ଭୁବନେଶ୍ୱର ୨୦/୦୨: ଘରର ମୁଖ୍ୟ ଦ୍ୱାରରେ ପାପୋଛ ପକାଇବା ଖୁବ୍ ଜରୁରି । ଘର ଭିତରେ ଅନ୍ୟ ଦ୍ୱାର ଆଗରେ ପାପୋଛ ପକାଇବା ଅନୁଚିତ୍ କାହିଁକି ଜାଣନ୍ତି କି? ବାସ୍ତୁ ଶାସ୍ତ୍ର ଅନୁସାରେ ଘରର ମୁଖ୍ୟ ଦ୍ୱାରା ଆଗରେ ପାପୋଛ ପକାଇବା ଶୁଭ । କିନ୍ତୁ ଅନ୍ୟ ଦ୍ୱାର ସାମ୍ନାରେ ପାପୋଛ ପକାଇବା ଅଶୁଭ । ମୁଖ୍ୟ ଦ୍ୱାର ଦେଇ ଘର ଭିତରକୁ ସମସ୍ତ ଶକ୍ତି ପ୍ରବେଶ କରିଥାନ୍ତି । ତେଣୁ ଘର ଭିତରକୁ ନକାରାତ୍ମକ ଶକ୍ତିକୁ ରୋକିବା ପାଇଁ ଘରର ମୁଖ୍ୟ ଦ୍ୱାରରେ ପାପୋଛ ପକାଇବାର ବିଶେଷ ମହତ୍ତ୍ୱ ରହିଛି ।
ଆମେ ଘରୁ ବାହାରକୁ ଯିବା ବେଳେ ସକାରାତ୍ମକ ଶକ୍ତି ଆମ ସହ ବାହାରକୁ ଯାଇଥାଏ । ସେହିପରି ବାହାରୁ ଆସିବା ସମୟରେ ନକାରାତ୍ମକ ଶକ୍ତି ଆମ ସହ ଭିତରକୁ ଯାଇ ପରିବାର ଉପରେ ବିଭିନ୍ନ କୁପ୍ରଭାବ ପକାଇଥାଏ । ବାହାରକୁ ଯିବା ବେଳେ ମୁଖ୍ୟ ଦ୍ୱାରରେ ଥିବା ପାପୋଛ ଉପରେ ପାଦ ରଗଡ଼ିବା ଦ୍ୱାରା ସକାରାତ୍ମକ ଶକ୍ତି ଆମ ସହ ବାହାରକୁ ଯାଇ ନଥାଏ । ସେହିପରି ବାହାରୁ ଆସିବା ସମୟରେ ପାପୋଛରେ ପାଦ ରଗଡ଼ିବା ଦ୍ୱାରା ମଧ୍ୟ ଆମ ସହ ଆସିଥିବା ନକାରାତ୍ମକ ଶକ୍ତି ଘର ଭିତରକୁ ପ୍ରବେଶ କରି ନଥାଏ । ତେଣୁ ଘରର ମୁଖ୍ୟ ଦ୍ୱାରରେ ପାପୋଛ ପକାଇବା ଜରୁରି । ସେହିପରି ଘର ଭିତରେ ଥିବା ଅନ୍ୟ ଦ୍ୱାର ଆଗରେ ପାପୋଛ ପକାଇବା ଦ୍ୱାରା ସକାରାତ୍ମକ ଶକ୍ତିର ପ୍ରବାହ ଅଟକିଯାଇଥାଏ । ତେଣୁ ରୋଷେଇଘର, ଶୋଇବା ଘର ଓ ଡ୍ରଇଂ ରୁମ ଆଦିରେ ମଧ୍ୟ ପାପୋଛ ପକାଇବା ଅନୁଚିତ୍ । ନଚେତ୍ ପରିବାର ସଦସ୍ୟଙ୍କ ଜୀବନରେ ବିଭିନ୍ନ ସମସ୍ୟା ଦେଖିବାକୁ ମିଳିଥାଏ ।
