କଟକ,୧୩/୦୬: ସୋସିଆଲ୍ ମିଡିଆରେ ବହୁ ୟୁଜର୍ସ ଅଶ୍ଲୀଳ ଭାଷାରେ ଗାଳିଗୁଲଜର ମେସେଜ୍ ଓ ଭିଡିଓ ପୋଷ୍ଟ କରୁଛନ୍ତି । ଛୋଟ ପିଲା ସୋସିଆଲ୍ ମିଡିଆ ଦେଖିବା ବେଳେ ଏସବୁ ବିଷୟ ପିଲାଙ୍କ ଉପରେ ଖରାପ ପ୍ରଭାବ ପକାଉଛି । ତେଣୁ ଏଭଳି ଗାଳିଗୁଲଜଠାରୁ ପିଲାଙ୍କୁ ଦୂରରେ ରଖିବା ପାଇଁ ଏକାଧିକ ପଦକ୍ଷେପ ନେବାକୁ କ୍ରାଇମବ୍ରାଞ୍ଚ୍ ପକ୍ଷରୁ ପରାମର୍ଶ ଦିଆଯାଇଛି ।
ପ୍ରଥମେ ସବୁ ସୋସିଆଲ୍ ମିଡିଆ ଆକାଉଣ୍ଟକୁ ପ୍ରାଇଭେଟ୍ରେ ସେଟ୍ କରିବା ଦରକାର । ଅର୍ଥାତ୍ ସୋସିଆଲ୍ ମିଡିଆ ଆକାଉଣ୍ଟର ସେଟିଂରେ ରହିଥିବା ପ୍ରାଇଭେଟ୍ ଅପ୍ସନ୍କୁ ଅନ୍ କରିଦେବା ଦରକାର । ଏଭଳି କଲେ ସୋସିଆଲ୍ ମିଡିଆରେ ଆସୁଥିବା ଅଦରକାରୀ ବା ବା ଅଶ୍ଲୀଳ ଗାଳିମନ୍ଦ ଥିବା ବିଷୟ ଆସିବା କମ୍ ହୋଇଯିବ । ଏହା ବାଦ୍ ଯଦି ପିଲାମାନେ ଲଗାତାର ଭାବେ ଅର୍ଥାତ୍ ଦିନକୁ ଘଣ୍ଟାଘଣ୍ଟା ଧରି ସୋସିଆଲ୍ ମିଡିଆ ଦେଖୁଛନ୍ତି ତାହାଲେ ପିଲାଙ୍କୁ ଏଭଳି ନକରିବାକୁ ବୁଝାଇବା ଦରକାର । ଅଧିକ ବ୍ୟବହାର ଦ୍ୱାରା କ’ଣ ଖରାପ ପ୍ରଭାବ ପଡ଼ିବ ତାହା ପିଲାଙ୍କୁ ଜଣାଇବା ଦରକାର । ଏହା ଛଡ଼ା ପିଲାମାନେ ସୋସିଆଲ୍ ମିଡିଆ ବ୍ୟବହାର କଲା ବେଳେ ଯେମିତି ଅଜଣା ଲୋକ ବା ୟୁଜର୍ସଙ୍କ ସହିତ ସମ୍ପର୍କ ନବଢ଼ାନ୍ତି ତାହା ଉପରେ ନଜର ଦେବା ଦରକାର । ପିଲାଙ୍କୁ ଏଭଳି ବିଷୟରେ ଅଧିକରୁ ଅଧିକ ବୁଝାଇବା ସହିତ ତାର ଅପକାରିତା ମଧ୍ୟ ଜଣାଇବା ଦରକାର । ଏସବୁ ପରେ ଯଦି ପିଲା ସୋସିଆଲ୍ ମିଡିଆ ପ୍ରତି ଅଧିକ ସମୟ ହେଉଛି ତାହାଲେ ଫୋନ୍ରେ ରହିଥିବା ଅନ୍ଲାଇନ୍ ଅପସନ୍କୁ ନିର୍ଦ୍ଦିଷ୍ଟ ସମୟ ପାଇଁ ସେଟ୍ କରିବା ଦରକାର । ଅର୍ଥାତ୍ ସୋସିଆଲ୍ ମିଡିଆ କେତେ ସମୟ ଅନ୍ଲାଇନ୍ ରହିବ ତାହାର ଏକ ସମୟସୀମା ଫୋନ୍ରେ ସେଟ୍ କରି ଛାଡ଼ିବା ଉଚିତ ବୋଲି କ୍ରାଇମବ୍ରାଞ୍ଚ ପକ୍ଷରୁ ପରାମର୍ଶ ଦିଆଯାଇଛି ।
