ହିନ୍ଦୋଳ,୧୫/୦୧: ଢେଙ୍କାନାଳ ରାସୋଳ ଥାନା ବେଡ଼ାପଡ଼ା ଗାଁରେ ଲାଗୁ ହେଲା ବିଏନ୍ଏସ୍-୧୬୩ ଧାରା । ଢେଙ୍କାନାଳ ଜିଲ୍ଲା ପ୍ରଶାସନ ତରଫରୁ ନୋଟିସ ଜାରି କରିଛି ପୋଲିସ । ଜାନୁଆରୀ ୧୪ ତାରିଖରୁ କଟକଣା ଲାଗିଥିବା ବେଳେ ଜାନୁଆରୀ ୨୦ ତାରିଖ ପର୍ଯ୍ୟନ୍ତ କଟକଣା ବଳବତ୍ତର ନେଇ ନୋଟିସ ହୋଇଛି ।
ସୂଚନା ମୁତାବକ, କ୍ରିକେଟ ଖେଳକୁ କେନ୍ଦ୍ର କରି ବେଡ଼ାପଡ଼ା ଗାଁରେ ଗୋଷ୍ଠୀ ସଂଘର୍ଷ ହୋଇଥିଲା । ଏଥିରେ ଜଣେ ବ୍ୟକ୍ତି ଗୁରୁତର ହୋଇଥିଲେ । ଏହାପରେ ତାଙ୍କୁ ଗୁରୁତର ଅବସ୍ଥାରେ ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଥିଲା । ଶେଷରେ ଗାଁରେ ପୋଲିସ ଫୋର୍ସ ମୁତୟନ କରାଯାଇଥିଲା । ଅନ୍ୟପଟେ ପୋଲିସ ଘଟଣାର ତଦନ୍ତ କରି ଉଭୟ ଗୋଷ୍ଠୀରୁ ୩୫ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ଗାଁରେ ପରିସ୍ଥିତି ଆୟତ୍ତରେ ଥିଲେ ମଧ୍ୟ ଆଗକୁ କୌଣସି ଆଇନ ଶୃଙ୍ଖଳା ପରିସ୍ଥିତିକୁ ଏଡାଇବା ପାଇଁ ବିଏନ୍ଏସ୍-୧୬୩ ଧାରା ଲାଗୁ କରାଯାଇଛି । ଏହି ସମୟରେ ସରକାରୀ ନିୟମ ମାନିବାକୁ ନିର୍ଦ୍ଦେଶ ଦିଆଯାଇଛି । ଯଦି କୌଣସି ବ୍ୟକ୍ତି ଏହି ନିୟମକୁ ଉଲ୍ଲଂଘନ କରନ୍ତି, ତେବେ ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ ବୋଲି ନିର୍ଦ୍ଦେଶ ଦିଆଯାଇଛି।
