ ଚାଉଳକୁ ନେଇ ଘରୁ ବିଦା କରିଦେଲେ ୩ ପୁଅ। ଖାଲି ସେତିକି ନୁହେଁ ଜିଇଁ ଥାଉ ଥାଉ ମା'କୁ ସୁଦ୍ଧି ହୋଇଯାଇଛି ସାନ ପୁଅ। ଢେଙ୍କାନାଳ ଜିଲ୍ଲା କାମାକ୍ଷାନଗର ଥାନା ବେଢାପାଳ ଗାଁରେ ଘଟିଛି ଏଭଳି ଅଭାବନୀୟ ଘଟଣା।
ସୂଚନାନୁଯାୟୀ, ବେଢାପାଳ ଗାଁର ସ୍ଵର୍ଗତ ଲୋଚନ ଜେନାଙ୍କ ସ୍ତ୍ରୀ ଦ୍ରୌପଦୀ ଜେନା। ଆଜିକୁ ୬ ବର୍ଷ ତଳେ ସ୍ଵାମୀ ଆରପାରିକୁ ଛାଡ଼ି ଚାଲିଗଲେ। ସ୍ଵାମୀଙ୍କ ମୃତ୍ୟୁ ପରେ ବଡ଼ ଓ ମଝିଁଆ ପୁଅ ୬ ମାସ ଲେଖା ପାଳି କରି ଦାନା ଗଣ୍ଡେ ଦେଉଥିଲେ। ଜିଇଁ ଥାଉ ଥାଉ ସାନ ପୁଅ ବାପା-ମା'ଙ୍କୁ ସୁଦ୍ଧି ହୋଇପଡ଼ିଥିଲା। ଏବେ ରାସନ କାର୍ଡ ଚାଉଳକୁ ନେଇ ବଡ଼ ଓ ମଝିଁଆ ପୁଅବି ମା'କୁ ଖାଇବାକୁ ଦେଲେନି, ଘରୁ ତଡ଼ିଦେଲେ। ଶେଷରେ ଥାନାର ଦ୍ଵାରସ୍ଥ ହେଲେ ଦ୍ରୌପଦୀ ଜେନା।
ଏହି ଖବରଟିକୁ ପଢନ୍ତୁ-ଭାରସାମ୍ୟ ହରାଇ କାର୍କୁ ଧକ୍କା ଦେଲା ପାଇପ୍ ବୋଝେଇ ଟ୍ରକ୍, ଅଳ୍ପକେ ବର୍ତ୍ତିଲେ ୨ ଯୁବକ
ଦ୍ରୌପଦୀ ଜେନା ଏନେଇ କାମାକ୍ଷାନଗର ଥାନାରେ ଅଭିଯୋଗ କରିଛନ୍ତି। ପୋଲିସ ପକ୍ଷରୁ ତଦନ୍ତ ଆରମ୍ଭ ହୋଇଛି। ତେବେ ବୃଦ୍ଧା ବୟସରେ ଜନ୍ମ କଲା ମାଆକୁ ତିନି ଚାକିରିଆ ପୁଅଙ୍କ ଘରୁ ତଡି ଦେବା ଘଟଣା ଏବେ ଅଂଚଳରେ ଚର୍ଚ୍ଚାର ବିଷୟ ପାଲଟିଛି। ତେଣୁ ବୃଦ୍ଧାଙ୍କୁ ତୁରନ୍ତ ନ୍ୟାୟ ଦେବା ସହ ପୁଅମାନଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ନେବା ପାଇଁ ସାଧାରଣରେ ଦାବି ହେଉଛି।
