ରାୟଗଡ଼ା,୫/୭ : ଭିଜିଲାନ୍ସ ଜାଲରେ ପଡ଼ିଛନ୍ତି ରାୟଗଡ଼ା ଜିଲ୍ଲା ଚନ୍ଦ୍ରପୁର ତହସିଲଦାର ବିଚିତ୍ରାନନ୍ଦ ନାୟକ । ତାଙ୍କ ସରକାରୀ ଗାଡ଼ି ଭିତରୁ ୧ ଲକ୍ଷ ୧୫ ହଜାର ଟଙ୍କା ଜବତ । ହନୁମନ୍ତପୂର ଗ୍ରାମର ଗୋଟିଏ ଗୋଷ୍ଠୀଠାରୁ ଏହି ଟଙ୍କା ଲାଞ୍ଚ ନେଇଥିଲେ । ସରକାରୀ ଜମିରେ ପଟ୍ଟା ପ୍ରଦାନ ପାଇଁ ଲାଞ୍ଚ ନେଇ ଗାଡି ଭିତରେ ରଖିଥିଲେ ତହସିଲଦାର। ତେବେ ଏହା କୌଣସି ସୂତ୍ରରେ ଜାଣିବାକୁ ପାଇଥିଲେ ଭିଜିଲାନ୍ସ ଇନ୍ସପେକ୍ଟର ତରୁଲତା ବେହେରା ।
ଏହା ଜଣାପଡିବା ପରେ ଅତିରିକ୍ତ ଏସପି ଅରୁଣ ନାୟକ ଓ ଇନ୍ସପେକ୍ଟର ତରୁଲତା ବେହେରାଙ୍କ ନେତୃତ୍ୱରେ ଏକ ଭିଜିଲାନ୍ସ ଟିମ୍ ତହସିଲଦାର ଗାଡ଼ିକୁ ଗୋଡ଼ାଇ ଥିଲେ । ହେଲେ ସେ ରାୟଗଡ଼ା ଜିଲ୍ଲାପାଳ କାର୍ଯ୍ୟାଳୟ ବୈଠକରେ ଯୋଗଦେବାକୁ ଆସିଥିଲେ । ବୈଠକ ସରିବା ପରେ ଜିଲ୍ଲାପାଳ କାର୍ଯ୍ୟାଳୟରୁ ବାହାରି ଚନ୍ଦ୍ରପୁର ଫେରିବା ପାଇଁ ଯିବା ସମୟରେ ଭିଜିଲାନ୍ସ ଟିମ୍ ଜିଲ୍ଲାପାଳ କାର୍ଯ୍ୟାଳୟ ପରିସରରୁ ଧରିଥିଲା । ଭିଜିଲାନ୍ସ ଟିମ୍ ଧରିବା ପରେ ଉକ୍ତ ଟଙ୍କା ଫୋପାଡ଼ିବା ପାଇଁ ତହସିଲଦାର ବିଚିତ୍ରାନନ୍ଦ ନାୟକ ଉଦ୍ୟମ କରିଥିଲେ । କିନ୍ତୁ ଭିଜିଲାନ୍ସ କର୍ତ୍ତୃପକ୍ଷଙ୍କ ଉପସ୍ଥିତ ବୁଦ୍ଧି ଯୋଗୁଁ ସେ ଆଉ ଫିଙ୍ଗି ପାରିଲେ ନାହିଁ । ଏହାପରେ ତହସିଲଦାର ବିଚିତ୍ରାନନ୍ଦ ନାୟକଙ୍କୁ ଗିରଫ କରି ଭିଜିଲାନ୍ସ ଡିଏସପି କାର୍ଯ୍ୟାଳୟ ଆଣିଥିଲେ କର୍ତ୍ତୃପକ୍ଷ । ଖବର ଲେଖାଯିବା ପର୍ଯ୍ୟନ୍ତ ଘଟଣାର ତଦନ୍ତ ଜାରି ରହିଥିଲା ।