ଚମ୍ପୁଆ,୨୦/୦୮: ସମ୍ପର୍କରେ ଲାଗିଲା ରକ୍ତ ଛିଟା । ସାମାନ୍ୟ ବଚସାରୁ ଗଡ଼ିଲା ମୁଣ୍ଡ । ସାନ ଭାଇର ଟାଙ୍ଗିଆ ଚୋଟରେ ଚାଲିଗଲା ବଡ ଭାଇର ଜୀବନ। କେନ୍ଦୁଝର ଜିଲ୍ଲା ଚମ୍ପୁଆ ଥାନା ରିମୁଳି ଗାଁ ଇନ୍ଦିରା କଲୋନୀ ସାହିରେ ଏଭଳି ଅଭାବନୀୟ ଘଟଣା ଘଟିଛି । ମୃତକ ଇନ୍ଦିରା କଲୋନୀ ସାହିର ନବ ନାଏକଙ୍କ ବଡ଼ ପୁଅ ରାହୁଲ ନାଏକ (୨୨ ବର୍ଷ) ବୋଲି ଜଣାପଡ଼ିଛି । ହତ୍ୟାକାରୀ ଧନୁ ନାଏକ (୧୫ ବର୍ଷ)କୁ ପୁଲିସ ଗିରଫ କରିଛି ।
ମିଳିଥିବା ସୂଚନା ଅନୁସାରେ, ମଙ୍ଗଳବାର ସନ୍ଧ୍ୟା ପ୍ରାୟ ୭ଟା ୩୦ରେ ମଦ ନିଶାରେ କୌଣସି କଥାକୁ ନେଇ ଦୁଇ ଭାଇଙ୍କ ମଧ୍ୟରେ ବଚସା ହୋଇଥିଲା । ଏଥିରେ ଉତକ୍ଷିପ୍ତ ହୋଇ ନିଶାସକ୍ତ ଧନୁ ନାଏକ ଏକ ଟାଙ୍ଗିଆରେ ବଡ ଭାଇ ରାହୁଲ ନାଏକର କାନ ଓ ମୁଣ୍ଡାକୁ ଚୋଟ ପକାଇଥିଲେ । ଫଳରେ ଘଟଣା ସ୍ଥଳରେ ରାହୁଲ ନାଏକର ମୃତ୍ୟୁ ଘଟିଥିଲା । ଏସମ୍ପର୍କରେ ଖବର ପାଇ ଚମ୍ପୁଆ ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଛି । ଏହା ସହ ଅଭିଯୁକ୍ତ ଧନୁକୁ ଗିରଫ କରି ଘଟଣାର ତଦନ୍ତ ଆରମ୍ଭ କରିଛି।
