ନ୍ୟୁ ୟର୍କ,୦୨/୦୭: ୪୮ତମ କୋପା ଆମେରିକା କପ୍(ଗ୍ରୁପ୍-ବି)ରେ ଭେନେଜୁଏଲା କ୍ରମାଗତ ତୃତୀୟ ମ୍ୟାଚ୍ ଜିତିଛି । ସେହିପରି ମେକ୍ସିକୋକୁ ପଛରେ ପକାଇ ଇକ୍ୱେଡର କ୍ୱାର୍ଟର ଫାଇନାଲ୍ରେ ସ୍ଥାନ ପକ୍କା କରିଛି ।
ପୂର୍ବରୁ ମେକ୍ସିକୋ ଓ ଇକ୍ୱେଡରକୁ ହରାଇ ସାରିଥିବା ଭେନେଜୁଏଲା ୩-୦ ଗୋଲ୍ରେ ଜାମାଇକାକୁ ପରାସ୍ତ କରିଥିଲା । ମ୍ୟାଚ୍ର ପ୍ରଥମାର୍ଦ୍ଧ ଗୋଲ୍ ଶୂନ୍ୟ ରହିଥିଲା । ୪୯ତମ ମିନିଟ୍ରେ ଏଡୁଆର୍ଡ ବେଲୋ ପ୍ରଥମ ଗୋଲ କରିଥିଲେ । ଏହାପରେ ୫୬ତମ ମିନିଟ୍ରେ ସାଲୋମୋନ ରଣ୍ଡନ ଓ ୮୫ତମ ମିନିଟ୍ରେ ଏରିକ ରାମିରେଜ ଅନ୍ୟ ଦୁଇଟି ଗୋଲ କରି ଦଳକୁ ବିଜୟୀ କରାଇଥିଲେ ।
ଇକ୍ୱେଡର ଓ ମେକ୍ସିକୋ ମଧ୍ୟରେ ଅନୁଷ୍ଠିତ ଅନ୍ୟ ଏକ ମ୍ୟାଚ୍ ଗୋଲ୍ ଶୂନ୍ୟ ରହିଥିଲା । ଉଭୟ ପଏଣ୍ଟ ଭାଗ କରିଥିଲେ । ୩ଟି ଯାକ ଲିଗ ମ୍ୟାଚ୍ ପରେ ଉଭୟ ୪ ପଏଣ୍ଟ ଲେଖାଏଁ ଅର୍ଜନ କରିଥିଲେ । ମାତ୍ର ଅଧିକ ଗୋଲ୍ ସ୍କୋର କରିଥିବା ଇକ୍ୱେଡର କ୍ୱାର୍ଟର ଫାଇନାଲ୍ରେ ପ୍ରବେଶ କରିଥିଲା । ଉଭୟ ଜାମାଇକା ବିପକ୍ଷରେ ବିଜୟୀ ହୋଇଥିଲେ । ମେକ୍ସିକୋ ୧-୦ ଗୋଲ୍ରେ ଓ ଇକ୍ୱେଡର ୩-୧ ଗୋଲ୍ରେ ଜାମାଇକାକୁ ହରାଇଥିଲେ ।
କ୍ୱାର୍ଟର ଫାଇନାଲ୍ରେ ଇକ୍ୱେଡର ଡିଫେଣ୍ଡିଂ ଚାମ୍ପିଅନ୍ ଆର୍ଜେଣ୍ଟିନାକୁ ଭେଟିବ । ସେହିପରି ଭେନେଜୁଏଲା ଓ କାନାଡ଼ା ପରସ୍ପରକୁ ସାମ୍ନା କରିବେ ।
