ନିମବାହାଳି,୦୧/୧୦: ରାତିତମାମ୍ କାରଖାନା ପରିସରରେ ଚାଲିଥିଲା କଙ୍ଗାରୁ କୋର୍ଟ । କାରଖାନାରେ କାର୍ଯ୍ୟ କରୁଥିବା ଦୁଇ ଯୁବକଙ୍କୁ ଚୋରି ଅଭିଯୋଗରେ ଅକଥନୀୟ ନିର୍ଯାତନା ଦେଇଛନ୍ତି ସୁରକ୍ଷାକର୍ମୀ ଓ ଗାଡ଼ି ଚାଳକ । ଉଭୟଙ୍କୁ ଅର୍ଦ୍ଧଉଲଗ୍ନ କରିବା ସହ ହାତବାନ୍ଧି ଆଣ୍ଠେଇ ଦେଇଥିଲେ । ନିସ୍ତୁକ ମାଡ଼ପିଟ୍ କରୁଥିବାରୁ ଭିଡିଓ କ୍ଲିପ୍ ସୋସିଆଲ୍ ମିଡିଆରେ ଭାଇରାଲ୍ ହୋଇଛି । ଏ ନେଇ ପୀଡ଼ିତ ଯୁବକ ଦ୍ୱୟ ଥାନାରେ ଅଭିଯୋଗ କରିବା ପରେ ପୁଲିସ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି ।
ସୂଚନା ଅନୁଯାୟୀ, ମୋଟଙ୍ଗା ଥାନା ଅନ୍ତର୍ଗତ ନିମିଧା ସ୍ଥିତ ଏକ କାରଖାନାରେ ନିମିଧା ଗାଁର ଦୁଇ ଯୁବକ ଶ୍ରମିକ ଭାବେ କାର୍ଯ୍ୟ କରୁଛନ୍ତି । ଗତ ଶୁକ୍ରବାର ବିଳମ୍ବିତ ରାତିରେ ଏକ ଗାଡ଼ିର ବ୍ୟାଟେରି ଚୋରି ହୋଇଥିଲା । ଉକ୍ତ ଯୁବକ ଦ୍ୱୟ ବ୍ୟାଟେରି ଚୋରାଇଥିବା ସନ୍ଦେହ କରି ସୁରକ୍ଷା କର୍ମୀ ସେମାନଙ୍କୁ କାବୁ କରିଥିଲେ । ଏହା ପରେ ଆରମ୍ଭ ହୋଇଥିଲା କଙ୍ଗାରୁ କୋର୍ଟ । ସର୍ବସମ୍ମୁଖରେ ଆଣ୍ଠେଇ ଦେଇ ଆରମ୍ଭ ହୋଇଥିଲା ନିର୍ଯାତନା । ସୁରକ୍ଷା କର୍ମୀ ଲାଠିରେ ନିର୍ଘାତ ପିଟିଥିଲେ । ଗାଡ଼ିଚାଳକ ବିଧାଗୋଇଠା ମାରି ଚାଲିଥିଲେ । ଶହଶହ ଲୋକ ଏହି ଦୃଶ୍ୟ ଦେଖୁଥିବା ବେଳେ ବାରଣ କରିବାକୁ କେହି ଆଗେଇ ଆସିନଥିଲେ । ବରଂ ମୋବାଇଲ୍ରେ ଭିଡିଓ ରେକର୍ଡିଂ କରିବାରେ ଲାଗିଥିଲେ।
ରାତିସାରା ଉଭୟଙ୍କୁ ପ୍ଲାଣ୍ଟ୍ ପରିସରରେ ଉଭୟଙ୍କୁ ଅକଥନୀୟ ନିର୍ଯାତନା ଦେଇ ସକାଳେ ପୁଲିସ ଜିମା ଦେଇଥିଲେ । ଉଭୟଙ୍କୁ ପୁଲିସ ପଚରାଉଚୁରା କରିବା ପରେ ଛାଡ଼ି ଦେଇଥିଲା । ଉଭୟ ପରିବାର ଲୋକଙ୍କୁ ଏ ସମ୍ପର୍କରେ ଅବଗତ କରାଇବା ପରେ ଥାନାରେ ଲିଖିତ ଅଭିଯୋଗ କରିଛନ୍ତି । ପୁଲିସ ବିଏନ୍ଏସ୍ ଦଫା ୧୨୬(୨), ୧୨୭(୨), ୨୯୬, ୧୧୫(୨), ୩୫୧(୨),୩୫୧(୩), ୩(୫)ରେ ମାମଲା ରୁଜୁ କରିବା ସହ ଭିଡିଓ କ୍ଲିପ୍କୁ ଆଧାର କରି ଘଟଣାର ତଦନ୍ତ ଚଳାଇଛି ।
