ନୂଆଦିଲ୍ଲୀ,୨୭/୦୬: ସ୍ୱରାଷ୍ଟ୍ରମନ୍ତ୍ରୀ ଅମିତ ଶାହଙ୍କ ବିରୋଧରେ ଆପତ୍ତିଜନକ ବୟାନ ଦେବା ମାମଲାରେ ଉତ୍ତରପ୍ରଦେଶ ସୁଲତାନପୁରର ଏକ ଏମ୍ପି/ଏମ୍ଏଲଏ କୋର୍ଟ ବୁଧବାର କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କୁ ଜୁଲାଇ ୨ରେ ହାଜର ହେବାକୁ ନିର୍ଦ୍ଦେଶ ଦେଇଛନ୍ତି । ବୁଧବାର ଏହି ମାମଲାର ଶୁଣାଣି ସମୟରେ ବିଚାରପତି ରାହୁଲଙ୍କ ଓକିଲଙ୍କୁ ସେ କେଉଁଠି ଅଛନ୍ତି ବୋଲି ପଚାରିଥିଲେ ।
ଓକିଲ କାଶୀ ପ୍ରସାଦ ଶୁକ୍ଲା କହିଥିଲେ, ଲୋକସଭା ବାଚସ୍ପତି ପଦର ନିର୍ବାଚନ ଥିବାରୁ ତାଙ୍କ ମହକିଲ କୋର୍ଟରେ ହାଜର ହୋଇ ପାରିନାହାନ୍ତି । ଏହାପରେ କୋର୍ଟ ରାହୁଲଙ୍କୁ ଜୁଲାଇ ୨ରେ ବ୍ୟକ୍ତିଗତ ଭାବେ ହାଜର ହେବାକୁ ନିର୍ଦ୍ଦେଶ ଦେଇଥିଲେ । ୨୦୧୮ ମସିହା ମେ ୮ ତାରିଖରେ ବେଙ୍ଗାଲୁରୁରେ କର୍ଣ୍ଣାଟକ ବିଧାନସଭା ନିର୍ବାଚନ ସମୟରେ ରାହୁଲ ଗାନ୍ଧୀ ଏକ ସାମ୍ବାଦିକ ସମ୍ମିଳନୀରେ ତତ୍କାଳୀନ ବିଜେପି ଅଧ୍ୟକ୍ଷ ଶାହଙ୍କୁ ହତ୍ୟା ଅଭିଯୁକ୍ତ ବୋଲି କହିଥିଲେ ।
