ମାଲକାନଗିରି, ୪/୭ : ମଧ୍ୟାହ୍ନ ଭୋଜନ ଖାଇ ନଳକୂଅ ନିକଟରେ ହାତ ଧୋଉଥିବାବେଳେ କରେଣ୍ଟ ଲାଗି ଜଣେ ୫ମ ଶ୍ରେଣୀ ଛାତ୍ରୀ ଆହତ ହୋଇଛନ୍ତି । ଏହି ଘଟଣା ପରେ ପରିବାର ଓ ଗ୍ରାମବାସୀଙ୍କ ମଧ୍ୟରେ ଚାପା ଉତ୍ତେଜନା ପ୍ରକାଶ ପାଇଛି । ଘଟଣାସ୍ଥଳରେ ଜିଲ୍ଲା ଶିକ୍ଷାଧିକାରୀ ଚିତ୍ତରଞ୍ଜନ ପାଣିଗ୍ରାହୀ ଓ ଅନ୍ୟାନ୍ୟ ଶିକ୍ଷା ବିଭାଗ କର୍ମଚାରୀ ପହଁଚି ପରିସ୍ଥିତି ଅନୁଧ୍ୟାନ କରିବା ସହିତ ଗ୍ରାମବାସୀଙ୍କୁ ବୁଝାଇବା ସହ ପରବର୍ତ୍ତୀ ସମୟରେ ଏପରି ଘଟଣା ଯେପରି ନ ଘଟେ ବିଦ୍ୟାଳୟର ଶିକ୍ଷକ ଓ ଶିକ୍ଷୟିତ୍ରୀଙ୍କୁ ତାଗିଦ କରିଛନ୍ତି।
ସୂଚନାଯୋଗ୍ୟ ଯେ, ମାଲକାନଗିରି ବ୍ଲକସ୍ଥ ଚଲାଣଗୁଡା ପଞ୍ଚାୟତ ପ୍ରଧାଣିଗୁଡା ଗ୍ରାମର କମଲ ଲୋଚନ ହରିଜନଙ୍କ ଝିଅ ରଞ୍ଜିତା ହରିଜନ (୧୦)ମୁଣ୍ଡଗୁଡା ପ୍ରାଥମିକ ବିଦ୍ୟାଳୟରେ ୫ମ ଶ୍ରେଣିରେ ପାଠ ପଢେ । ଆଜି ମଧ୍ୟାହ୍ନ ଭୋଜନ ଖାଇ ସାରି ହାତ ଧୋଇବା ପାଇଁ ବିଦ୍ୟାଳୟ ପାଚେରୀ ବାହାରେ ଥିବା ଏକ ନଳକୂପ ନିକଟକୁ ଯାଇଥିଲା । ଉକ୍ତ ନଳକୂପରେ ମୋଟର ଫିଟିଂ ହୋଇଥିଲା । ବିଦ୍ୟୁତ ତାର ଖୋଲାଥିବାରୁ ହାତ ବାଜି କରେଣ୍ଟ ଲାଗି ଯାଇ ନଳକୂପ ନିକଟରେ ଲଟକି ରହିଥିଲା । ସେ ଚିତ୍କାର କରିବାରୁ ସେହି ରାସ୍ତାରେ ଯାଉଥିବା ଜଣେ ବ୍ୟକ୍ତି ଏହା ଦେଖି ଉକ୍ତ ଛାତ୍ରୀକୁ ଉଦ୍ଧାର କରିଥିଲେ । ସଙ୍ଗେ ସଙ୍ଗେ ପରିବାର ଲୋକେ ଓ ଗ୍ରାମବାସୀ ମାଲକାନଗିରି ହସ୍ପିଟାଲକୁ ନେଇ ଚିକିତ୍ସା କରିଥିଲେ । ଛାତ୍ରୀଟିର ହାତରେ ସାମନ୍ୟ ଆଘାତ ଲାଗିଛି । ସେ ସୁସ୍ଥ ଅଛି, ଏହି ଘଟଣାରେ ଗ୍ରାମରେ ଚାପା ଉତ୍ତେଜନା ପ୍ରକାଶ ପାଇଥିଲା । ଏହା ଜାଣିପାରି ସଙ୍ଗେ ସଙ୍ଗେ ଜିଲ୍ଲା ଶିକ୍ଷାଧିକାରୀ ଚିତ୍ତରଞ୍ଜନ ପାଣିଗ୍ରାହୀ ଘଟଣା ସ୍ଥଳରେ ପହଁଚି ପରିସ୍ଥିତି ଅନୁଧ୍ୟାନ କରି ଛାତ୍ରୀର ଚିକିତ୍ସା ବ୍ୟବସ୍ଥା କରିଛନ୍ତି ।
