ମୁମ୍ବାଇ: ମୁମ୍ବାଇରେ ପୁଣି ହିଟ୍ ଏଣ୍ଡ ରନ୍ ମାମଲା । ମାଛ କିଣିବାକୁ ଯାଉଥିବା ଦମ୍ପତିଙ୍କ ସ୍କୁଟିକୁ ଧକ୍କା ଦେଲା ବିଏମଡବ୍ଲୁ। ଏଥିରେ ମହିଳାଙ୍କ ମୃତ୍ୟୁ ହୋଇଥିବା ବେଳେ ସ୍ୱାମୀ ଗୁରୁତର ହୋଇଛନ୍ତି । ମୁମ୍ବାଇର ୱର୍ଲି ଅଞ୍ଚଳରେ ଆଜି ଭୋର ୫ଟା ବେଳେ ଏହି ମର୍ମନ୍ତୁଦ ଦୁର୍ଘଟଣା ଘଟିଛି । ଦମ୍ପତି ମାଛ ଆଣିବା ପାଇଁ ସସୁନ୍ ଡକକୁ ଯାଇଥିଲେ । ଫେରିବା ବାଟରେ ୱର୍ଲି ଅଟରିଆ ମଲ୍ ନିକଟରେ ସେମାନଙ୍କ ସ୍କୁଟିକୁ ପଛପଟୁ ଦ୍ରୁତ ଗତିରେ ଆସି ଧକ୍କା ଦେଇଥିଲା ବିଏମଡବ୍ଲୁ କାର । ଏତେ ଜୋରରେ ଧକ୍କା ଦେଇଥିଲା ଯେ ସ୍ୱାମୀ-ସ୍ତ୍ରୀ ଛିଟିକି ପଡ଼ି ବିଏମଡବ୍ଲୁ ବନେଟ୍ ଉପରେ ପଡିଥିଲେ ।
ନିଜକୁ ବଞ୍ଚାଇବାକୁ ଚେଷ୍ଟା କରି ସ୍ୱାମୀ ବନେଟରୁ ଡେଇଁବାରେ ସଫଳ ହୋଇଥିଲେ। କିନ୍ତୁ ପତ୍ନୀଙ୍କ ମୃତ୍ୟୁ ହୋଇଥିଲା । ତେବେ ଦୁର୍ଘଟଣାସ୍ଥଳରୁ ବିଏମଡବ୍ଲୁ ସହ ଚମ୍ପଟ ମାରିଥିଲା ଡ୍ରାଇଭର । ଦୁର୍ଘଟଣା ଘଟାଇଥିବା ବିଏମଡବ୍ଲୁଟି ଏକନାଥ ସିନ୍ଦେ ଶିବସେନା ଗୋଷ୍ଠୀର ଜଣେ ନେତାଙ୍କର ବୋଲି ଜଣାପଡିଛି । ସିନ୍ଦେ ଶିବସେନା ଗୋଷ୍ଠୀର ନେତାଙ୍କ ପୁଅ ମିହିର ଶାହ କାର ଚଳାଉଥିଲେ ବୋଲି କୁହାଯାଉଛି । ୨୪ ବର୍ଷୀୟ ଯୁବକ ଦୁର୍ଘଟଣା ଘଟାଇ ଫେରାର ହୋଇଯାଇଛନ୍ତି ।
ପାଲଘର ଜିଲ୍ଲାର ଶିବସେନା ନେତା ଏବଂ ମିହିର ଶାହଙ୍କ ବାପା ରାଜେଶ ଶାହଙ୍କୁ ପୋଲିସ ଅଟକ ରଖିଛି । କାରଟି ରାଜେଶ ଶାହଙ୍କା ନାଁରେ ପଞ୍ଜିକୃତ ରହିଛି । ତାଙ୍କ ଡ୍ରାଇଭର ରାଜରିଶି ବିଦ୍ବାତଙ୍କୁ ମଧ୍ୟ ପୋଲିସ ଅଟକ ରଖିଥିବା ଜଣାପଡ଼ିଛି । ଦୁର୍ଘଟଣାର ଶିକାର ହୋଇଥିବା ଦମ୍ପତି ପ୍ରଦୀପ ନଖ୍ବା (୫୦) ଏବଂ ତାଙ୍କ ସ୍ତ୍ରୀ କାବେରୀ ନଖ୍ବା । କାବେରୀଙ୍କ ମୃତ୍ୟୁ ହୋଇଥିବା ବେଳେ ପ୍ରଦୀପ ହସ୍ବିଟାଲରେ ଜୀବନ ସହ ସଂଘର୍ଷ କରୁଛନ୍ତି ।
ସେପଟେ କାର ଚଳାଉଥିବା ମିହିର ଶାହଙ୍କୁ ପୋଲିସ ଗିରଫ କରିବାକୁ ଉଦ୍ୟମ ଚଳାଇଛି । ଏହାରି ମଧ୍ୟରେ ଦୁର୍ଘଟଣାକୁ ନେଇ ଦୁଃଖ ପ୍ରକାଶ କରିବା ସହ ମାମଲାରେ ନିରପେକ୍ଷ ତଦନ୍ତ ହେବ ବୋଲି ମୁଖ୍ୟମନ୍ତ୍ରୀ ଏକନାଥ ସିନ୍ଦେ କହିଛନ୍ତି ।